Za apošnija dziesiać hadoŭ u Białynickim rajonie pahałoŭje karoŭ u nasielnictva źmienšyłasia amal u dva z pałovaj razy.
Siońnia pazbaŭlajecca ŭsialakaha sensu i ŭtrymańnie karoŭ u asabistaj padsobnaj haspadarcy. Paśla devalvacyi rubla i źnižeńnia zakupačnych cen na małako (ad 9 lutaha ŭ siarednim na 10%) karoŭ u nasielnictva, na maju dumku, zastaniecca jašče mienš, bo zatraty na ŭtrymańnie žyvioły buduć značna pieravyšać atrymany dachod.
Zakupačnyja ceny na małako «Ekstra» z 910 rub. za 1kh ciapier źnižany da 820 rub., na małako vyšejšaha hatunku — z 725 da 650 rub., pieršaha — z 665 da 600 rub., druhoha — z 390 da 350 rub. za kh. Tym časam dziaržaŭnyja ŚMI paviedamili, što zroblena heta dziela zabieśpiačeńnia bolš efiektyŭnaj pracy pierapracoŭčych pradpryjemstvaŭ. Dziakuj uradu za kłopat pra hetyja pradpryjemstvy, adnak chto pakłapocicca pra sialan i sielskuju haspadarku? A ŭžo praź miesiac pačnucca viesnavyja palavyja raboty…
Situacyja składvajecca drennaja, bo ceny na HZM, zapčastki, techabsłuhoŭvańnie i ŭhnajeńni źnižać nichto nie źbirajecca. Dy i ŭ šmat jakich haspadarkach vytvorčaść małaka pry novych koštach budzie prosta stratnaj. Navošta tady ŭsiudy «lapić» novyja małočna‑tavarnyja kompleksy, kali ich budaŭnictva nikoli nie akupicca?
Moža, u sialan hrošy niama kudy padzieć? Na žal, zusim naadvarot: zarobki ŭ ich značna nižej, čym u rabotnikaŭ inšych halin narodnaj haspadarki.
Samaje cikavaje toje, što chacia zakupačnyja ceny na małako i pamienšylisia na 10%, dla biełaruskich spažyŭcoŭ u kramach ceny zastanucca raniejšymi.
I ničoha, što našy sielanie nie viedajuć, jak vyžyć va ŭmovach kryzisu. Tym bolš što jaho (kryzisu) u nas, pa słovach kiraŭnika dziaržavy, niama.
