Ahułam materyjałam pra Biełaruś pryśviečana čatyry staronki siońniašniaha numaru. Interviju z Łukašenkam maje nazvu «My nia možam być zakrytaj krainaj».
Žurnalist«Financial Times» zapytaŭsia ŭ kiraŭnika Biełarusi, ci źmianiŭ jon svaju dumku nakont pryvatyzacyi, bo raniej šmat hadoŭ byŭ jaje praciŭnikam.
Alaksandar Łukašenka adkazaŭ:
«…Ciapier, kali naša ekanomika pieraŭzychodzić vałavy ŭnutrany pradukt savieckich časoŭ u 2,5 raza i ludzi hod stajać u čarzie, kab kupić naš traktar abo aŭtamabil,my možam heta abmiarkoŭvać: «Kali vy chočacie kupić pakiet akcyjaŭ, vy možacie heta zrabić, ale nie za adzin dalar, a za miljardy dalaraŭ…» My nie patrabujem chabaru dla čynoŭnikaŭ. My nia majem karupcyi, jakaja isnuje ŭ vašaj krainie i ŭ inšych postsavieckich respublikach…»
Adkazvajučy na pytańnie, što zroblena ŭ spravie raśśledavańnia źniknieńnia krytykaŭ režymu ŭ 2000 hodzie, u tym liku i žurnalista Źmitra Zavadzkaha, Alaksandar Łukašenka skazaŭ:
«Hetaje śledztva nikoli nie zakryvałasia… Ja ŭžo raniej kazaŭ, što Dzima Zavadzki źjaŭlajecca najvialikšaj ranaj dla mianie jak dla prezydenta. Jon byŭ sumlenny i prystojny čałaviek, jaki naahuł nia mieŭ suviaziaŭ z palitykaj… Sud vynies verdykt u hetaj kryminalnaj spravie, i čałaviek za vykradańnie asudžany na pažyćciovaje źniavoleńnie. Ale dla mianie bolš važna znajści jaho [Zavadzkaha — «FT»] abo, kali jon miortvy, jaho cieła.
Kali ž vyśvietlicca, što naš sud pamyliŭsia i asudziŭ nie taho, ja budu na kaleniach prasić prabačeńnia ŭ svajakoŭ, siabroŭ i ŭ samoha Dźmitryja Zavadzkaha, kali jon akažacca žyvy.Mahčyma, vy zhadali Dźmitryja Zavadzkaha tamu, što jon blizki da vas jak žurnalist. My možam pahavaryć i ab inšych. Kali łaska, paviercie, što dla mianie heta prablema z prablemaŭ».
Žurnalist «Financial Times» zapytaŭsia ŭ kiraŭnika Biełarusi, što robić čałavieka dobrym baćkam?
Adkaz Łukašenki:
«Vielmi važna dla baćki navučyć syna realnamu mužčynskamu žyćciu. Kali [moj najmałodšy syn — «FT»] Kola mieŭ adzin hod, ja braŭ jaho za ruku i zavodziŭ u paryłku.Viadoma, jon narakaŭ i płakaŭ. Zatoje ciapier, kali jamu čatyry hady, jon moža vytryvać temperaturnuju roźnicu ad 100 hradusaŭ u paryłcy da 28 hradusaŭ u basejnie. Plus, jon vytrymlivaje i ledzianuju vannu. Ja navučyŭ maich starejšych synoŭ rabić heta. My prarazajem pałonku ŭ lodzie na race, dajem tudy nyrca, a paśla biažym pa śniezie ŭ paryłku».
