U hieapalityčnym spabornictvie za Biełaruś Jeŭrasajuz rychtujecca zrabić chod kaniom. Krainu miarkujuć ułučyć va «Uschodniaje partniorstva». Ale — uvaha: pakul što tolki miarkujuć!
Niekatoryja resursy paśpiašalisia abvieścić, što 23 lutaha ŭ Brusieli hetaje pytańnie ŭžo vyrašyli. Nasamreč ža ministry zamiežnych spraŭ krain ES tolki paćvierdzili kandydactva Biełarusi. Kanfihuracyju «Uschodniaha partniorstva» musić zamacavać Rada ES najchutčej što ŭ sakaviku. Ale ŭsio idzie mienavita da hetaha. Inačaj by nie prylataŭ u Minsk Sałana.
Kali adkinuć tumannuju rytoryku brusielskaj dypłamatyi, to de-fakta ŭmova na siońnia adna: kab režym nie nałamaŭ nadta vialikich droŭ. U Jeŭrasajuzie nie takija naiŭnyja, kab nie razumieć, što tutejšaje načalstva tolki imituje adlihu. Adnak vierch biare hieapalityka.
Heta jaskrava adlustravałasia ŭ pytańni ab pryznańni/niepryznańni miaciežnych hruzinskich pravincyj, jakoje znoŭ zavastryŭ 23 lutaha ŭ Brusieli Kareł Švarcenbierh — ministr zamiežnych spraŭ Čechii, što staršynstvuje ŭ ES. Maŭlaŭ, kali Minsk pryznaje niezaležnaść Abchazii i Paŭdniovaj Asiecii, to ŭdzieł Biełarusi va «Ŭschodnim partniorstvie» apyniecca pad pytańniem.
I heta zavastreńnie całkam łahičnaje, kali zhadać, što ŭ tuju samuju prahramu ŭłučajecca Hruzija. Naturalna, što varta tolki Łukašenku vykanać toje, čaho damahajecca Kakojty, jak Tbilisi stanie na vušy.
Kali ž hladzieć šyrej, to heta było b anučaj pa tvary i Brusielu, bo mienavita letašniaja vajna na Kaŭkazie, strach pierad impierskaj ekspansijaj Rasii i padšturchnnuli Jeŭropu da załahodžvańnia «biełaruskaha pytańnia».
Tak što ŭviesnu vielmi imavierny čarhovy tur hulniaŭ Minska ŭ sapsavany telefon ci kiepskuju poštu. My, maŭlaŭ, nie suprać razhledzieć pytańnie, ale kudy heta znoŭ padzielisia papiery ad kaŭkazskich tavaryšaŭ? :)
Miž tym novaja palityka ES datyčna Biełarusi raskałoła łahier unutranych apanientaŭ režymu.
Tak, Brusiel sapraŭdy viadzie hulniu, što vyklikaje pytańni z hledzišča vysokaj marali i nie maje harantyj na pośpiech. Zrazumieła, Minsk choča ŭziać prahmatyčnyja vyhady i adsiekčy «pasiarednikaŭ» (muchi asobna, katlety asobna :). Majecca na ŭvazie vyklučeńnie z dyjałohu nie tolki žorstkich palityčnych praciŭnikaŭ, ale i ekśpiertnaj supolnaści, treciaha siektaru. Ułada razumieje, što abudžeńnie biełaruskaha hramadstva moža raschistać palityčnuju sistemu.
I tut mnohaje zaležyć ad taktyki tych, kaho ŭmoŭna-schiematyčna nazyvajuć prychilnikami pieramien. Varta, kali chočacie, pieraniać trochi prahmatyzmu va ŭłady. Mieniej raździmać hamletaŭskija žarści, a sprytniej vykarystoŭvać akno mahčymaściej.
Kali vynieści za dužki niuansy, ułučeńnie Biełarusi va «Uschodniaje partniorstva», chaj sabie i vialikim avansam, było b niesumnienna na karyść krainie. De-fakta heta važny etap uciahvańnia ŭ ahulnajeŭrapiejskija pracesy.
Pa-pieršaje, i prahmatyčny składnik: inviestycyi, technałohii dy ŭsio takoje — budzie pracavać na aphrejd krainy. Pa-druhoje, jak by ni starałasia načalstva adździalić much ad katlet, praces erozii ŭsiaje sistemy praktyčna niepaźbiežny. Abudžeńnie ž hramadzianskaj supolnaści zdolnaje katalizavać hety praces.
Nu a Jeŭropu, kaniečnie, taksama varta cierabić, kab nie zahulvałasia :) Musić być usio ž niejkaja darožnaja karta, što fiksavała b choć i strymanyja, ale kankretnyja ŭmovy narmalizacyi dačynieńniaŭ ź Biełaruśsiu.
Heta buduć milimietry ŭ Jeŭropu, a nie ŭ impieryju.
ZY. 24 lutaha jeŭrakamisarka Bienita Fierera-Valdnier dadatkova zavastryła pytańnie ab miaciežnych pravincyjach. Ź jaje słoŭ, ES raźličvaje, što Minsk ich nie pryznaje, inačaj budzie adkat u dačynieńniach z Brusielem.
Było nahadana i pra nieabchodnaść novych krokaŭ biełaruskich uład da demakratyi dziela ŭłučeńnia krainy va «Uschodniaje partniorstva». ES choča zajmieć choć kaliva dadatkovych arhumientaŭ na karyść stanoŭčaha rašeńnia ŭ hetym pytańni.
I jašče infarmacyja: sama Fierera-Valdnier majecca być u nas 12—13 sakavika. Faktyčna pa vynikach jaje vizitu Brusiel i vyznačycca.
