Da 25 Sakavika, Dnia Voli, dnia pieršaha abviaščeńnia niezaležnaści Biełarusi, — zastajecca tydzień. Niezaležnyja palityčnyja partyi družna nazyvajuć hety dzień najvažniejšym nacyjanalnym śviatam. U hety dzień tradycyjna tysiačy, a časam, jak u 1996 ci 2006-m, dziesiatki tysiač ludziej vychodziać na vulicy stalicy dla ŭdziełu ŭ tradycyjnym śviatočnym šeści. Adnak nidzie ŭ Minsku niama afišak ci nalepak, jakija b zaprašali žycharoŭ horadu na śviata, choć arhanizatary daŭno zaklikali sabracca a 18-j hadzinie kala Akademii navuk i prajścisia šeściem pa hałoŭnym praśpiekcie. U čym pryčyna takoj pasiŭnaści palitykaŭ?
NN źviarnułasia da kiraŭnikoŭ palityčnych partyj i arhanizacyj z pytańniem, što ichnija struktury zrabili dla infarmavańnia ludziej pra Dzień Voli.
Lavon Barščeŭski, staršynia Partyi BNF: «Nie śpiašajciesia — budzie dazvoł, buduć i ŭlotki. Čamu niama jašče? Usio vielmi prosta: bo palityčnyja siły, u jakich jość hrošy, vyrašyli praihnaravać hetuju akcyju».
Alaksandr Milinkievič, lider Ruchu za Svabodu: «Na hety raz arhkamitet byŭ stvorany adnoj arhanizacyjaj — Partyjaj BNF. Nas nie zaprasili da abmierkavańnia. Ja liču pryvatyzacyju Dnia Voli nieprymalnaj. Vy absalutna majecie racyju, kali kažacie, što arhkamitet heta adna sprava, a śviata — zusim inšaje. Tamu ja abaviazkova vyjdu na vulicu 25 Sakavika. Razam z tym, ja jašče dakładna nie viedaju maršrutu, nie viedaju, što budzie ŭ vypadku admovy. Kali niechta nie choča raicca z nami, to heta ichnija prablemy».
Anatol Laŭkovič, staršynia BSDP: «Skažu ščyra, što BNF nas na ichniuju akcyju nie zaprašaŭ. Našy siabry buduć adznačać śviata ŭ rehijonach. Dumaju, što niedzie tam ulotki jość. Čamu ŭ Minsku niama, vam treba zvanić hienierału Frałovu. Kažacie, što jon za kosmas užo adkazvaje? My viedajem heta, ale ž jon pa-raniejšamu kiraŭnik haradskoj arhanizacyi».
Uładzimir Navasiad, staršynia arhkamitetu Partyi svabody i prahresu: «My pravodzim tradycyjnuju štohadovuju akcyju ŭ Mahilovie, na miescy pachavańnia Ciški Hartnaha. Tam budzie źbiracca naš aktyŭ. U Mahilovie drukavanaja pradukcyja jość. Nakiroŭvajem ludziam paštoŭki z zaprašeńniem dałučycca da nas».
Siarhiej Kalakin, staršynia PKB: «Asobnyja našy siabry buduć udzielničać u śviatkavańni 25 Sakavika, ale partyja ŭ arhkamitet nie ŭvachodziła. Heta tradycyjna, što arhanizacyjaj zajmajecca BNF. Asabista mianie ŭ hety dzień u Minsku nie budzie».
Pavieł Sieviaryniec: sustaršynia arhkamitetu BCHD: «Naša vina, byli zaniatyja źjezdam i padačaj dakumientaŭ na rehistracyju BCHD. Adnak na Dzień Voli pryjdziem».
Viktar Harbačoŭ, lider kampanii «Za svabodnaje raźvićcio pradprymalnictva»: «Minsk — heta asobnaja kraina. My adrazu skazali, što niachaj stalicaj zajmajucca tyja, chto tam žyvie. Naša ž pradukcyja raspaŭsiudžvajecca pa rynkach usioj krainy, ad Viciebsku da Homielu, ad Krupak da Rečycy».
Nasta Pałažanka, namieśnica staršyni zarehistravanaha ŭ Čechii «Maładoha frontu»: «Aburaje, jak pravodzicca padrychtoŭka da śviatkavańnia. Partyja BNF pryvatyzavała hety dzień. Na pres-kanfierencyju pa padrychtoŭcy nie byli zaprošanyja siabry moładzievych arhanizacyj, jakija robiać najbolšuju mabilizacyjnuju pracu».
Jury Bieleńki, namieśnik staršyni KCHP-BNF: «Spačatku niachaj aficyjny adkaz daść Minharvykankam, a potym my razhledzim pytańnie, ci varta vyrablać drukavanuju pradukcyju».
Anatol Labiedźka, lider AHP: «My vypuścili. Nakład, praŭda, nie toj, jaki chaciełasia b. Taksama vyjšła hazieta «Hłotok vozducha», pryśviečanaja hetaj dacie. Svoj uniosak u infarmacyjnaje aśviatleńnie Dnia Voli my zrabili».
