Premjer uradu BNR, tvorca pieršaj «Našaj Nivy», akademik, adzin z baćkoŭ-zasnavalnikaŭ Biełarusi naradziŭsia 8 listapada 1883 hodu na Dzisienščynie, u Padźvińni. Sioleta my adznačajem 125-hadovy jubilej jaho.
* * *
Vácłaŭ Łastóŭski (8 listapada (27 kastryčnika pa starym styli) 1883 – 23 studzienia 1938) — biełaruski piśmieńnik, historyk, litaraturaznaviec, publicyst i palityčny dziajač, adzin z pačynalnikaŭ nacyjanalnaha adradžeńnia.
Naradziŭsia u zaścienku Kaleśniki Dzisienskaha pavietu Vilenskaj huberni ŭ siamji bieźziamielnaha šlachcica. Skončyŭ na radzimie Pahostaŭskuju pačatkovuju škołu.
Ad 1906 hodu Łastoŭski žyŭ u Vilni. Pracavaŭ chłopčykam na pasłuhach u viniarni, kancylarystam u Šaŭlach, biblijatekaram u studenckaj biblijatecy ŭ Pieciarburhu, dzie naviedvaŭ lekcyi va ŭniversytecie. Ustupiŭ u Polskuju sacyjalistyčnuju partyju. Rabiŭ kantorščykam na tavarnaj stancyi ŭ Ryzie. Šukaŭ siabie, svaju identyčnaść. Dałučyŭsia da biełaruskaha nacyjanalnaha hramadzkaha i kulturnaha ruchu. U 1906–1908 uvachodziŭ u Biełaruskuju sacyjalistyčnuju hramadu — pieršuju sučasnuju biełaruskuju partyju.
Ad 1909 — sakratar redakcyi «Našaj Nivy» i zahadčyk pieršaj biełaruskaj kniharni, u 1916–1917 — redaktar hazety «Homan», u 1918 vydavaŭ hazetu «Krywičanin». U kancy 1918 uznačaliŭ pradstaŭnictva ŭrada BNR pry litoŭskaj Tarybie, byŭ biełaruskim ataše pry litoŭskim pasolstvie ŭ Berlinie. Z 1919 — u partyi biełaruskich eseraŭ, sa śniežnia 1919 da krasavika 1923 uznačalvaŭ Radu ministraŭ BNR (byŭ premjeram). U svajoj dziejnaści abapiraŭsia na Litvu i Niamieččynu.
Udzielničaŭ u arhanizacyi antypolskaha partyzanskaha ruchu ŭ Zachodniaj Biełarusi, byŭ staršyniom Suviazi nacyjanalna-dziaržaŭnaha vyzvaleńnia Biełarusi. Byŭ źniavoleny polskimi ŭładami, u 1920 jamu dazvolena vyjechać ŭ Litvu. U krasaviku 1923 h. vyjšaŭ z urada BNR i adyšoŭ ad aktyŭnaj palityčnaj dziejnaści. Vydavaŭ u Koŭni litaraturna-navukovy časopis «Kryvič» (1923–1927).
U 1927 urad BSSR dazvoliŭ jamu viarnucca ŭ Miensk. Pracavaŭ dyrektaram Biełaruskaha dziaržaŭnaha muzeju. Ad 1928 hodu Vacłaŭ Łastoŭski – akademik i sakratar Inbiełkulta i Akademii navuk BSSR.
U 1930 hodzie Łastoŭskaha aryštavali pa spravie «Sajuza vyzvaleńnia Biełarusi», pazbavili zvańnia akademika i sasłali na 5 hadoŭ u Sarataŭ. Tam jon pracavaŭ zahadčykam adździełu redkaj knihi va ŭniversyteckaj biblijatecy. Paŭtorna aryštavany ŭ 1937. 23 studzienia 1938 hodzie jaho rasstralali. Pa pieršym pryhavory reabilitavany 10 červienia 1988, pa druhim — u 1958.
