U źviazku z karupcyjnym skandałam vakoł prakurora Śniehira kiraŭnik firmy, jakaja pradała prakuroru 200-metrovuju kvateru pa zanižanaj canie, skiravaŭ u ŚMI list. U im jon raskryvaje niekatoryja fakciki ź dziejnaści hr. Sidaroviča i biełaruskaha biznesu.
18 listapada ŭ redakcyju partału tut.by pryjšoŭ list ad staršyni praŭleńnia AT «Swe Bel Partner AB» Anatola Zuboŭskaha. Kiraŭnik pradpryjemstva paviedamiŭ, što nakiravaŭ zvaroty ŭ Administracyju prezydenta i Respublikanskuju prakuraturu ŭ źviazku z padziejami, pra jakija stała viadoma na minułym tydni na naradzie pa pytańniach karupcyi.
Nahadajem, na naradzie 13 listapada Alaksandar Łukašenka zapatrabavaŭ vyzvalić ad zajmanych pasadaŭ prakurora Mienskaj vobłaści Michaiła Śniehira i namieśnika hieneralnaha prakurora Mikałaja Kupryjanava, a taksama raspačać na ich kryminalnyja spravy. Pryčynaj takoha rašeńnia prezydenta stała ździełka pa nabyćci ŭžo byłym prakuroram vobłaści nieruchomaści ŭ centry Miensku. Śniahir, raspavioŭ prezydent, nabyŭ 5‑pakajovuju kvateru za 156 młn. rubloŭ, pry hetym da 2024 hodu na hetuju kvateru dziejničała damova arendy pamiž «SWE BEL Partner AB» i supracoŭnikam zhadanaj firmy U.Sidarovičam. Sidarovič nibyta sudziŭsia sa Śniehirom, ale ničoha nia vysudziŭ praz toje što sudździ, sa słovaŭ Łukašenki, uzhadniali svaje dziejańni praz telefon z tym samym Śniehirom.
Voś što skazaŭ Anatol Zuboŭski:
— Mnie kryŭdna i baluča, što praz našy adnosiny ź Sidarovičam paciarpieli ludzi. I bačyŭ Śniehira tolki raz u svaim žyćci — 15 hadoŭ tamu… Ja mahu paćvierdzić, što jon całkam raźličyŭsia z nami, zapłaciŭ firmie 250 tysiač dalaraŭ… Kožnaje svajo słova ja mahu paćvierdzić dakumentami, za podpisami Uładiźmiera Sidaroviča. A Sidarovič — zusim nie takaja «biednaja aviečka», jak pra jaho kažuć, — raspavioŭ A.Zuboŭski.
Staršynia praŭleńnia AT «Swe Bel Partner AB» rastłumačyŭ, što kiraŭnictva vyrašyła pradać kvateru, kab vyjści z składanaha finansavaha stanovišča, u jakim apynułasia firma mienavita ź viny Ŭładzimiera Sidaroviča. Pry hetym samomu Sidaroviču kiraŭnictva firmy nieadnojčy prapanoŭvała pradać kvateru za 150 tysiač dalaraŭ, pry tym, što jaje rynkavy košt składaŭ 500 tysiač dalaraŭ ZŠA.
Ciapier A.Zuboŭski znachodzicca pa‑za miežami Biełarusi — «z pryčynaŭ, jakija tyčacca tolki mianie i majoj siamji». Pavodle słovaŭ Zuboŭskaha, U.Sidarovič znachodzicca ŭ Biełarusi, ale jahonaj asobaj «čamuści nichto nie cikavicca».
Jak paviedamiŭ A.Zuboŭski, AT «Swe Bel Partner AB» ciapier znachodzicca ŭ stadyi inicyjavanaha bankructva.
A voś tekst zvarotu Anatola Zuboŭskaha, nakiravanaha prezydentu i hienprakuroru:
«Pavažany spadar Prezydent!
Źviartajusia da Vas u suviazi z Vašym vystupam pa pytańniach baraćby z karupcyjaj u siłavych strukturach ad 13 listapada hetaha hodu.
Ja, Zuboŭski Anatol Ściapanavič, z 1994 hodu i da ciapierašniaha času — staršynia praŭleńnia firmy AT «SWE BEL Partner AB». Ja pracavaŭ sumiesna z spadarom Sidarovičam U. u firmie AT «SWE BEL Partner AB» z 1995 da 2002 hod. Uvieś hety čas Sidarovič źjaŭlaŭsia nia prosta šarahovym supracoŭnikam na pasadzie finansavaha dyrektara, ale i jaje ŭłaśnikam. Jamu naležała 40% akcyjaŭ AT «Swe Bel Partner AB» i ŭsich inšych firmaŭ, što ŭvachodziać u chołdynh.
U śniežni 2001 hodu sp. Sidarovič pa ŭłasnym žadańni vyjšaŭ ź biznesu i atrymaŭ 40% usich aktyvaŭ chołdynhu, kala 20 000 000 dalaraŭ ZŠA, u tym liku:
Ofis u Maskvie, palihrafičnuju fabryku ŭ Sankt‑Pieciarburhu, firmu pa ramoncie naftavych śvidravin u Ciumieni, dźvie kvatery ŭ Maskvie, try kvatery ŭ Miensku, akcyi firmaŭ na Kipry i ŭ Aŭstryi, zavod pa vytvorčaści metyzaŭ u Litvie i inšyja aktyvy. U studzieni 2002 hodu ŭ vyniku ŭnutranaj pravierki było ŭstanoŭlena, što sp. Sidarovič, źjaŭlajučysia finansavym dyrektaram, pieravioŭ 8 000 000 dalaraŭ ZŠA z rachunku chołdynhu pa nieviadomych bieskantaktnych adrasach. U suviazi z hetym padzieł chołdynhu byŭ prypynieny, pačalisia sudovyja raźbiralnictvy, jakija iduć i zaraz. Tak, u pryvatnaści, zaraz na Kipry razhladajecca zysk da sp. Sidaroviča na sumu 24 500 000 dalaraŭ ZŠA, pryŭłaščanych im asabista i firmaj «Fagapito — LTD».
Kvatera, u jakoj, jak Vam dakłali, pražyvaŭ «biedny supracoŭnik» Sidarovič była pieradadzienaja jamu ŭ arendu. Pačynajučy z 2002 hodu i da traŭnia 2007 jamu nieadnojčy prapanoŭvałasia nabyć hetuju kvateru za 150 000 dalaraŭ ZŠA, ale jon heta rabić admoviŭsia, vidać tamu, što ad «biednaści» svajoj pabudavaŭ katedž u rajonie vadaschovišča «Pcič», pryŭłaściŭ niezakonna jašče adnu kvateru ŭ tym samym domie, jakuju pradaŭ.
U suviazi z vyšejvykładzienymi abstavinami, u traŭni‑červieni 2007 hodu hetaja kvatera była pradadzienaja sp. Śniehiru M. za 535 młn. biełaruskich rubloŭ (u ekvivalencie 250 000 dalaraŭ ZŠA). Hrošy byli atrymanyja ad pakupnika ŭ poŭšym abjomie.
Nie ŭ majoj kampetencyi raźbiracca i aceńvać stupień karupcyi, udzieł u joj kankretnych asobaŭ, ja prosta chaču źviarnuć Vašuju ŭvahu na toje, što padadzienaja Vam infarmacyja pa kvatery sp. Sidaroviča chłuślivaja i padmanlivaja. Mienavita toj, chto Vam jaje padaŭ, mahčyma, atrymaŭ ad «biedniaka» Sidaroviča salidny «kuš».
Meta majho zvarotu adna: kali Vy budziecie zacikaŭlenyja ŭ praŭdzie pa hetym pytańni, prašu Vas daručyć niezacikaŭlenym i prystojnym ludziam razabracca ŭ hetym. Sa svajho boku ja hatovy padać usiu nieabchodnuju infarmacyju.
Z pavahaj!
Pavodle infarmacyi «Biełorusskoho partizana» Sidarovič u minułym pracavaŭ u KDB. A voś Zuboŭski byŭ da 1991 hodu dyrektaram Mazyrskaha naftapierapracoŭčaha zavodu. U toj čas jon byŭ taksama deputatam Viarchoŭnaha Savietu.
