Žychar Minskaj vobłaści 1981 hoda naradžeńnia traŭmavany 16 studzienia ŭ staličnym mietro.
Jak paviedamiŭ BiełaPAN staršy inśpiektar hrupy infarmacyi i hramadskich suviaziej UUS pa achovie mietrapalitena Arciom Haraševič, u 8.02 na stancyi pieršaj linii «Maskoŭskaja» pad elektraciahnik, što prybyvaŭ z boku stancyi «Uručča», upaŭ małady čałaviek. Mašynist vykanaŭ ekstrannaje tarmažeńnie, tym nie mienš sastaŭ prajšoŭ nad chłopcam, jaki ŭ vyniku apynuŭsia pad sčepkaj pamiž druhim i trecim vahonami.
Pakul supracoŭnik milicyi arhanizoŭvaŭ evakuacyju pasažyraŭ, zakryćcio stancyi i zajmaŭsia pošukam śviedak, mašynistu ŭdałosia vyciahnuć paciarpiełaha. Jon byŭ u stanie šoku i nie moh razmaŭlać. Bryhada chutkaj miedycynskaj dapamohi, jakaja prybyła na miesca zdareńnia, kanstatavała ŭ maładoha čałavieka šmatlikija paškodžańni tvaru, jak miarkujecca, čerapna‑mazhavuju traŭmu. Jon špitalizavany.
Ruch elektraciahnikoŭ byŭ adnoŭleny ŭ 8.07.
Pryčyna padzieńnia maładoha čałavieka na rejki vyśviatlajecca.
