Žyćcio prymusiła realizoŭvać hetuju ideju tych, chto jaje tarmaziŭ.
U dzień inaŭhuracyi Abamy i adnaŭleńnia pastavak rasijskaha hazu ŭ Jeŭropu ŭ Čarnihavie sustrelisia kiraŭniki Biełarusi i Ŭkrainy Alaksandr Łukašenka i Viktar Juščanka. Heta byŭ vyrazny palityčny sihnał Zachadu i Ŭschodu. Sihnał padvojny: ni adzin ni druhi nie pryniali zaprašeńnia Miadźviedzieva i nie pajechali ŭ Maskvu na hazavy samit u minułuju subotu.
Biełaruska‑ŭkrainskaja sustreča ŭ viarchach doŭhi čas adkładałasia, kab narešcie adbycca ŭ momant najbolšaha abvastreńnia rasijska‑ŭkrainskich i paciapleńnia biełaruska‑ieŭrapiejskich adnosinaŭ.
Na pačatku čarnihaŭskaj sustrečy
Łukašenka ŭ prysutnaści žurnalistaŭ nahadaŭ ab prapanovie prezydenta Ŭkrainy stvaryć kalidor Čornaje mora — Bałtyjskaje mora. «My hatovyja pracavać z vami i z krainami Bałtyi ŭ hetym kirunku»,— skazaŭ jon.
Idei, vyłučanyja jašče na pačatku XX stahodździa biełaruskim palitykam Antonam Łuckievičam i adrodžanyja ŭ 1990‑ch, hruntujucca na razumieńni supolnych intaresaŭ dziaržavaŭ, raźmieščanych miž Čornym i Bałtyjskim moram. Za hety čas źmianiłasia struktura ekanomiki, ale nie hieapalityčnaja realnaść. Na ŭschodzie — Rasija sa svaimi intaresami, a enierhietyčnuju biaśpieku možna harantavać tolki ŭraŭnavažvańniem patokaŭ uschod‑zachad novymi — z poŭdnia na poŭnač.
Biełaruś — źviano va ŭschodniejeŭrapiejskim łancuhu, bieź jakoha Bałta‑Čarnamorskaja voś nie budzie poŭnaj.
Jakija kankretnyja formy moža mieć supraca Ŭkrainy i Biełarusi siońnia?
Pa słovach Juščanki,
u Čarnihavie była dasiahnutaja damoŭlenaść ab adnaŭleńni ekspartu ŭkrainskaj elektraenierhii ŭ Biełaruś i praz našu krainu ŭ Bałtyju,dzie paśla zakryćcia Ihnalinskaje AES budzie deficyt elektryčnaści. Realizacyju hetaha prajektu 15 studzienia ŭ Homieli abmiarkoŭvali vice‑premjery biełaruskaha i ŭkrainskaha ŭradaŭ Uładzimir Siamaška i Alaksandr Turčynaŭ. Jany supravadžali prezidentaŭ i ŭ Čarnihavie ŭ jakaści kiraŭnikoŭ supolnaj mižuradavaj kamisii pa handlova‑ekanamičnaj supracy.
Juščanka i Łukašenka damovilisia ab arhanizacyi trochbakovaje sustrečy ministraŭ zamiežnych spravaŭ Litvy, Biełarusi i Ŭkrainyŭ Litvie, kab padrychtavać adpaviednyja prajekty rašeńniaŭ.
Baki abmierkavali taksama inšyja inicyjatyvy, cikavyja dla dźviuch krainaŭ, a taksama Polščy i Bałtyi, u tym liku transpartny kalidor «Vikinh», jaki maje złučyć rehijon ad Skandynavii da Turcyi.
Nastupny punkt supadzieńnia intaresaŭ – hazavaja śfiera. U minułyja hady «Hazpromu» ŭdavałasia canoj źnižak efiektyŭna błakavać kaardynacyju dziejańniaŭ Ukrainy i Biełarusi. Havoračy pra kanflikt hetaha hodu, Juščanka padkreśliŭ, što «ŭžo nikoli nie budzie hazavaja palityka takoj, jakoj jana była da 1 studzienia 2009 hodu. Vyjduć usie z navukaj: Ukraina, Biełaruś, Rasija, Jeŭrapiejski Sajuz. My bolš takimi nie budziem: bieskłapotnymi, davierlivymi».
Z časam Ukraina i Biełaruś mahli b vybudavać supolny maršrut dla tranzitu nafty j hazu z zony Kaśpiju.
Łukašenka padkreśliŭ, što prajekt naftapravodu «Adesa‑Brody» nie straciŭ svajoj aktualnaści dla Biełarusi.«My možam zabiaśpiečvać praz našu transpartnuju sistemu naftaj dziaržavy Bałtyi, Polšču», — skazaŭ A.Łukašenka. Jon ličyć, što ŭ vypadku realizacyi prajektu budzie vyhadna pierapracoŭvać kaśpijskuju naftu na biełaruskich NPZ.
Dźvie krainy ŭzajemadapaŭnialnyja i ŭ niekatorych inšych śfierach.
Lidery Biełarusi i Ŭkrainy majuć rozny palityčny radavod. Adzin stvaryŭ aŭtakratyju i vykazvaŭ namier kiravać joju nieabmiežavany čas. Druhi pryjšoŭ da ŭłady ŭ vyniku mirnaje revalucyi i, miarkujučy pa ŭsim, paśla skančeńnia pieršaha ž terminu svaich paŭnamoctvaŭ, nastupnaj zimoj, pakinie svaju pasadu.
Na tvary adnaho zastalisia šnary ad atručvańnia dyjaksinam, jaki vyrablajecca ŭ rasijskich łabaratoryjach. Druhi 15 hadoŭ kiravaŭ, zadobryvajučy nasielnictva za košt rasijskich datacyj. Adnak złabadzionnyja ekanamičnyja patreby prymušajuć ich razmaŭlać.
«My čakajem vas u Minsku ŭ luby čas z pracoŭnym ci aficyjnym vizitam. Našy ludzi taksama ź cikavaściu čakajuć vašaha pryjezdu», — cytujuć Łukašenku žurnalisty.
Na šlachu stratehičnaha supracoŭnictva ŭ Mižmorji staić jašče istotnaja pieraškoda – roźnica palityčnych sistemaŭ.Usie krainy Bałta‑Čarnamorskaje zony – demakratyčnyja, akramia Biełarusi. Łukašenku ŭžo 10 hadoŭ nie zaprašali na mižnarodnyja sustrečy kiraŭnikoŭ krainaŭ Centralnaj i Ŭschodniaj Jeŭropy.
Prykład Jeŭrasajuzu pakazvaje, što efiektyŭna supracoŭničać mohuć tolki krainy adnaho ładu, pajadnanyja blizkaściu palityčnych kulturaŭ. Tamu amal čatyrochhadzinnaja havorka ŭ Čarnihavie nie mahła nie vychodzić za ramki ekanomiki. Choć pieramovy adbyvalisia ŭ farmacie sam‑nasam i pra ich detali ničoha nie viadoma, paśla sustrečy
Łukašenka vykazaŭ udziačnaść Juščanku za «kałasalnuju pastajannuju padtrymku» na ŭsich uzroŭniach kamunikacyi ź jeŭrapiejskimi dy amierykanskimi partniorami,dziakujučy čamu ŭdałosia «naładzić dyjałoh miž Biełaruśsiu i Zachadam».
