Fota z sajtu milinkevich.org
Z čaćviertaje sproby. Ruch za Svabodu staŭ pieršaj značnaj apazicyjnaj strukturaj, zarehistravanaj za apošnija 8 hadoŭ.
17 śniežnia Alaksandra Kavalca vyklikali ŭ Ministerstva justycyi, dzie jamu ŭručyli paśviedčańnie ab rehistracyi Ruchu za Svabodu. Heta była poŭnaja niečakanaść dla aktyvistaŭ ruchu, lideram jakoha źjaŭlajecca były kandydat u prezidenty Alaksandr Milinkievič. Ciapier aficyjnaja nazva Ruchu budzie hučać jak Pravaabaronča-aśvietnickaje hramadskaje abjadnańnie Ruch za Svabodu.
Dakumienty na rehistracyju prychilnikami Milinkieviča padavalisia ažno čatyry razy, ale Minjust uvieś čas znachodziŭ niejkija začepki, kab admović. Razam z tym, kiraŭnictva Ruchu nastojliva praciahvała hnuć svaju liniju. Kavalec zajaŭlaŭ, što dakumienty buduć padavacca da toj pary, pakul rehistracyja nie budzie atrymanaja.
Namieśnik staršyni Ruchu za Svabodu Juraś Hubarevič kaža: «Dakumienty byli padadzienyja biezdakornymi i farmalna admovy nie pavinna było być. Spadziajusia, što hety vypadak nie stanie adzinkavy i buduć zadavolenyja zajavy inšych demakratyčnych arhanizacyj, jakija padali dakumienty na rehistracyju».
Biełaruskija ŭłady praciahvajuć vykonvać patrabavańni Jeŭrasajuzu. Śledam za vyzvaleńniem palitviaźniaŭ i viartańniem u dziaržaŭnyja sistemy raspaŭsiudu dźviuch niezaležnych haziet, rehistracyju atrymała adna z najbolš šmatlikich palityčnych sił u krainie.
