Supracoŭniki adnoj z homielskich firmaŭ napisali ŭ miascovy RUUS zajavy z patrabavańniem źniščyć atrymanyja ŭ ich ŭzory adbitkaŭ palcaŭ.
Historyja dvuch žycharoŭ Homielu typovaja. Niekalki tydniaŭ tamu ŭ ichniuju firmu naviedaŭsia ŭčastkovy milicyjant i zaprasiŭ usich mužčynaŭ prajści daktylaskapičnuju rehistracyju.
«Nichto nie admoviŭsia, dyj my nia viedali, što toje možna rabić tolki dobraachvotna. Nivodzin milicyjant ža pra heta nie skazaŭ» — kaža adzin ź ich.
Paźniej daviedalisia, što isnuje adpaviedny zakon (Zakon Respubliki Biełaruś ad 4 listapadu 2003 h. №236-Z «Ab dziaržaŭnaj daktylaskapičnaj rehistracyi» — NN) i što ŭ ich jość zakonnaje prava patrabavać źniščeńnia vynikaŭ daktylaskapičnaj rehistracyi.
Treba tolki napisać zajavu. U RUUSie da takoj idei pastavilisia z prachałodaj, ale zajavy taki pryniali, zaznačyŭšy, što čakać adkazu daviadziecca miesiac. A siońnia, praz dva tydni paśla padačy zajavaŭ, abodvuch vyklikali na hutarku.
«Nam patłumačyli, što źniščyć našyja adbitki jany mohuć choć zaraz, ale pry žadańni jany mohuć ich uziać u nas prymusova ŭ luby momant. Tak i skazali – prymusova» – kaža hamialčuk. Supracoŭniki firmy nie spałochalisia i nastajali na svaim. Milicyjanty ž nahadali pra toje, što majuć zakonnaje prava pačakać da kanca miesiačnaha terminu. Na tym pakul i razyšlisia.
Daviedka: Zhodna art.7 Zakonu «Ab dziaržaŭnaj daktylaskapičnaj rehistracyi» ad 4 listapadu 2003 h. № 236-3 abaviazkovaj dziaržaŭnaj daktylaskapičnaj rehistracyi padlahajuć pryznanyja niedziejazdolnymi albo abmiežavanymi ŭ dziejazdolnaści pavodle rašeńnia sudu; padazravanyja (abvinavačanyja) ŭ ździajśnieńni złačynstva albo asudžanyja za ździajśnieńnie złačynstva; asoby, što znachodziacca na prafilaktyčnym uliku ŭ orhanach MUS; asoby, u adnosinach da jakich prymienienyja prymusovyja miery biaśpieki i lačeńnia, praduhledžanyja KK RB; a taksama asoby, što ździejśnili administracyjnyja pravaparušeńni, za jakija praduhledžvajecca adkaznaść u vyhladzie administracyjnaha aryštu.
U adpaviednaści z č.2 art.234 Kryminalna-pracesualnaha kodeksu RB, śledčy, daznavalnik maje prava atrymać uzory jak adbitkaŭ palcaŭ, počyrku śliny, kryvi, tak i inš. dla paraŭnaŭčaha daśledavańnia ŭ paciarpiełaha, a taksama ŭ śviedki ź jaho asabistaj zhody ŭ vypadkach, kali ŭźnikła nieabchodnaść vyśvietlić, ci nie pakinuŭ jon ślady na miescy zdareńnia albo rečavych dokazach.
