Pra heta ŭ paniadziełak na pres‑kanfierencyi paviedamiŭ ministr unutranych spravaŭ Uładzimir Navumaŭ.
«My zacikaŭlenyja ŭ prodažy SIZA. Na siońniašni dzień jość prapanovy z ad rasijan i aŭstryjcaŭ. Adzinaja ŭmova, zachavać u niaźmiennym stanie Piščałaŭski zamak. Inšyja abjekty na terytoryi SIZA pavinny być źniščany, a na ich miesca ŭźviedzieny novyja», — skazaŭ ministr.
Novy śledčy izalatar budzie pabudavany ŭ Kaladzičach.Jašče try hady tamu była pradadzienaja inviestaram minskaja kałonija №1, što na Kalvaryjskaj. «Kałoniju źniasiom. Na hetym budzie mikrarajon, dzie buduć žyć ludzi. Novuju kałoniju budavać nie budziem, bo niama pilnaj patreby. Kolkaść złačyncaŭ, jakija adbyvajuć turemnaje pakarańnie, apošnim časam źmianšajecca», — paviedamiŭ U.Navumaŭ.
Rabota na raskryćciom vybuchu ŭ noč na 4 lipienia praciahvajecca. Uładzimir Navumaŭ paviedamiŭ, što bližejšymi dniami maje namier pravieści sustreču ź niekalkimi žurnalistami, dzie raskaža pra chadu śledstva pad umovaj, što heta nie budzie vyniesiena na staronki ŚMI. «Nie sakret, što padčas rasśledavańnia hetaha złačynstva my najpierš aryjentavalisia na ŭsio źviazanaje z vybuchoŭkaj, zbrojaj. U chodzie apracoŭki Vaŭkavyska była aryštavanaja hrupa asob jakaja mieła ŭ siabie i vybuchoŭku, i zbroju, majučy namier jaje vykarystać», — prakamientavaŭ Navumaŭ spravu vaŭkavyskich pradprymalnikaŭ.
Pavodle jahonych słovaŭ, śledstva budzie skončana ciaham niekalkich miesiacaŭ. Adnak sprava Mikałaja Aŭtuchoviča i jahonych paplečnikaŭ nijak nie źviazanaja z vybucham na Dzień respubliki.
Adnoj z hałoŭnych temaŭ pres‑kanfierencyi było pytańnie baraćby z ałkahalizmam. Navumaŭ skazaŭ, što pazityŭna adnosicca da inicyjatyvy pavysić uzrostavy cenz dla prodažu ałkaholnych napojaŭ z 18 da 21 hodu. «Jeŭrapiejskija krainy ŭvodziać jašče bolš žorstkija abmiežavańni», — zaznačyŭ kiraŭnik MUS.
«Ja za toje, kab dniom ćviarozaści abjavili i 4 sakavika — Dzień milicyi. Heta było b pravilna, my sami pavinny pakazvać prykład našym hramadzianam».
Abrabavańnie hipiermarkietu «Prastror» jašče nie raskrytaje,adnak u milicyi dastatkova dokazaŭ i infarmacyi, kab davieści spravu da łahičnaha zaviaršeńnia.
U prykład dobrasumlennaj pracy ministr Navumaŭ pastaviŭ učastkovaha śledčaha z Salihorskaha rajonu, jaki raskryŭ zabojstva kiroŭcy i ekanamista kałhasa, jakija vieźli ŭ haspadarku zarobak. Byŭ vyklik na dom u suviazi sa svarkaj muža i žonki. I ŭčastkovy ŭbačyŭ abutak, jaki supadaŭ z tym, što byŭ zafiksavany na miescy złačynstva. Pa spravie aryštavanyja try čałavieki. Adzin ź ich pražyvaŭ z žančynaj, jakaja viedała praceduru pryvozu hrošaj.
Uładzimir Navumaŭ pakul nie choča nazyvać imia novaha treniera chakiejnaha «Dynama». Chacia ŭžo «ŭsio viadoma». Ministr prapanavaŭ pačakać da krasavika.
Raskryćcio złačynstva 4 lipienia nie daje mahčymaści Navumavu płanavać asabistyja spravy,u tym liku adpačynak. Chacia i jość prapanovy pa ŭzychodžańni na Evierest.
