Miljanier z truščobaŭ (Slumdog Millionaire)
Vialikabrytanija – Indyja, 2008, kalarovy, 120 chv.
Režysiory: Deni Bojł, Łavlin Tandan
Roli vykonvajuć: Dev Patel, Anił Kapur, Saŭrabch Šukła, Radžerdranat Zutšy, Dženieva Tałvar, Frejda Pinta
Žanr: Mieładrama
Premii: 4 “Załatyja hłobusy”, 8 “Oskaraŭ”
Adznaka: 7,5 (z 10)
Sirata Džamal Malik, jaki vyras u indyjskich truščobach traplaje na hulniu “Chto choča stać miljanieram” – i ŭ adnym kroku ad vyjhryša 20 milijonaŭ rupij. Ale hieroja aryštoŭvajuć za machlarstva, bo nie vierać, što žabrak sam viedaje ŭsie adkazy. Džamal raskazvaje śledčym svaju historyju z pryhodami, pakutami, nakanavańniem – i luboŭju.
Va ŭsioj historyi mastactva jość tolki niekalki siužetaŭ, što tyražujucca – i z achvotaj raspaviadajucca. “Miljanier z truščobaŭ” – mienavita taki ŭniviersalny siužet, zrazumieły ŭ Bambiei j Halivudzie, Biełarusi – i Aŭstraliii, Afrycy – i Jeŭropie.
Biedny stanovicca bahatym, biedny – znachodzić i vyratoŭvaje svaju luboŭ; i tolki los zdolny złučyć kachankaŭ, jakija, zdavałasia, nazaŭždy zhubili adzin adnaho.
Na ŭniviersalnuju mieładramu pracujuć hlučna-brytanskija žachi levaka Deni Bojła, najpošniaja videatechnika – ź bieśpierapynna-klipavymi kadrami – i śviatočny indyjski hłamur, zdolny pieraŭtvaryć samaje zmročnaje ŭ radasnaje i piaščotnaje.
Karcina – tryjumf hłabalizacyi, termajadzierny eklektyčny kaktejl – ź indyjskimi žabrakami i bandytami, kalarovymi tkaninami, strełami ŭ łaziency, zasypanaj hrašyma, cnatlivymi pozirkami – dyj śpievami.
Truščoby, aśleplenyja złačyncami dzieci, słava ŭ televizijnych pražektarach – i znajomaja ŭsim hulnia, dzie adkazy – zabojčyja historyi ź dziciačych pryhodaŭ.
“I my! I my! I my!” – biełaruskija studyi taksama buduć kryčać pra hulniu j šaniec, pra kon i ščaście – i pra svaje milijony z “čornym katom”. Ale, u adroźnieńni ad čyrvona-zialonych naviaźlivych łatatronaŭ, hieroj univiersalnaj karciny nie čakaje, pakul na jaho zvalicca vyjhryš dyj zmahajecca nie za “mocnuju i praćvitajučuju” padziaku.
Los padyhryvaje tolki tamu, chto biažyć nasustrač jamu – i dziela lubovi žyvie.
