17 červienia padčas raspaŭsiudu ŭlotak z zaklikam da niehvałtoŭnaha supracivu zatrymanyja aktyvisty novapaŭstałaj hrupy «Bunt» Kaciaryna Kazak, Alena Kazak, Alaksiej Panasik, Dzianis Dzianisaŭ, Taciana Jełavaja, Ivan Śpiryn, Vieranika Nosań. Zatrymanych trymali da paŭnočy ŭ pastarunku (vypuścili tolki Dzianisava). Śpirynu vystavili abvinavačańni ŭ niepadparadkavańni supracoŭnikam milicyi (jon sprabavaŭ źbiehčy pry zatrymańni), astatnich unačy vyvieźli ŭ Voršu j pasadzili ŭ mienskuju elektryčku, bo – žychary Miensku. 19 červienia Śpirynu prysudzili 15 sutak aryštu.
Niekalki aktyvistaŭ zastalisia ŭ Viciebsku čakać sudu nad Śpirynym. Pozna ŭviečary troch ź ich – Tacianu Dziadok, Illu Šymanskaha i Michaiła Šubača zatrymali, kali jany pajšli ŭ kramu kuplać pradukty na viačeru. Ich pratrymali 3 hadziny ŭ adździele milicyi Viciebskaha rajonu j adpuścili biez pratakołaŭ.
Paśla paŭnočy ŭ arandavanuju aktyvistami kvateru ŭvarvalisia milicyjanty i, zajaviŭšy, što susiedzi skardziacca na šum, pačali ahladać asabistyja rečy prysutnych. Pad haŭbcom znajšli pakiet z ulotkami, prypisali jaho Mikitu Abramienku j zabrali chłopca dla składańnia pratakołu. Čakajučy siabra, moładź śpisała 10 staronak «Knihi skarhaŭ i prapanovaŭ» pratestami suprać niespraviadlivych dziejańniaŭ milicyjantaŭ. Abramienku adpuścili, ale za hety čas u pastarunak pryvieźli I.Burykina i Jaŭhiena Papkoviča, jakich zatrymali za najaŭnaść balončykaŭ z farbaj: napiaredadni ŭnačy ŭ Viciebsku źjavilisia hrafici «Bunt».
18 červienia na adnoj z aśviatlalnych viežaŭ letniaha amfiteatru Kryścina Šacikava ŭźniała nacyjanalny ściah. Milicyjanty zdymali jaje niekalki hadzinaŭ, vyklikaŭšy dla hetaha navat 3 mašyny MNS. Šacikava paciarpieła padčas zdymańnia, u pastarunku joj stała drenna, i milicyjanty zavieźli jaje śpiarša ŭ špital chutkaj dapamohi, a potym u abłasnuju kliniku.
Źniaty j skinuty milicyjantam ściah padniała Taciana Sieviaryniec, maci palitviaźnia Paŭła Sieviarynca, jakaja vypadkova apynułasia pobač. Za heta milicyjanty źvinavacili jaje ŭ tym, što chacieła źniščyć važny rečavy dokaz. Žančynu razam z Šacikavaj i fotakarespandentam niedziaržaŭnaj hazety «Viciebski kurjer-M» Sieržukom Sierabrom (jon fatahrafavaŭ usie padziei) zavieźli ŭ Kastryčnicki RUUS Viciebsku. S.Sierabra źvinavacili ŭ chulihanstvie j prysudzili štraf u 0,5 b.v. Fatazdymki ŭ pamiaci jahonaha fotaaparatu byli ściortyja milicyjantami.
19 červienia K.Šacikavu za «niesankcyjavany pikiet», chulihanstva ŭ hramadzkim miescy i niepadparadkavańnie rabotnikam milicyi sudździa Kastryčnickaha sudu Valancina Michasiova aštrafavała na 150 b.v., paśla čaho asudžanuju znoŭ pavieźli ŭ RUUS pa «znoŭ adkrytych akaličnaściach spravy». Jaje zavieźli na psychijatryčnuju ekspertyzu, potym dapytali, a 20 červienia vyvieźli ŭ Voršu j pasadzili ŭ mienskuju elektryčku. U Čyhunačnym sudzie Viciebsku ŭ hety ž čas Siarhieja Šabanava i Ja.Papkoviča asudzili na 1 b.v. kožnaha za «drobnaje chulihanstva», a I.Burykina pryznali nievinavatym, ale paśla sudu taksama zatrymali. Razam ź imi zatrymali j Dz.Dzianisava, jaki prysutničaŭ na sudzie.
