Uzbrojeny nažom mužčyna napaŭ na jaśli ŭ haradku Dendermonde, što za 30 km na paŭnočny zachad ab Brusela. Zahinuli troje, u tym liku žančyna i dvoje maleńkich dzietak va ŭzroście da troch hadoŭ.
Ranieńni atrymali jašče 13 čałaviek, niekatoryja ź ich znachodziacca ŭ haradskich balnicach u ciažkim stanie.
Pavodle niekatorych źviestak, siarod paciarpiełych – troje supracoŭnikaŭ jaślaŭ, jakija sprabavali abaranić dziaciej.
U balnicu dastaŭlena 10 dziaciej sa "šmatlikimi ranieńniami pa ŭsim ciele".
Paviedamlajecca, što heta byŭ mužčyna, tvar jakoha byŭ pafarbavany ŭ bieły koler, a vočy – u čorny, pahrukaŭ u dźviery jaślaŭ, dzie ŭ toj momant znachodzilisia 18 dzietak. Heta było 10 hadzin ranicy piatnicy.
Jon skazaŭ, što jamu treba zadać niejkaje pytańnie, a potym uvarvaŭsia ŭ pamiaškańnie i pačaŭ kidacca na dziaciej z nažom. Pieršymi achviarami stali troje maleńkich dzietak.
Potym hety "čałaviek" uźniaŭsia paviercham vyšej, dzie praciahnuŭ bić dziaciej nažom.
Vychavacielki sprabavali zakryć dziaciej ułasnymi ciełami. Supracoŭniki sadka kažuć, što napadnik im nieviadomy.
Paśla napadu mužčyna sprabavaŭ schavacca na rovary, ale praź niekatory čas byŭ zatrymany palicyjaj u supiermarkiecie. Padčas zatrymańnia jon byŭ paranieny.
Horad Dendermonde ŭ šoku
"My ŭražanyja hetym vypadkam. Zaraz našyja dumki – z rodnymi i blizkimi dziaciej i supracoŭnikaŭ jaślaŭ, - skazaŭ ministr unutranych spraŭ Bielhii Hida de Padt na pres-kanfierencyi. – Mnohija baćki znachodziacca ŭ stanie šoku".
Napadnik nie byŭ znajomy supracoŭnikam jaślaŭ, miarkujecca, što jon byŭ pacyjentam adnoj ź miascovych psichijatryčnych klinik.
Stała viadoma imia hetaha čałavieka.Heta 20-hadovy Kim D. (proźvišča nie paviedamlajecca). Jon byŭ pryznany absalutna narmalnym, kali kaniečnie słova narmalny tut pasuje.
