Sabor biełaruskich śviatych
U Pietrapaŭłaŭskaj carkvie ŭ Minsku źjaviłasia novy abraz, na jakoj vyjaŭlenyja razam usie biełaruskija pravasłaŭnyja śviatyja. Tut i Eŭfrasińnia Połackaja, Kiryła Turaŭski, Apanas Bieraściejski (Filipovič), praviednaja Safija Słuckaja, pakutnik dziciatka Haŭryła Biełastocki, prapadobny Hienadź Mahiloŭski, Vilenskija pakutniki Antonij, Iaan i Jaŭstafij — usiaho 59 śviatych i pakutnikaŭ. Stvaryŭ abraz małady mastak Michaił Zubovič.
Darma što na terytoryi Biełarusi paasobnyja biełaruskija śviatyja zaŭsiody karystalisia vialikaj papularnaściu siarod pravasłaŭnych viernikaŭ, ale Sabor biełaruskich śviatych — źjava novaja.
Usio pačałosia ŭ 1984 hodzie paśla chadajnictva mitrapalita Fiłareta da maskoŭskaha patryjarcha ab stvareńni takoha saboru. Heta byŭ nieabchodny zachad pavodle tradycyj Rasiejskaj Pravasłaŭnaj carkvy. Nieŭzabavie dazvoł z Maskvy byŭ atrymany.
Pieršapačatkova sabor składaŭsia z 14 śviatych, ale ŭ 1990-ja adbyŭsia šerah kananizacyj.U biełaruskich haradach zazvyčaj visieli sabornyja ikony z vyjavami zbolšaha rasiejskich śviatych. Tolki samyja vybitnyja biełaruskija śviatyja, takija jak Eŭfrasińnia Połackaja, traplali na sabornyja ikony.
U 80-ja hady pačałosia stvareńnie ikonaŭ, tak by mović, z hrupavymi partretami biełaruskich śviatych. Pieršy padobny vobraz byŭ napisany dla damovaha chrama ŭ honar Usich Biełaruskich Śviatych, jaki raźmiaščajecca ŭ rezidencyi mitrapalita Fiłareta. Paśla padobnyja abrazy źjavilisia ŭ Horadni i Zasłaŭi. Byli stvoranyja sabornyja ikony i ŭ inšych biełaruskich haradach, ale
abraz u Pietra-Paŭłaŭskaj carkvie ŭ Miensku — najbolš poŭny pavodle kolkaści kananizavanych asobaŭ.Chiba na hetaj ikonie ŭžo nie staje troch asobaŭ, što byli dałučanyja da liku śviatych u samyja apošnija hady.
Taciana Matrunčyk, supracoŭnica vydavieckaha adździełu Bractva Vilenskich pakutnikaŭ, uvažaje instytut biełaruskich śviatych spravaj pilnaj dla duchoŭnaha žyćcia krainy. «Viedajecie, jany ž našyja najbližejšyja chadajniki pierad Hospadam, tak by mović, našy duchoŭnyja svajaki», — kaža Matrunčyk.
2009 hod abvieščany Biełaruskaj Pravasłaŭnaj carkvoj Hodam biełaruskich śviatych.Mała chto viedaje, što ŭ pravasłaŭnym kalendary jość navat śviatkavańnie Saboru, to bok Dzień biełaruskich śviatych, jaki adznačajecca ŭ 3-ju niadzielu paśla Piacidziesiatnicy (Siomuchi).
Varta dadać, što ŭ pieršuju niadzielu paśla Trojcy śviatkujuć Dzień Usich Śviatych, a ŭ druhuju – Dzień Usich Śviatych Ziamli Ruskaj. Dzień ža śviatoha Kiryły Turaŭskaha — heta 11 traŭnia, a 5 červienia – dzień Eŭfrasińni Połackaj, zastupnicy Biełarusi.
