U dzień biełaruskaj Salidarnaści, 16 sakavika, u vilenskim Domie pravoŭ čałavieka byŭ prezientavany dakumientalny film Volhi Mikałajčyk «Vyzvaleńnie». Na pakazie prysutničali sama aŭtar i adna z hierainiaŭ filma – Halina Łukašova‑Siŭčyk. Zala była poŭnaja roznanacyjanalnaj publiki: ad miascovych biełarusaŭ da hruzinaŭ i šviedaŭ.
«Mnie było ciažka rabić hetaje kino, — kaža režysior, — ale bolš u maralnym sensie. Stolki pakutaŭ, śloz, a ty nie možaš ničoha źmianić. Nie možaš vyzvalić dzicia z turmy, suciešyć hora maci. Ale ja adčuvaju ŭdziačnaść za dziejnaść hetych ludziej, i nam treba zdymać pra heta filmy. Raniej zdymaŭsia adzin film na 8 hod, i ŭsie na jaho malilisia. A za apošnija hady źjaviłasia kala sotni novych kinastužak, u asnoŭnym u supracoŭnictvie z «Biełsatam», i nam treba praciahvać hety pačatak, fiksavać padziei. Treba pryznać, majo kino chutčej niehatyŭnaha nastroju, bo dla aptymizmu pakul niama nahody. Tym nie mienš, jość viera, jość prastora dla nadziei. Bieź jaje hieroi nie zmahalisia b».
Halina Łukašova‑Siŭčyk, syny jakoj, Viačasłaŭ i Kastuś, udzielničajuć u apazicyi, adkazvała na šmatlikija pytańni zamiežnych haściej, što daviedalisia mnoha novaha ź filma i byli ŭražanyja žorstkaściu, nakiravanaj ad uładaŭ na niazhodnych.
«NN» spytała ŭ Volhi Mikałajčyk, ci daŭno jana zadziejničana ŭ śfiery dakumientalistyki: «Ja doŭhi čas była pradziuseram Juryja Chaščavackaha. A kali sama ŭziała ŭ ruki kamieru, zrazumieła, što mnie vielmi padabajecca zdymać. Śpiecyjalnaj adukacyi ja nie atrymlivała, ale šmat čamu navučyłasia na mižnarodnych kinaškołach. Maje płany – źniać film pra apuściełyja biełaruskija viosački, ich samotnych žycharoŭ, a taksama niadoŭhuju stužku pra Janu Palakovu. Vielmi mocna mianie ŭschvalavała jaje śmierć…»
Daviedka. Dakumientalny film «Vyzvaleńnie» (2008) stvorany na tvorčaj kinastudyi «Bramafilm» pa zamovie telekanała «Biełsat». Siužet achoplivaje padziei 2008 hoda ŭ Biełarusi, u liku jakich ustalavańnie kryža ŭ v. Dražna, śmierć Iryny Kazulinaj, vyzvaleńnie Andreja Kima, zatrymańni apazicyjnaj moładzi i h.d. Film ułučaje ŭ siabie intervju, archivy, repartažnyja zdymki, adnak pry hetym nie pazbaŭleny emacyjnaha elemientu.
