14:37 Pa vynikach mitynhu była pryniataja rezalucyja. U joj prapanujecca źniać abmiežavańni na ŭvoz tavaraŭ z Rasii, dazvolić pradprymalnikam, niezaležna ad uzroŭniu svajactva, najmać piać čałaviek, a taksama stvaryć pry prezidencie śpieckamisiju dla vyrašeńnia prablem drobnych handlaroŭ.
Šumčanka čarhovy raz padkreśliŭ, što pradprymalniki nastrojeny miralubiva i na kanstruktyŭny dyjałoh z uładami, ale kali ŭłady nie prysłuchajucca da patrabavańniaŭ, to ŭ 2009 h. jany (IP) zdymajuć ź siabie usiakuju adkaznaść za budučyja akcyi.
Šumčanka vystupaŭ adzin i paśla pramovy skazaŭ, što mitynh skončany i paprasiŭ razyścisia.
Na trybunu prarvaŭsia Aleś Makajeŭ, jaki zapatrabavaŭ sabie słova, zaznačyŭšy: «Takimi patrabavańniami, jakija jość u rezalucyi, prablemy pradprymalnikaŭ nie vyrašacca!». Aleś Makajeŭ źviartajecca da prysutnych pa-biełarusku.
Šumčanka nastojvaje na tym, što mitynh skončany.
Makajeŭ usio ž uziaŭ słova. Jon skazaŭ, što kali patrabavańni nie buduć vykananyja, to ŭ studzieni buduć novyja akcyi pratestu.
Nastupnaja akcyja, skazaŭ A. Makajeŭ, kali patrabavańni nie buduć zadavolenyja, projdzie 12 studzienia (paniadziełak) na Kastryčnickaj płoščy biełaruskaj stalicy.
Vystupiŭ taksama pradprymalnik Anatol Źmitrovič sa Śvietłahorska, jaki skazaŭ, što łakalnymi źmienami ničoha nie vyrašyš, a treba damahacca pryniaćcia zakonu ad pradprymalnictvie na 5 hadoŭ.
Taksama źlohku pakrytykavali Šumčanku, jaki faktyčna nikomu nie źbiraŭsia davać słova.
14:30 Pačaŭsia mitynh. Biare ŭdzieł kala 2,5 tys. — 3 tys. čałaviek. Šumčanka vystupaje vielmi emacyjna. Pradprymalniki burna -- jak na stadyjonie ci kancercie - reahujuć na kožny skaz.
14:15 Hałava kałony dajšła da Banhałoru.
13:45 Hałava šeścia ŭžo dajšła vulicaj Surhanava da vulicy Jakuba Kołasa.
Iduć usie dosyć spakojna, praviły darožnaha ruchu nie parušajuć. Zbolšaha cicha, tolki raz-poraz hukajuć «Rabotu».
Videa Jarasłava Ściešyka
Ekśpierty zaznačajuć, što ludziej sabrałasia nie mieniej, čym na "Čarnobylskim šlachu-2008".
13:32 U šeści biare ŭdzieł kala 2 tys. čałaviek. Z Alesiem Taŭstykam zastalisia kala dvuch dziasiatkaŭ tych, chto maje namier iści da Administracyi prezidenta.
13:27 Pačałosia šeście ŭ bok płoščy, nazvanaj u honar horada-pabracima biełaruskaj stalicy.
Anatol Šumčanka skazaŭ, što nie varta pieratvarać akcyju ŭ palityčnuju, tamu varta pajści da parku Družbu narodaŭ.
«Nie miesca krasić čałavieka, a čałaviek - miesca», - skazaŭ jon.
Ściahoŭ amal niama, aproč adnaho, što trymaje Anatol Šumčanka: «Marš priedprinimatielej». Ludzi trymajuć u rukach asnoŭnym šyldački.
Taŭstyka praciahvaje zaklikać iści da Administracyi. Ale ź im salidaryzavalisia tolki kala dvuch dziasiatkaŭ čałaviek.
13:22 Aleś Taŭstyka kaža, što iści nie na sabačnik (park h.zv. Družby narodaŭ), a da Administracyi prezidenta, dzie i adstojvać svaje pravy.
Anatol Šumčanka paryruje, što raz akcyju arhanizoŭvaje «Pierśpiektyva», to jana i vyrašaje, iści na Banhałor ci nie.
Taŭstyku horača padtrymlivaje barysaŭski pradprymalnik Viktar Harbačoŭ i jašče niekalki paplečnikaŭ.
Pakul usio abychodzicca biez rukaprykładstva. Dva mužčyny ŭnušalnaha ciełaskładu, zhadanyja krychu raniej u suviazi z kanfliktam Šumčanki i Taŭstyki, niekudy dematerylizavalisia.
13:18 Ludziej značna paboleła. Užo niedzie pad 1 000.
Lohki skandał pamiž Taŭstykam i Šumčankam. Taŭstyku prosiać apuścić ściah «Ruchu za Svabodu» z nadpisam «Za svabodnaje pradprymalnictva».
Šumčanka Taŭstyku: «Ja ciabie prašu pa-charošamu».
Da Alesia Taŭstyki padyšli niejkija dva mužčyny.
13:11 Źjavilisia raściažki, usie na ruskaj movie: «V trudnyje vriemiena dla hosudarstva priedprinimatieli byli i budut nadiežnoj oporoj dla naroda», «Pierśpiektiva za priedprinimatielej», «Zadušiť tysiači, čtoby proćvietali jedinicy!», «Novyje usłovija dla IP - dostojnyj vkład v mirovoj krizis».
Šumčanka biare miehafon.
Siońnia, padkreśliŭ jon,
zastaŭsia tolki adzin čałaviek, jakomu mohuć pavieryć IP, — heta Alaksandr Łukašenka.
«My budziem vieryć tolki jamu i padpisanym im dakumientam», — zajaviŭ lider hramadskaha abjadnańnia.
Pavodle słoŭ Šumčanki, kali ŭ chutkim časie ŭrad nie zrobić nijakich krokaŭ, «ludzi vyjduć na stychijnyja akcyi». «Pradprymalniki buduć vychodzić nie na sankcyjanavanyja mitynhi, a da Doma ŭrada», — cytuje słovy lidera "Pierśpiektyvy" BiełaPAN.
13:07 A 13-j na placoŭcy kala prezidyuma Akademii navuk sabrałasia kala 250 čałaviek. Chałodna: minus 6 pavodle Celsija (kali ličyć pavodle škały Farenhiejta, to kudy ciaplej +20).
Pakul tolki dva ściahi Ruchu za Svabodu. Adzin ź ich trymaje Aleś Taŭstyka.
Amal usie ŭdzielniki trymajuć samarobnyja ściažki, dzie na biełym tle napisana «Priedprinimatieli Biełarusi».
Staršynia «Pierśpiektyvy» Anatol Šumčanka, Aleś Makajeŭ, z hramadskich dziejačoŭ pakul tolki Viačasłaŭ Siŭčyk. Usie žyva i dziełavita razdajuć interviju.
Kali kazać pra ŭzrostavy cenz: to amal niama moładzi i ludziej stałaha ŭzrostu. U asnoŭnym mužčyny hadoŭ 30-40. Jość i kamu bolej za 40. U asnoŭnym, «balzakaŭski ŭzrost», tak skazać.
***
Paśla płanujecca šeście pa vuličnych chodnikach u kirunku praśpiektu Niezaležnaści, vulicy Surhanava i płoščy Banhałor. Zatym u parku Družby narodaŭ adbudziecca mitynh.
