Na dazvoleny haradskimi ŭładami pikiet na sceničnaj placoŭcy płoščy Banhałor sabrałasia niekalki dziesiatkaŭ čałaviek z usioj krainy. Pieravažnuju bolšaść pikietoŭščykaŭ składali žančyny.
Ludzi trymali transparanty z nadpisami «Prezident — harant Kanstytucyi», «Karupcyja čynoŭnikaŭ — pahroza biaśpiecy krainy», «Kruhavaja paruka čynoŭnikaŭ — biaspraŭje narodu», «Patrabujem ad čynoŭnikaŭ vykanańnia Kanstytucyi i zakonaŭ krainy» i h.d.Niekatoryja ŭdzielniki pikietu trymali ŭ rukach ksierakopii hazietnych artykułaŭ, napisanych pavodle ich žyćciovych historyj.
Byŭ na Banhałory i Vasil Chadźkoŭ, jakoha ŭ čaćvier pavodle pastanovy suda z prymianieńniem hrubaj siły vysielili z ŭłasnaha domu.
Halina Jubko, žycharka minskaj Sierabranki, jakaja piaty hod dabivajecca paŭnavartasnaha i spraviadlivaha śledstva pa fakcie śmierci jaje siastry Kaciaryny, raspaviała, što kryminalnuju spravu adnavili ŭ treci raz. Na pikiet pryjšli ludzi z samymi roznymi prablemami — maci vieteranaŭ Afhanistanu, čarnobylcaŭ, achviary žyllovych machinacyj.
Naprykancy akcyi prysutnyja padpisalisia pad adkrytym zvarotam da prezidenta krainy, čatyrnaccatym pa liku. U im vykazvajecca niedavier da kiraŭnictva Viarchoŭnaha sudu i Hienieralnaj prakuratury, havorycca pra kruhavuju paruku i karupcyju, jakija «źjaŭlajucca adnoj z pryčynaŭ biezzakońnia, što adbyvajecca ŭ orhanach sudoŭ i prakuratury». Łukašenku, kali jon nasamreč źbirajecca adnavić pravy pakryŭdžanych, prapanujecca źmianić kiraŭnictva VS i HP.
«Pa hrošy my źviartajemsia da Zachadu, dyk moža zaprosim zachodnich śpiecyjalistaŭ, kab jany ŭładkavali naša žyćcio ŭ adpaviednaści z Kanstytucyjaj Respubliki Biełaruś?» — takim pytańniem zakančvajecca zvarot žančynaŭ da prezidenta.
Hałoŭnym vynikam kampanii, što abjadnała žančynaŭ z usioj Biełarusi, miarkuje juryst Tamara Siarhiej, na dadzienym etapie stała toje, što jany sami zrazumieli sutnaść prablemy, ź jakoj sutyknulisia. A mienavita — sa stałym parušeńniem pravoŭ hramadzianaŭ u sudach i orhanach prakuratury. Hrupa žančynaŭ — svajačak asudžanych, a taksama niazhodnych z rašeńniami sudoŭ pa svaich hramadzianskich spravach, naličvaje bolš za paŭsotni čałaviek. Dziakujučy ich aktyŭnaści, hetaja kolkaść uvieś čas pavialičvajecca.
