Dźvie sotni aktyvistaŭ Sajuzu palakaŭ sabralisia kala Polskaha domu,
kab patrabavać svabody dla svajoj arhanizacyi.
Vyjšaŭ da ludziej Juzaf Łučnik -
kiraŭnik łukašenkaŭskaha Sajuzu palakaŭ i ź pierapudu zahavaryŭ pa-rasiejsku.
Nie žucim ziemi, skond naš rud!...
Dzie ludzi, tam i ptuški.
Bolš za 200 čałaviek sabrałasia kala Polskaha domu, kab vykazać padtrymku Anžalicy Borys i niepadkantrolnamu Sajuzu palakaŭ, čym vyklikali piarepałach va ŭładaŭ.
Paśla vizitu ŭ Administracyju prezidenta, što adbyŭsia 10 studzienia, Juzaf Łučnik, staršynia stvoranaha ŭładami Sajuzu palakaŭ, 15 studzienia dasłaŭ zaprašeńnie dla staršyni niepadkantrlnaha Sajuzu palakaŭ Anžaliki Borys, kab taja pryjšła na pasiedžańnie Hałoŭnaje Rady aficyjnaha Sajuzu
Zaprašeńnie było napisana na polskaj movie, na aficyjnym błanku SPB, ale z arfahrafičnymi i stylovymi pamyłkami.
Vieści niejkija pieramovy z Łučnikam staršynia SPB nie ŭpaŭnavažanaja svajoj arhanizacyjaj. Ale lidery palakaŭ vyrašyli skarystać z zaprašeńnia, kab parazmaŭlać ź ludźmi, jakija zajmajuć siadzibu SPB.
Za adzin dzień jany raspaŭsiudzili infarmacyju miž svaimi, i 17 studzienia bolš za 200 siabroŭ SPB sabrałasia la siadziby arhanizacyi. Sustreŭ ich śpiecnaz, milicyja, KHB i kamiery dziaržaŭnych telekanałaŭ...
Vyjšaŭ da ludziej Juzaf Łučnik i, źbity z pantałyku, pačaŭ havaryć pa-rasiejsku... Jaho vyśvistali. Potym ludzi patrabavali, kab da ich vyjšaŭ Leanid Hulaka, upaŭnavažany pa spravach relihij i nacyjanalnaściaŭ Savieta Ministraŭ, jaki taksama znachodziŭsia ŭ Polskim domie.
- Hulaka, vychodi k polakam, - skandavali ludzi.
Toj nie advažyŭsia vyjści.
Takim čynam, pasiedžańnie rady aficyjnaha Sajuzu palakaŭ, jakaja mieła pryniać rašeńnie ab praviadzieńni čarhovaha źjezdu hramadskaj arhanizacyi, iznoŭ prajšło biez apanientaŭ.
