Samit kiraŭnikoŭ MZS krainaŭ Jeŭrasajuzu pryniaŭ rašeńnie ab prypynieńni vizavych sankcyj suprać biełaruskich čynoŭnikaŭ jašče na dzieviać miesiacaŭ.
Vybar rabiŭsia miž jašče adnym časovym prypynieńniem, poŭnaj admienaj ci adnaŭleńniem vizavych sankcyj.
Niekatoryja krainy, jak Vialikabrytanija, Niderłandy, Šviecyja, vystupali za adnaŭleńnie sankcyj. Niamieččyna i Italija, jakija majuć ciaśniejšyja poviazi z Rasijaj, vystupali za rašeńnie na karyść Łukašenki.
U vyniku pasiadžeńnia było pryniata rašeńnie, što sankcyi suprać biełaruskich aficyjnych asobaŭ buduć prypynienyja jašče na dzieviać miesiacaŭ. Razam z tym, była ahučanaja zaniepakojenaść stanam pravoŭ čałavieka ŭ našaj krainie.
«Jeŭrasajuz paćviardžaje svoj namier raźvivać adnosiny ź Biełaruśsiu ŭ zaležnaści ad prahresu krainy ŭ halinie demakratyi, pravoŭ čałavieka i viaršenstva zakona, a taksama dapamahać joj u dasiahnieńni hetych metaŭ». Pra heta havorycca ŭ dakumiencie, pryniatym ministrami zamiežnych spraŭ krain ES 16 sakavika na pasiadžeńni ŭ Brusieli.
U rezalucyi Rady ES «padkreślivajecca važnaść usich pryncypaŭ, a taksama zabaviazańniaŭ, što ŭziała na siabie Biełaruś u ramkach ABSIE». Ukazvajecca, što Jeŭrasajuz maje namier raźvivać supracoŭnictva ź biełaruskaj hramadzianskaj supolnaściu «z metaj padtrymki demakratyčnaj i pluralistyčnaj atmaśfiery ŭ krainie».
Ministry vitali «asobnyja stanoŭčyja zachady, jakija biełaruskija ŭłady raspačali paśla rašeńnia Rady ab prypynieńni sankcyj u kastryčniku 2008 hoda». U dakumiencie vitajecca taksama pavieličeńnie kantaktaŭ na vysokim uzroŭni i pašyreńnie techničnaha supracoŭnictva, vykazvajecca nadzieja, što pradoŭžycca ŭzajemadziejańnie Biełarusi i ABSIE u halinie vybarčaha zakanadaŭstva.
Razam z tym Rada ES pakazaŭ, što «pa‑raniejšamu zakłapočany situacyjaj z pravami čałavieka ŭ Biełarusi i niadaŭnimi vypadkami parušeńniaŭ u hetaj halinie». U zajavie padkreślivajecca važnaść hetaha pytańnia i nieabchodnaść prahresu. Tak, zajaŭlena, što nieŭzabavie ES pačnie dyjałoh ź Biełaruśsiu pa pytańni vykanańnia pravoŭ čałavieka.
U dakumiencie ŭkazvajecca, što praź dzieviać miesiacaŭ Rada ES «uvažliva pierahledzić» usie sankcyi z ulikam situacyi, što składziecca ŭ krainie da hetaha času.
«Pry ŭmovie praciahu stanoŭčaha raźvićcia ES budzie hatovy razhledzieć mahčymaść poŭnaj admieny ŭsich abmiežavalnych mier», — havorycca ŭ dakumiencie. Razam z tym u luby čas «u adkaz na dziejańni biełaruskich uładaŭ u halinie demakratyi i pravoŭ čałavieka» moža być pryniata rašeńnie ab adnaŭleńni vizavych sankcyj.
Pry abmierkavańni biełaruskaha pytańnia ministr zamiežnych spravaŭ Finlandyi Alaksandr Stub situacyju z pravami čałavieka ŭ Biełarusi pa dziesiacibalnaj škale acaniŭ na 2—3 bały, ale vykazaŭ mierkavańnie, što ruch u słušnym kirunku jość.
«Ciaham 12 hadoŭ my vykarystoŭvali palityku sankcyjaŭ i my bačym, kudy jana nas pryviała: nikudy. Ciapier ciaham hodu my sprabujem być krychu bolš adkrytymi, i my bačym niekatoryja palapšeńni, ale ŭsio roŭna jašče nie dasiahnuli mety», — zaznačyŭ Alaksandar Stub.
Pavodle jahonaha brytanskaha kalehi Devida Milibenda, «Jeŭraźviaz pasprabuje stvaryć kurs, jaki padtrymaje reformy ŭ Biełarusi, nie ihnarujučy tyja składanaści, jakija zastajucca». Alternatyvaj moža być uzmacnieńnie cisku z boku Rasiei, pryznaŭ estonski ministr Urmas Paet.
U śpisie nieŭjaznych pa‑raniejšamu zastajecca piać pradstaŭnikoŭ Biełarusi. Heta kiraŭnik Centravybarkamu Lidzija Jarmošyna, ministr unutranych spraŭ Uładzimir Navumaŭ, były dziaržsakratar Rady biaśpieki Viktar Šejman, były kiraŭnik MUS Juryj Sivakoŭ i były kamandzir bryhady śpiecpryznačeńnia ŭnutranych vojskaŭ MUS Dźmitryj Paŭličenka.
