Ministr unutranych spravaŭ Uładzimir Navumaŭ padčas pres‑kanfierencyi ŭ čaćvier zakranuŭ temu niekatorych hučnych kryminalnych spravaŭ.
Najpierš jon paviedaŭ, što amal skončanaje rasśledavańnie kryminalnaj spravy suprać byłoha dyrektara rynku «Ždanovičy» Jaŭhiena Šyhałava. Nahadajem, što Šyhałaŭ byŭ zatrymany ŭ krasaviku i suprać jaho była zaviedzienaja kryminalnaja sprava pa artykule 424 KK «Złoŭžyvańnie słužbovymi paŭnamoctvami».
Potym biźniesmiena vypuskali pad zakład u 5 miljonaŭ dalaraŭ na apieracyju ŭ Łondan. Ciapier pavodle słovaŭ Navumava, Šyhałaŭ źviarnuŭsia z prośbaj ab pamiłavańni asabista da Alaksandra Łukašenki. MUS taksama budzie chadajničać da kiraŭnika krainy z prośbaj ab pamiłavańni.
Sprava ŭ tym, što Šyhałaŭ całkam pakryŭ uron pryniesieny dziaržavie. Heta 85 miljardaŭ rubloŭ, albo 31 miljon dalaraŭ.
Taksama ministr paćvierdziŭ infarmacyju ab aryšcie skandalna viadomaha navapołackaha biźniesmiena Ŭładzimira Zacharava.
Suprać uładalnika handlovych centraŭ «Stralecki rynak», «Jeŭraluks» i «Kapitał» zaviedzienaja kryminalnaja sprava pa artykule «Strachavoje machlarstva».
Ciapier Zacharaŭ znachodzicca pad vartaj. Niadaŭna byŭ aryštavany i supracoŭnik MUS, jaki dapamahaŭ biźniesmienu ŭ złačynstvach.
Fota Julii Daraškievič
