5 śniežnia navučeniec 10 kłasa siaredniaj škoły №1 h. Dokšycy Pavał Malužaniec byŭ vyklikany na hutarku da administracyi škoły ŭ asobie dyrektara Uładzimiera Arcimionka i namieśnika dyrektara pa vychavaŭčaj pracy Śviatłany Vialička. Padstavaj dla hutarki było pryncypovaje niežadańnie Paŭła ŭstupać u BRSM, jakoje vučań matyvuje niežadańniem być u arhanizacyi, siabry jakoj za savieckim časam hramili cerkvy i śpiłoŭvali kryžy.
Kaža Pavał Malužaniec: «Vyklikali pasiarod uroka, zaviali ŭ kabiniet dyrektara i pačali ŭdvaich mianie pierakonvać i zapałochvać prablemami z navučańniem. Ale ŭdałosia adstajać svaju pazicyju. Dumaju, zaraz budzie cisk z boku administracyi škoły. Raduje, što adnakłaśniki amal usie na maim baku – čakali mianie pad dźviaryma kabinieta dyrektara, pakul išła razmova».
Taksama ŭ toj ža dzień byŭ vyklikany da dyrektara nastaŭnik zamiežnaj movy Ŭładzimier Miadziucha, jaki na adnym z urokaŭ niehatyŭna vykazaŭsia pra BRSM. Sakratar Dokšyckaha rajonnaha kamiteta BRSM zapeŭniŭ, što BRSM nie maje dačynieńnia da dziejańniaŭ administracyi škoły i paabiacaŭ nahadać kiraŭnictvu škoły ab niedapuščalnaści dziejańniaŭ padobnaha kštałtu.
