Łukašenka viedaŭ što kazaŭ, kali vinšavaŭ elektarat z nadychodam ciažkoha hoda. Pakul narod lečyć hałavu, biełaruski rubiel patańnieŭ na 20,5%. Na 2 studzienia Nacbank ustalavaŭ novyja kursy: dołar — 2 650 Br, jeŭra — 3 703 Br. Nu jak, chutka prachodzić chmiel?
Takim čynam, čutki, što MVF patrabuje devalvacyi na 20%, materyjalizavalisia. Urad nie staŭ adsiakać chvost za niekalki razoŭ, a zrabiŭ ŭsio adnym macham. Pryčym momant vybrany pa-svojmu ŭdała: śviatočny marafon prytupić u suhramadzian vastryniu šoku.
Ja tolki što razmaŭlaŭ z absalutna ćviarozym :) ekanamistam Jarasłavam Ramančukom. Radykalny krok Nacbanka jon patłumačyŭ tym, što «vielmi ž chočacca atrymać dva z pałovaj miljardy ad MVF». Na dumku ekśpierta, «kali ŭrad nie źmienić makraekanamičnaj palityki, to ciaham hoda daviadziecca jašče dva-try razy rabić devalvacyju».
Zaraz pierad uradam staić składanaja zadača nie dapuścić uciokaŭ hrošaj z rublovych depazitaŭ. Imaviernaść taho, što ŭzrovień žyćcia biełarusaŭ sioleta ŭpadzie — 95%, ličyć Ramančuk.
«Naša ekanomika ŭvachodzić u fazu recesii. Pakazčyki «piacihodki» vykanać niemahčyma. Patrabujecca źmiena ekanamičnaha kursu. My staim na pačatku biełaruskaj pierabudovy», — reziumavaŭ moj surazmoŭca.
Jon nie vieryć, što ciapierašniaja kamanda zdolnaja da paśladoŭnych reformaŭ, ale ž i inšaha vyjścia niama. Niezaležnyja ekanamisty sami kazali, što devalvacyja niepaźbiežnaja i što ŭ jaje svaje plusy: lahčej stanovicca eksparcioram, možna vypravić dysbałans zamiežnaha handlu i h.d.
Razam z tym, vidavočna, što
heta aznačaje poŭnaje fijaska anachraničnaj «biełaruskaj madeli», jakuju aficyjny lider iniercyjna raschvalvaŭ u navahodnim zvarocie, peŭna ž viedajučy ŭžo, jaki padarunačak čakaje nasielnictva nazaŭtra.
Ułada ŭžo nie zmoža vykonvać u abiacanym abjomie toj sacyjalny kantrakt, jaki datrymlivaŭsia apošnija hady i za jaki šarahovaja masa biez asablivaha škadavańnia achviaravała ładnym kavałkam pravoŭ dy svabod.
Inšaje pytańnie, jakoj budzie reakcyja. Vielmi imavierna, što biełarusy nie pabiahuć na płošču, a tolki hłybiej urastuć u svaje sotki, kab nazapasić bulby na čorny dzień.
Tak ci inačaj, raspłačvacca za biazdarnaść i retrahradstva ŭładaŭ budzie prosty lud.
