Jon sam sabie napraročyŭ. Paŭtara hady tamu, prezientujučy novaha načalnika Minščyny Krupca, Łukašenka raptam prahavaryŭsia (zadnim dniom, kali adpuściŭ strach) pra adno łatentnaje nastupstva hazavaj vajny ŭzimku 2007 hoda. A mienavita: vyklikanaja joju panika (pabiehli chapać hrošy z depazitaŭ) pryviała da taho, što ZVR Biełarusi skaracilisia na tracinu.
Dyk voś, tady, u červieni pazaletaś, Łukašenka skazaŭ:
strašnaja nie apazicyja; kryj boža, kab nie było destabilizacyi finansavaha rynku, kab nie spaścih defołt. Zaraz hetaja strašyłka materyjalizujecca.
Mnohija ŭmomant praćvierazieli i, zabyŭšysia na niedajedzienuju sałatu aliŭje, kinulisia šturmavać abmieńniki dy siekcyi impartnych tavaraŭ. Pradprymalniki na rynkach mianiajuć ceńniki. Začynilisia na pieraacenku i niekatoryja kramy. U internet-mahazinach — voś jana, pieravaha virtualnaha handlu! — usio ŭžo pieraličana pa novym kursie.
Siońnia ja pačuŭ ad prostaj žančyny (pracuje prybiralščycaj u paliklinicy): mianie, maŭlaŭ, skoki valutnych kursaŭ mała chvalujuć, bo tych dołaraŭ, ličy, u rukach nie trymała. Niejak pražyviom!
Prosty lud, adnak, adčuje nastupstvy ŭžo praź ličanyja dni: chvala padaražańnia dojdzie da prazaičnaha naboru tavaraŭ štodzionnaha popytu. Inflacyju padchlisnuć jak čysta ekanamičnyja, tak, badaj, i psichałahičnyja čyńniki. Naprykład, «kinutyja» ŭładami ipešniki, što pierad novym hodam zakuplali tavar za valutu, a vyručku atrymali ŭ rublach-fancikach, mižvoli musiać brać revanš na niebarakach-pakupnikach.
Ekanamist Leanid Zaika prahnazuje, što
ŭžo cieraź dziesiać dzion kurs dołara siahnie pad try tysiačy. Uvohule ž jon pradrakaje sioleta inflacyju 30-35%
i reziumuje: paratunkam dla ajčynnaha načalstva moža stać chiba pierachod na rasijski rubiel.
Na fonie vybuchu kamientaroŭ finansava-ekanamičnaha kštałtu, jak ni dziŭna, mała chto razvažaje pra palityčnyja nastupstvy.
Tytulnaja apazicyja šmat hadoŭ pieściła pryhožuju schiemu: hrymnie kryzis, narod vyjdzie na vulicy, my — napieradzie na biełym kani, ułada padaje da našych noh. Štości padkazvaje: schiema niepracoŭnaja.
Nie budziem kidać kamiani ŭ letarhična zasnułuju apazicyju. Chiba što adna remarka: voś litaralna ŭ hetyja dni varta było b, adsunuŭšy ŭbok kielichi z šampanskim, źbirać svaje palitrady dy pisać pałymianyja adozvy, bo režym «padstaviŭsia» jak nikoli. A to revalucyjnaja makułatura raskidajecca ŭ paštovyja skryni «pad kampaniju» i pieravažna niečytanaja špurlajecca abyvatalem prosta pad nohi ŭ padjezdach.
Narod, jak padajecca, taksama nie razhonicca, vyjšaŭšy z ałkaholnaha marafonu, adrazu ž ładzić revalucyju, a najpierš zakłapocicca prablemaj samavyžyvańnia.
Voś užo, bač, łamanulisia skuplać rozny tavar, pakul jon pa starych cenach. Na dumku palitołaha Valera Karbaleviča, pakul što pratestavyja nastroi vyljucca pieravažna ŭ «łaskavyja» vyrazy na adras ułady, jakaja «kinuła».
Moj surazmoŭca zaŭvažaje taksama: my nie viedajem dakładna patrabavańniaŭ MVF. Kali sapraŭdy jon ultymatyŭna patrabuje spynić finansavuju dziaržpadtrymku monstraŭ sacyjalistyčnaj industryi, pierakryžavanaje subsidavańnie kamunałki i h.d., to možna čakać vielmi surovych u sacyjalnym płanie nastupstvaŭ. Ujavicie sabie, što za dvuchpakajoŭku zimoj daviadziecca płacić tysiačaŭ 400-500 našych fancikaŭ (zaraz, nahadaju, nasielnictva kampiensuje tolki 30,7% koštu žyllova-kamunalnych pasłuh)…
Zvyš taho, zaznačaje Karbalevič,
biełarusy, adrozna ad rasijcaŭ dy ukraincaŭ, nie prachodzili ŭ 90-ja hady cieraz vyprabavańnie šmatmiesiačnymi niavypłatami zarobkaŭ, piensij. I jašče niuans: kryzis padkasiŭ našu krainu na etapie spažyvieckaha bumu, kali narod uvajšoŭ u smak pryhožaha žyćcia.
Tamu kantrasny chałodny duš devalvacyi i jaje nastupstvaŭ, naturalna, mocna udaryć pa imidžy ułady, adznačaje Karbalevič.
Darečy, tut jakraz padkinuŭ nizku śviežaj analityki NISEPD. Apytańnie ładziłasia, praŭda, jašče ŭ śniežni. Adnak užo tady 64,3% — amal što dźvie traciny — adkazali stanoŭča na pytańnie «Ci ličycie vy, što ŭ Biełarusi pačynajecca ekanamičny kryzis?» (pry hetym — cikavy štrych — tolki 39,4% ličyli devalvacyju «vielmi imaviernaj»). «Śpikiravali», pavodle spravazdačy NISEPD, indeksy materyjalnaha stanovišča i spadzievaŭ.
Ale, padkreślivajuć sacyjołahi, hetyja čyńniki nie abvalili pakazčykaŭ papularnaści «ŭsienarodna abranaha».
Elektaralny rejtynh Łukašenki letaś u vieraśni byŭ 42,5%, u śniežni — 40,2%; rejtynh davieru prezidentu za toj ža pieryjad źmienšyŭsia taksama tolki ŭ miežach statystyčnaj pamyłki — ad 51,9% da 48,4%.
Stała ŭžo štampam nazyvać Łukašenkaŭ rejtynh tefłonavym. U śviežaj spravazdačy sacyjołahi NISEPD mietafaryčna nazvali jaho «stojkim ałavianym sałdacikam».
Cikava, što pakaža nastupnaje apytańnie? Ci siahnie tempieratura hramadskaha abureńnia da toj rysy, što raspłavić mietał rejtynhu? Uładnaja viarchoŭka, kab advieści hnieŭ, zaraz dziaŭbie, što kryzis — «nie naš», va ŭsim vinavaty hniły karumpavany Zachad.
Zrešty, Łukašenkaŭ rejtynh viedaŭ i zusim kiepskija časy. Absalutny minimum byŭ, zdajecca, uviesnu 2003 hoda — 26,2%. Tady nazirałasia stahnacyja dachodaŭ na fonie vysokaj inflacyi, rezkaha rostu kamunalnych taryfaŭ — paśla taho, jak pad vybary-2001 štučna nahnali kultavyja 100 $.
Ale nieŭzabavie paśla hetaha «histaryčnaha minimumu» pašenciła ŭźbicca na schiemu «naftavaha afšoru», praściej kažučy — na rasijskuju durnicu.
Pierad vybarami-2010 taksama moža pačacca paślakryzisny rost, nie vyklučaje Valer Karbalevič. Chaj sabie maleńki, ale na śviežyja stanoŭčyja zruchi narod reahuje macniej, čym na niepryjemny «letašni śnieh».
Tak što «stojki ałaviany sałdacik» jašče moža akryjać.
