Sud Leninskaha rajonu Horadni pryznaŭ miascovych aktyvistaŭ vinavatymi ŭ drobnym chulihanstvie i niepadparadkavańni supracoŭnikam milicyi i pakaraŭ ich na ahulnuju sumu ŭ pamiery $1tys.
13 listapada adbyŭsia sud nad aktyvistam niezarehistravanaha ruchu «Za Svabodu!» Edvardam Dmuchoŭskim, krajaznaŭcam Iharam Łapiecham i aktyvistkaj Nadziej Krapivinaj, jakija 16 kastryčnika hetaha hodu byli zatrymanyja za sprobu pieraškodzić vysiakańniu hrabaŭ. Zatrymańniem kiravaŭ major Siarhiej Viečar. U pačatku kastryčnika miascovyja žychary spynili byli niezakonnaje vysiakańnie zaniesienych ŭ Čyrvonuju knihu drevaŭ.
E.Dmuchoŭski byŭ pryznany vinavatym u drobnym chulihanstvie i byŭ pakarany štrafam u pamiery 5 bazavych vieličyń (175 tys. rub.). I. Łapiechu i N. Krapivinu sud paličyŭ vinavatymi akramia taho i ŭ niepadparadkavańni supracoŭnikam milicyi, u vyniku čaho jany atrymali štrafy ŭ 30 b.v. (1.050 tys.) i 25 b.v. (875 tys.) adpaviedna. Viała praces sudździa Kozieł.
Varta adznačyć, što sud nad haradzienskimi aktyvistami adbyŭsia tolki praź miesiac paśla incydentu. Za hety čas na padziei adreahavaŭ Haradzienski abłasny kamitet pa achovie pryrodnych resursaŭ. V.a. kiraŭnika Kamiteta H.V.Kazak pryznaŭ śpiłoŭvańnie drevaŭ na asnovie Aktu, padpisanaha 23 kastryčnika 2007 hodu, zakonnym, adnak pryznaŭ, što haradzkija zielanhas nasupierak patrabavańniam zakanadaŭstva nie painfarmavaŭ pra svaje namiery hramadzianaŭ. Pra «prablemy i nieparazumieńni z azielanieńniem u Horadni» adhuknułasia navat «Sovietskaja Biełoruśsija».
