"Mis Indyja", "Mis Śvietu" Ksienija Suchinava, "Mis Trynidad i Tabaha". Fota z tut.by
Biełaruska Volha Chižynkova nie trapiła ŭ paŭfinał. Pieramahła 21-hadovaja Ksienija Suchinava. Ale bolš za ŭsio zapomnilisia pošłaści i hreblivaść z vusnaŭ kamientataraŭ ANT.
Konkurs prajšoŭ u subotu ŭviečary ŭ Jochanesburhu (Paŭdniovaja Afryka).
2-je miesca ŭ pradstaŭnički Indyi Parvaci Amankutan, na 3-m -- «Mis Trynidad i Tobaha» Habryel Uołkat.
U finalnuju piaciorku taksama ŭvajšli "Mis Anhoła" Brydžyt duš Santuš i "Mis PAR" Tanse Kutzee.
21-hadovaja Ksienija Suchinava naradziłasia ŭ Nižniavartaŭsku. Vučycca ŭ Ciumienskim dziaržaŭnym naftahazavym univiersitecie. Zajmajecca mastackaj himnastykaj, płavańniem i bijatłonam. Viadoma, što pryncypova nie trymajecca dyjet.
U konkursu «Mis Śvietu – 2008» uziali ŭdzieł pradstaŭnicy bolš čym 100 krain.
Biełaruska Volha Chižynkova nie trapiła ŭ paŭfinał (15 najpryhažejšych).
***
Konkurs tranślavaŭsia ŭ žyvym efiry na kanale ANT.
Niepryjemna ŭraziŭ repartaž čatyroch kamientataraŭ-mužčynaŭ z hetaha kanału. Niejki uzor pošłaści, elemientaŭ rasizmu, ksienafobii, prosta hreblivaha staŭleńnia da ŭdzielnic.
Vychodzić u paŭfinał «Mis Ukrajina» viadučyja namiakajuć na toje, što Kijeŭ niedzie kamuści padmazaŭ, trapiła ŭ paŭfinał pradstaŭnička Charvatyi – adzin z kamientataraŭ kaža, «Byŭ ja sioleta ŭ Charvatyi, bačyŭ tych charvatak, što kazać, kali heta, maŭlaŭ, samaja pryhožaja».
Čornaskury viadučy sa sceny abviaściŭ, što ŭ paŭfinał vychodzić «Mis Anhoła» – viadučy ANT: «Nu tak, za kaho jašče hety pradstaŭnik PAR moža addać hołas?». Vychad u paŭfinał dziaŭčyny z Kazachstana vyklikaŭ niepadrobnaje ździŭleńnie: «A jana što tut robić?», na jašče adnu paŭfinalistku adreahavali nastupnym čynam: «Padobnaja dziaŭčyna – maja susiedka pa leśvičnaj placoŭki».
Adno dobra, što tranślacyja raspaŭsiudžvałasia tolki na Biełaruś, bo taki kamientar – hańba dla našaj krainy. U luboj jeŭrapiejskaj krainie takich by viadučych adrazu zvolnili za ksienafobiju, namioki na rasizm dy prosta nieprafiesijanalizm.
