U Minsku adbyŭsia kruhły stoł z udziełam pradstaŭnikoŭ łukašenkaŭskaha i niedziaržaŭnaha miedyjasiektaru - siarod ich byli Zimoŭski, Litvina, Siaredzič, Jakubovič, - a taksama Piatkievič i jeŭrapiejskich dypłamataŭ.
«Nivodnamu srodku masavaj infarmacyi ŭ Biełarusi nie było admoŭlena ŭ rehistracyi», zajaviła namieśnica ministra infarmacyi Biełarusi Lilija Ananič na kruhłym stale «Zakanadaŭstva ab ŚMI jak faktar raźvićcia nacyjanalnaj infarmacyjnaj prastory», što prajšoŭ 4 lutaha ŭ Nacyjanalnaj biblijatecy z udziełam pradstaŭnikoŭ łukašenkaŭskaha i niedziaržaŭnaha miedyjasiektaru. U takim duchu išła havorka na hetaj sustrečy — adnym z redkich spatkańniaŭ łukašenkaŭcaŭ z pradstaŭnikami niezaležnaha hramadstva.
Pavieł Jakubovič, hałoŭny redaktar haziety «Sovietskaja Biełoruśsija» i adnačasova novapryznačany kiraŭnik Hramadskaj kaardynacyjnaj rady pa ŚMI vystupiŭ z rezkaj krytykaj niezaležnych ŚMI za toje, što jany nie dajuć procilehłaha punktu hledžańnia i abvinavaciŭ apazicyjnych palitykaŭ, što tyja, zmahajučysia za ŭładu, vykapali prorvu miž adnymi ŚMI i druhimi.
Namieśnica kiraŭnicy Administracyi prezidenta Natalla
Piatkievič patłumačyła admovu «Biełpošty» i «Biełsajuzdruku» raspaŭsiudžvać šerah vydańniaŭ ekanamičnymi pryčynami.
Takoha tonu trymalisia łukašenkaŭcy.
U svaju čarhu, staršynia Biełaruskaj asacyjacyi žurnalistaŭ Žanna Litvina, jaje namieśnik Andrej Bastuniec,
namieśnica redaktarki haziety «Biełorusy i rynok» Iryna Kryłovič i ekśpiert ABSIE z Rasii Andrej Richter krytykavali novy Zakon pra ŚMI (Rychter) i sypali faktami, što śviedčać pra manapalizacyju rynku ŚMI i ekanamičnuju dyskryminacyju niezaležnych hazietaŭ (Kryłovič, Litvina).
Vystupali taksama kiraŭnik Pieršaha kanału TV Alaksandr Zimoŭski, redaktar «Respubliki» i pa sumiaščalnictvie staršynia łukašenkaŭskaha Sajuzu žurnalistaŭ Anatol Lemiašonak, sacyjołah z BDU Davyd Rotman. Apošni pryvioŭ źviestki, što ŭžo 16‑19% nasielnictva karystajucca internetam jak krynicaj infarmacyi.
Što datyčyć zamiežnych dypłamataŭ, to jak pačesnaha hościa prymali
pasła ABSIE Hansa‑Johana Šmidta. Jaho pasadzili ŭ siaredzinu stała. Levaruč jaho siadzieła spn. Piatkievič, pravaruč – ministr infarmacyi Uładzimir Rusakievič.U svaim vitalnym słovie amb.Šmidt vykazaŭ haspadaram sustrečy – Ministerstvu infarmacyi i Biełaruskamu sajuzu žurnalistaŭ – mnoha słoŭ padziaki za toje, što ź ichnaj dapamohaj ŚMI raźvivajucca.
Zusim u inšaj tanalnaści vystupaŭ namieśnik kiraŭnika delehacyi Jeŭrakamisii ŭ Biełarusi (h.zn. pradstaŭnictva ES) Janis Ajzsałnijeks. Jon padrabiazna spyniŭsia na ŭsich prablemach i dvajnych standartach u śfiery ŚMI ŭ Biełarusi, vitaŭ viartańnie «Narodnaj voli» i «Našaj Nivy» ŭ raspaŭsiud, ale adznačyŭ, što
Biełaruś jašče tolki ŭ samym pačatku doŭhaje darohi da svabody słova.
Jahony vystup vyklikaŭ žyvuju reakcyju P. Jakuboviča, jaki paśpiašaŭsia nahadać, što na radzimie dypłamata niehraŭ linčujuć, h.zn. niehramadzianie nie majuć pravoŭ. «U nas taksama možna krytykavać Abamu!» – tak i lez u hałavu stary aniekdot.
Stvarałasia ŭražańnie, što dla pradstaŭnikoŭ dziaržaŭnaha boku zadačaj dyjałohu była kontraprapahanda ŭ prysutnaści zachodniaha boku.
Asiertyŭny vystup Žanny Litvinoj vyvieŭ z raŭnavahi ŭžo Natallu Piatkievič.Zaihrali pa tvary jaje vytančanyja ruki z fartepijannymi palcami, azdoblenymi malavanymi na biełaje, vyštukavanymi paznohciami. Da honaru Natalli Piatkievič, u vystupie ŭ adkaz jana strymała siabie i «absalutna pahadziłasia» z dumkaj kiraŭnika Biełaruskaj asacyjacyi žurnalistaŭ Žanny Litvinoj, što z boku miascovych uładaŭ byvaje zališni kantrol i zavyšanyja patrabavańni da ŚMI, «jakija vielmi ciažka pieraadoleć», a dziaržaŭnyja ŚMI ŭsprymajucca imi «jak kamunalnaja ŭłasnaść». «Z hetym treba zmahacca, my budziem z hetym pracavać», — zapeŭniła jana.
N.Piatkievič taksama vykazała dumku ab nieabchodnaści samafinansavańnia dziaržaŭnych ŚMI.
Usie administratyŭnyja prablemy jana tłumačyła pierahibami na miescach.
Vystupaje namieśnica Makieja jasna, havoryć vyrazna, trymajecca niazmušana, šmat uśmichajecca i navat śmiajecca.Adzietaja jana była ŭ strohi ciomny štanny kaścium.
«Placoŭkaj dyjałohu», na jakim tak nastojvaje Jeŭropa, była kanfierenc‑zała Nacyjanalnaj biblijateki ź jaje jeŭrapieoidnymi interjerami. Stol čas ad času skałanali hurby, što padali z płaščyniaŭ «ałmazu». Sustreču źnimali ŭsie try łukašenkaŭskija telekanały. Videaapierataru niezaležnaha ahienctva BiełaPAN u prysutnaści było admoŭlena.
Redaktary niezaležnych vydańniaŭ pakidali kruhły stoł bieź iluzij.
