Praciahvajecca hramadzkaja kampanija pa biełarusizacyi adnaho z aperataraŭ mabilnaj suviazi MTS. Pra chadu kampanii raskazvaje adzin ź jaje kaardynataraŭ Ivan Šyła z Salihorsku.
«Naša Niva»: Na jakim etapie zaraz znachodzicca kampanija pa biełarusizacyi MTS?
Ivan Šyła: Ad samaha pačatku planavałasia, što kampanija budzie mieć dva etapy — infarmacyjny i aktyŭny. Na pieršym etapie nam była važnaja zhadka pra kampaniju ŭ ŚMI, pra toje, što źjaviłasia takaja voś inicyjatyva. Zbolšaha hetaha damahlisia. Na druhim — budziem źbirać podpisy, pieradavać ich da kiraŭnictva MTS. U vypadku admoŭnaha admoŭnaha adkazu — budzie sudovy precedent. Nia tak daŭno pačaŭ pracu admysłovy sajt «Za MTS pa-biełarusku». Tam apaviadajecca pra našu dziejnaść, tam ža možna razdrukavać admysłovyja blanki, jość padrabiaznaja instrukcyja jak ich zapaŭniać i kudy treba dasyłać. Spadziajomsia taksama na onłajnavuju aktyŭnaść ludziej, što jany buduć stavić podpisy i dasyłać listy pa internecie.
«NN»: Ci pačaŭsia zbor podpisaŭ, kolki planujecie sabrać?
IŠ: U Miensku ŭžo pačaŭsia. Bližejšym časam pačniecca i ŭ rehijonach. Da Novaha hodu źbirajemsia sabrać piać tysiač podpisaŭ. Heta nia mnoha. Prosta kab zaśviedčyć, što takaja prablema isnuje. My ŭžo pravodzili ŭ Salihorsku kampaniju pa biełarusizacyi hramadzkaha transpartu. Chaču skazać, što ludzi lubiać biełaruskuju movu i z radaściu hatovyja padpisacca za padobnyja inicyjatyvy. Jany kažuć, što sami jašče nie hatovyja pierajści na biełaruskuju movu, ale z radaściu nas padtrymajuć. Padčas pikietu la hałoŭnaha budynku MTS u Miensku ja paśpieŭ da zatrymańnia padyści da čatyroch čałaviek. Troje padpisałasia.
«NN»: Ty vieryš u pieramohu kampanii?
IŠ: Tak, absalutna. MTS daražyć svajoj dziełavoj reputacyjaj, kali niedzie źjaŭlajecca infarmacyja, što pradpryjemstva nia choča iści na sastupki karystalnikam, to heta nie dadaje joj stanoŭčaha imidžu. Raniej kiraŭnictva MTS pisała nam, što ŭ adpaviednaści z artykułam 17 Kanstytucyi jany mohuć vykarystoŭvać lubuju dziaržaŭnuju movu. Na dniach ža atrymali list z zusim inšaj tanalnaściu, dzie adznačałasia, što aperatar razhladaje metazhodnaść našaha patrabavańnia, a taksama razhladajucca varyjanty, što možna zrabić z techničnaha boku. Pavodle nieaficyjnaj infarmacyi, MTS hatovy pryniać našy ŭmovy.
«NN»: A što rabić ź inšymi aperatarami?
IŠ: Mnie zdajecca, kali nam atrymajecca damahčysia biełarusizacyi MTS, to VELCOM sam prapanuje svaim karystalnikam padobnyja pasłuhi. Heta ž kankurencyja i nichto prajhravać tut nia choča.
«NN»: U jakich sferach jašče možna damahacca biełarusizacyi?
IŠ: Ich mnostva. Uziać chacia b u prykład naš prykład ź biełarusizacyjaj hramadzkaha transpartu, ci homielčuka Siarhieja Siamionava, jaki damohsia taho, kab mytnyja blanki na miažy byli pa‑biełarusku. Mnie zdajecca nia varta prosta stavić niejkich hlabalnych zadač. Naprykład, kab uvieś Mienabłvykankam havaryŭ pa‑biełarusku. Treba stavić kankretnyja pryziemlenyja zadačy, jakija mahčyma realizavać. Važnym faktaram taksama źjaŭlajucca vykanaŭcy kampanij, ad ichnaj metanakiravanaści i zaležyć pośpiech prajektu.
