«Naša Niva» i «Narodnaja vola» viartajucca ŭ «Sajuzdruki» i «Biełpoštu».
Palityčna nijakich umovaŭ niama. Handlu z nami nie viali. Nam prosta patelefanavaŭ Usievaład Jančeŭski z Administracyi prezydenta i painfarmavaŭ, što našy «prablemy z raspaŭsiudam buduć vyrašanyja».
Adnak
ekanamičnyja i jurydyčnyja ŭmovy viartańnia biaźlitasnyja.
Pavodle damovaŭ, «Biełsajuzdruk» i «Biełpošta» buduć zabirać sabie 55% ad adpusknoj cany. Choć stvaryć i vypuścić hazetu namnoha ciažej, čym jaje pradać. Na pradukty handlovaja nacenka abmiežavanaja, a tut — spekulatyŭnaja nakrutka. Dy ničoha nie parobiš — manapolija.
Jurydyčna dahavory składzienyja tak, kab hazety možna było vyturyć z raspaŭsiudu ŭ kožny momant, a kolkaść asobnikaŭ u prodažy — abmiažoŭvać da biaskoncaści.
U damovach prysutničajuć try momanty: 1) damova moža być razarvanaja, kali raspaŭsiud akažacca nierentabelnym (ujavicie sabie nierentabelnaść pry 55%-aj nakrutcy!), ale niama nijakich kryteraŭ raźliku toj rentabelnaści, 2) damova moža być razarvanaja pry viartańni bolšym za 30% (letaś była ŭciečka źviestak pra 50%-je viartańnie dziaržaŭnych hazetaŭ, tym nia mienš, usie jany zastajucca ŭ kijoskach), 3) pry viartańni bolšym za 10% «Sajuzdruk» maje prava skaračać tyraž, jaki prymaje na realizacyju.
Viartańnie — heta termin dla abaznačeńnia kolkaści niepradadzienych asobnikaŭ. Mechanizmu pravierki praŭdzivaści ličbaŭ viartańnia niama.
Nam try hady manili pra «ekanamičnuju niametazhodnaść zaklučeńnia damovaŭ», to chto budzie vieryć ciapier?
Narešcie — djabał chavajecca ŭ drabnicach — kolkaść.
«Biełsajuzdruk» pryniaŭ na raspaŭsiud abmiežavanyja tyražy — naprykład, na Miensk pojdzie ŭsiaho 2500 ekzemplaraŭ «Narodnaj voli» i 1400 asobnikaŭ «Našaj Nivy». H.zn. u siarednim mienš za 4 paasobniki na adzin kijosk. Raźmiarkoŭvacca jany buduć niaroŭna: dzieści pa 20, a niedzie pa 2. Pišam pra takija drabnicy, kab vy lepiej spaścihli pryčyny i nastupstvy padziei, patencyjał i perspektyvy.
«Narodnaja vola» pokul maje vychodzić dvojčy na tydzień, u aŭtorak i piatnicu.
Damovy praduhledžvajuć mahčymaść pierachodu jaje na štodzionny vychad. Niama detalaŭ — adnosna akredytacyi karespandentaŭ, mahčymaści dla prodažu praz kramy dy inšaje — jakija składajuć umovy dla narmalnaj pracy ŚMI.«NN», imavierna, vierniecca ŭ šapiki ŭžo z nastupnaha numaru pačynajučy. U toj ža čas niama peŭnaści, ci va ŭsich rehijonach adnačasova.
Druhi raz u tuju ž raku
Majem dziŭnaje adčuvańnie, niby druhi raz uvachodzim u tuju ž raku. «Biełpošta» dała nam toj samy padpisny indeks, jaki my i mieli try hady tamu.
Padpisny indeks (dla indyvidualnych padpisčykaŭ) 63125. Padpisny indeks (dla viedamasnaj padpiski) 631252.
Padpisny indeks našaha vydańnia uniasuć u kaniec padpisnoha katalohu ad ruki na kožnaj pošcie.
Toje, što my z vami ździejśnili, — bieź pierabolšvańnia histaryčna. Try hady! Try hady my sami raspaŭsiudžvali hazetu.
Buduć siurpryzy
Pačynajučy z nastupnaha numaru, hazeta źmienicca.
My skancentrujem usie siły, kab zavajavać novaha čytača,kab tyja ludzi, jakija pabačać nas u kijoskach, adčuli roźnicu miž niezaležnaj i prydvornaj hazetaj, kab začapilisia i stali čytać biełaruskuju hazetu. Hałoŭnymi zadačami zastajucca ŭmacavańnie nacyjanalnaj tojesnaści i niezaležnaści hramadztva ad dziaržavy.
Jakaja budzie cana hazety?
Dziakujučy pavyšeńniu nakładu, udasca źnizić sabiekošt.U śniežni hazeta budzie pradavacca ŭ «Sajuzdrukach» za 2000 rubloŭ — dla novych čytačoŭ. Nie kryŭdujcie, padpisčyki, jakija apłacili za jaje pa 3000. Heta byŭ minimum dla našaha vyžyvańnia.
Z Novaha hodu hazeta budzie kaštavać u šapikach 2500 rubloŭ, hetulki ž — pry padpiscy praz Redakcyju, a pry padpiscy praź «Biełpoštu» — 3000 rubloŭ. Tolki viedamasnaja padpiska budzie tańniejšaja, bo my zacikaŭlenyja, kab biblijateki vypisvali, a heta ŭstanovy niebahatyja, kali nie ličyć taje hałoŭnaje.
Jak dziejničać čytačam?
My rekamendujem i prosim padpisvacca praz Redakcyju i nadalej.Usie tyja, kaho taki sposab atrymańnia hazety zadavalniaje, chaj zastajucca viernymi takoj padpiscy. 1) Jana nam vyhadniejšaja finansava. 2) My zmožam dastaŭlać Vam hazetu chutčej abo z toj ža chutkaściu, što «Biełpošta». 3) Ličym važnym zachavać systemu samaraspaŭsiudu dziejnaj. Lišnie tłumačyć, čamu.
Red.
* * *
Kab atrymlivać papiarovuju hazetu štotydzień, dasyłajcie adrasy i hrašovyja pierakazy.
Paviedamlać svaje adrasy možna praz telefon, faksam, praz poštu ci elektronnuju poštu.
Telefony: (017) 284-73-29, (029) 260-78-32 (MTS), (029) 618-54-84, e-mail: [email protected], [email protected], paštovy adras: a/s 537, 220050 Miensk.
U blanku bankaŭskaha paviedamleńnia ci paštovaha pierakazu, kali łaska, dakładna i razborliva paznačajcie vaš adras, u tym liku paštovy indeks i kod padjezdu.
Na jaki rachunak pieraličać hrošy?
Achviaravańnie možna pieravieści ŭ lubym adździaleńni banku, na luboj pošcie. Uličycie, što pry pierakazvańni hrošaj paštovym pieravodam pošta spahaniaje dadatkova 3 %, a pry pieravodzie hrošaj praź «Biełarusbank» pracentu nie biaruć.
Na bankaŭskaj kvitancyi ŭ hrafie «Vid płaciaža» treba paznačyć: «Za hazetu «Naša Niva».
U hrafie: «Atrymalnik płaciaža» treba pisać: PVUP «Surodzičy», UNP 190 786 828.
U hrafie «Najmienavańnie banku» treba pisać: «MHD AAT «Bielinviestbank», vuł.Kalektarnaja, 11, Minsk, kod 764».
U hrafie «Rachunak atrymalnika» — 3012 206 280 014. Pry pierasyłcy hrošaj pa pošcie toje samaje treba pisać u rubrykach «Kamu» i «Kudy».
Razdrukavać bankaŭskuju kvitancyju (pdf-fajł 38Kb, A4).
