Prezidencki sajt paviedamiŭ, što novaśpiečanaj pieršaj namieśnicy sp. Makieja «daručana ŭziać pad svoj kantrol usiu ideałahičnuju rabotu ŭ krainie, jakaja joj dobra viadoma» (praca ci kraina? :)
Dajučy nakaz Natalli Piatkievič, Łukašenka mižvoli krasamoŭna acharaktaryzavaŭ stan hetaj samaj pracy: «Nijakaha farmalizmu, nijakaj bałbatni, jak heta byvaje na adzinych dniach infarmavańnia. Heta horš, čym naohuł ničoha nie rabić!».
Zrazumieła, što vysokaje načalstva turbujuć nie kanceptualnyja šukańni. Z prakisłaha viniehretu pad markaj dziaržaŭnaj ideałohii ničoha ludskaha nie zrobiš. Vidać, nie ŭ hałavie i biełarusizacyja (a miž tym heta było b darečy i ŭładzie).
Karaciej, zadačy bačacca najpierš ŭ tym, kab niejak vykručvacca pierad nasielnictvam ŭ situacyi kryzisu dy stvarać dla Zachadu karcinku hramadskaj adlihi, bolšaj talerantnaści da inšadumstva.
Tym časam apieracyju «Devalvacyja» prapahandyscki aparat biazdarna praspaŭ. U pieršyja dni novaha hoda dziaržaŭnyja miedyi prosta tupa maŭčali. A potym pačali traktavać balučuju temu tak, što lepiej by ŭžo, musić, sapraŭdy maŭčali.
Darečy, Piatkievič zojmiecca i miedyjnaj śfieraj. Łukašenka źviarnuŭ ŭvahu na toje, što "tut namieciŭsia niejki spad, kali nie skazać zastoj u asobnych ŚMI". (Moładź kaža trapniej: adstoj :)
Testam ža ŭ vačach Jeŭrasajuza dla novaj ideałahičnaj načalnicy (jurystki, darečy) stanie, badaj, los (ci, kali chočacie, stupień brutalnaści pry ŭžyvańni) novaha zakona ab ŚMI. I asabliva — hipatetyčnaj pakul što pastanovy pra interniet.
Pryniaty letaś miedyjny zakon nabyvaje moc 8 lutaha. Tam, nahadaju, jość pałažeńnie, što «paradak raspaŭsiudu pradukcyi srodkaŭ masavaj infarmacyi, jakija raspaŭsiudžvajucca praz hłabalnaje kampjutarnaje sieciva Interniet, vyznačajecca Savietam Ministraŭ Respubliki Biełaruś».
Karaciej, da 8 lutaha naviersie musiać vyrašyć, ci prymać tuju pastanovu nakont sieciva, a kali prymać, to ŭ jakim vyhladzie.
U listapadzie letaś na znakamitym (razhuł demakratyi! :) kruhłym stale «Interniet-ŚMI: vykliki XXI stahodździa» ja akurat nazalaŭ hetymi pytańniami pamočniku prezidenta Usievaładu Jančeŭskamu. Toj urešcie zajaviŭ: va ŭładzie jašče padumajuć, ci patrebien taki narmatyŭny akt. Jon taksama daŭ zrazumieć: kampramisnym varyjantam moža stać dobraachvotny paradak rehistracyi interniet-vydańniaŭ.
Ale i tut imaviernyja pastki. Naprykład, mohuć abkłaści niezarehistravanyja resursy čyrvonymi ściažkami (kštałtu: nielha zajmacca rekłamnaj dziejnaściu). I tady praź nie chaču daviadziecca piłavać pa dakumient u Mininfarm!
Uvohule ž novy zakon ab ŚMI bahaty na voŭčyja jamy: tatalnaja pierarehistracyja papiarovaj presy, drakonaŭski paradak akredytacyi i h.d.
Letaś Natalla Piatkievič, darečy, aktyŭna łabiravała hety zakon. I ŭ paradku zaspakajeńnia «niačesnych» pisak taksama zaŭvažyła: pastanova pra interniet, mahčyma, źjavicca tolki ŭ tym vypadku, «kali ŭźniknie vostraja patreba».
Naŭrad ci sam zakon adkruciać nazad. Chacia — daru ideju :) — vo heta byŭ by mocny krok pierad brusielskim zalikam (u krasaviku ES budzie padvodzić vyniki paŭhadavoha prypynieńnia vizavych sankcyj)!Bolej imaviernyja, adnak, drobnyja sastupki napakaz Jeŭropie, peŭnaja taktyčnaja pabłažlivaść da «niačesnych» ŚMI.
U nas ža ŭłada dziejničaje «pa paniaćciach». Zakon što dyšal. Chiba adsutnaść zakona pra interniet pieraškodziła pasadzić Andreja Klimava za publikacyju ŭ siecivie? Ciškom pasadzili, potym hetak ža źnianacku vypuścili, kali pačalisia hulni ź Jeŭropaj. A pa jakim, skažycie, zakonie vykidali niepažadanuju presu z katałohaŭ i sajuzdrukaŭ? Jak levaja naha zachoča...
Dušyłaŭku ŭ nas mohuć zładzić, paviercie, adnolkava efiektyŭna jak pry novym, tak i pry starym zakonie ab ŚMI. Usio vyznačaje palityčnaja metazhodnaść.
Ciapier — trend adlihi. Tak što, mahčyma, nie buduć rezać pry pierarehistracyi, puściać u katałohi dy kijoski jašče žmieńku haziet. Mo' navat voŭk u lesie zdochnie — i «Biełsat» u nas lehalizujuć :)
Ale varta sapsavacca dyjałohu z Brusielem — i ŭvieś hety nibyta libieralizm budzie skamiečany žaleznaj rukoj.