14 lutaha ŭ Vilni projdzie sustreča ministraŭ zamiežnych spraŭ Biełarusi, Litvy i Ukrainy, paviedamili ŭ pres‑słužbie MZS Litvy.
Paradak dnia sustrečy budzie ŭdakładnieny paźniej, zaznačyli ŭ litoŭskim źniešniepalityčnym viedamstvie.
U pres‑słužbie MZS Biełarusi nie zmahli paćvierdzić infarmacyju ab udziele ŭ sustrečy biełaruskaha ministra, spasłaŭšysia na toje, što «kamientujuć tolki najbližejšyja padziei».
Miž tym, pavodle infarmacyi biełaruskaha palityčnaha analityka Ramana Jakaŭleŭskaha, asnoŭnaj temaj sustrečy stanuć mahčymaści supracoŭnictva troch krain u ramkach novaj palityki Uschodniaha partniorstva Jeŭrasajuza. Ekśpiert skazaŭ, što «abmiarkoŭvacca budzie vialikaja kolkaść źniešniepalityčnych tem, a taksama prajekt pastavak enierhii z Ukrainy pa Biełarusi ŭ krainy Bałtyi».
«Polskaja dypłamatyja sastupaje Vilni ŭ dynamicy i vynikach raźvićcia adnosinaŭ ź Minskam», — zajaviŭ R.Jakaŭleŭski, kamientujučy adsutnaść na sustrečy kiraŭnikoŭ MZS Biełarusi, Litvy i Ukrainy pradstaŭnika Polščy, adnoj z krain, što inicyjavali palityku Uschodniaha partniorstva.
Palityka Uschodniaha partniorstva praduhledžvaje pašyreńnie palityčnaha ŭzajemadziejańnia i ekanamičnaj intehracyi z šaściu postsavieckimi krainami: Armienijaj, Azierbajdžanam, Biełaruśsiu, Hruzijaj, Małdovaj, Ukrainaj.
2 lutaha ŭ intervju jeŭrapiejskamu telekanału navin «Jeŭrańjus» Alaksandr Łukašenka pryvitaŭ Uschodniaje partniorstva jak «prahmatyčny, razumny i svoječasovy krok ES», «pazityŭny krok Jeŭrasajuza ŭ adnosinach da svaich susiedziaŭ».
