Łaŭreatami premii litaraturna‑mastackaha časopisa «Dziejasłoŭ» 2007 hoda stali paety Iryna Bielskaja i Andrej Chadanovič, prazaik Kastuś Tarasaŭ.
Uračystaje ŭručeńnie premij «Załaty apostraf» adbyłosia 3 śniežnia ŭ minskim Pałacy mastactva ŭ miežach ahulnanacyjanalnaj kampanii «Budźma!».
Adkryvajučy litaraturna‑muzyčnuju viečarynu, hałoŭny redaktar časopisa, pieršy namieśnik staršyni Sajuza biełaruskich piśmieńnikaŭ (SBP) Barys Piatrovič zaznačyŭ, što ŭznaharoda źjaŭlajecca adzinaj nacyjanalnaj litaraturnaj premijaj, jakoj adznačajuć lepšyja tvory ajčynnych prazaikaŭ, paetaŭ i debiutantaŭ, apublikavanyja na staronkach vydańnia.
Pavodle jaho słoŭ, tradycyjna premii ŭručajuć 25 sakavika, u dzień abviaščeńnia Biełaruskaj Narodnaj Respubliki, adnak sioleta svoječasova heta zrabić nie ŭdałosia. «Siarod łaŭreataŭ premii niama mnohich vybitnych biełaruskich piśmieńnikaŭ, bo zhodna z pałažeńniem ab «Załatym apostrafie» na jaho naminujucca tolki tyja paety i prazaiki, čyja tvorčaść nie adznačana Dziaržaŭnaj premijaj Biełarusi», — skazaŭ B.Piatrovič. Jon ličyć, što taki padychod, a taksama ŭviadzieńnie naminacyi «Za najlepšy debiut» i vydańnie biblijatečki časopisa «Dziejasłoŭ» sadziejničajuć źjaŭleńniu novych imionaŭ u biełaruskaj litaratury.
Łaŭreataŭ premii «Załaty apostraf» pavinšavali staršynia SBP Aleś Paškievič, paet Leanid Drańko‑Majsiuk, bardy Eduard Akulin, Źmicier Vajciuškievič, Aleś Kamocki i Taćciana Biełanohaja.
