Papularny žurnalist Pavieł Mažejka abviaściŭ pra svoj sychod z telekanału «Biełsat». Jon vioŭ pieradaču «Hość «Biełsatu», dzie hutaryŭ ź viadomymi ŭ krainie ludźmi.
«Ja nie zhadžajusia z rašeńniem televizii Polskaj zvolnić z kanału dyrektarku Ahniešku Ramašeŭskuju, tamu vyrašyŭ taksama syści z «Biełsatu», — kaža P.Mažejka.
Pra svaje dalejšyja płany žurnalist žartuje. «Budzieš bolš volnaha času hladzieć «Biełsat», raniej takoj mahčymaści amal nie było. A kali surjozna, to ja nie płanavaŭ taki sychod, tamu jašče nie viedaju, čym zajmusia».
Pavieł Mažejka pierakanany, što prablemaŭ znajści novaha viadučaha nie budzie. «Prafiesijnaja padrychtoŭka mnohich supracoŭnikaŭ telekanału dazvalaje bieź pieraškodaŭ znajści zamienu», — adznačaje P.Mažejka.
Nahadajem, što Pavieł Mažejka pracavaŭ u hrodzienskaj haziecie «Pahonia». U 2002 hodzie žurnalist razam z redaktaram vydańnia Mikołam Markievičam byŭ asudžany pa kryminalnaj spravie za abrazu Łukašenki. Mažejka atrymaŭ dva hady «chimii», adbyŭ tolki hod, pracujučy na žłobinskaj lesapiłcy.
Padčas minułaj prezidenckaj kampanii Pavieł Mažejka byŭ pres‑sakratarom Alaksandra Milinkieviča. Apošnim časam pracavaŭ viadučym na telekanale «Biełsat».
