Firma «Trajpł» maje zbudavać u centry Minsku hihancki dachodny dom, jaki razburyć minski krajavid. Piša architektar Ihar Bajcoŭ.
U Minsku raźnieslisia viestki, što ŭ centry horadu, na bierazie Svisłačy — pobač z Trajeckim pradmieściem, nieŭzabavie pabudujuć vializarny hmach — 23‑paviarchovy žyły kompleks. Jaho chočuć raźmiascić na maleńkim łapiku ziamli — na terytoryi žyłoha kvartału pamiž vulicami Maksima Bahdanoviča, Architektara Zaborskaha i Staražoŭskaj. Kali prajekt ažyćciavicca, hmach budzie amal u dva z pałovaj razy vyšejšy za ŭžo isnujučy pobač doŭhi žyły dom №8 pa vulicy Staražoŭskaj. U vyniku žychary kvartału buduć pazbaŭlenyja paŭnavartasnaj dvarovaj prastory, namnoha pamienšycca naturalnaja aśvietlenaść pamiaškańniaŭ kvater.
Hety prajekt, vykanany UP «TM Ładkina A.A.», supiarečyć usim raspracavanym i zaćvierdžanym raniej horadabudaŭničym kancepcyjam ansamblevaj zabudovy centru horadu.
Źjaŭleńnie na hetaj terytoryi kompleksu takich hrandyjoznych pamieraŭ jaŭna nie da miesca. Svajoj praźmiernaj vyšynioj i masaj hety kompleks budzie pryhniatać i prynižać usio architekturnaje atačeńnie, što ŭžo skłałasia. Hety abjekt budzie bačny z roznych bakoŭ, a zaprajektavany jon jak niejkaja architekturnaja šyrma z adnym paradnym bokam, aryjentavanym na pomnik Puškinu.
U panaramie, bačnaj z płoščy Vośmaha sakavika i schiłu Vierchniaha Horadu, jon budzie ŭzvyšacca nad Trajeckim pradmieściem u vielmi niaŭdałych rakursach, što pryniasie vialikuju škodu abličču zabudovy. Vulica Architektara Zaborskaha — svojeasablivaja častka histaryčnaj vuličnaj sietki, jakaja złučaje prastoru Trajeckaj hary z łandšaftam račnoj daliny, — faktyčna pieratvorycca va ŭnutrykvartalny prajezd. Pomnik Maksimu Bahdanoviču budzie źviernuty tvaram nie da adkrytaj prastory i raki, a da dvarovaha fasadu vializarnaha žyłoha domu, niesumaštabnaha zabudovie vulicy M.Bahdanoviča.
Žychary kvartału niazhodnyja z hetym prajektam, jany šukajuć dziejsnaj padtrymki u roznych instancyjach. Jany zakłapočany nie tolki surjoznym paharšeńniem umovaŭ pražyvańnia, jakoje im pahražaje. Jany zaklikajuć da rekanstrukcyi i dobraŭparadkavańnia hetaj terytoryi z ulikam jaje histaryčnaha minułaha.
Jany zaklikajuć uličvać, što «hety kutok Staroha Horadu na schile Trajeckaj hary źviazany z imionami pieršaj biełaruskaj piśmiennicy Ałaizy Paškievič; viadomaha piedahoha, prafiesijnaha falkłarysta, biblijafiła i biblijohrafa Adama Bahdanoviča — baćki Maksima Bahdanoviča, jaki naradziŭsia ŭ domie, što znachodziŭsia na vuł. Alaksandraŭskaj, 25 (ciapier vuł.Bahdanoviča, 23a); žurnalista Alaksandra Ułasava i inšych».
Žycharoŭ zdziŭlaje, što «na konkursnaj asnovie nie było prapanavana prajektu, jaki b spałučaŭ u sabie intaresy horadu i źbieražeńnia historyka‑kulturnych kaštoŭnaściaŭ». Žychary kvartału padtrymlivajuć realizacyju raspracavanaha raniej prajektu ŭznaŭleńnia domu Bahdanovičaŭ, što znachodziŭsia na dvarovaj terytoryi kvartału, i stvareńnie ŭ im muzieju. Častku kvartału jany prapanujuć pieratvaryć u miemaryjalny skvier, u jakim byŭ by da miesca pomnik Ałaizie Paškievič. Usie hetyja prapanovy žycharoŭ dajuć mahčymaść stvaryć hodnuju centru stalicy vyraznuju architekturna‑łandšaftnuju kampazicyju, jakaja ŭzbahacić prylehłuju da raki prastoru.
Prajekt kompleksu, raspracavany UP «TM Ładkina A.A.», uzhodnieny i ŭ Ministerstvie kultury, i ŭ Kamitecie architektury i horadabudaŭnictva, architektu¬ry i dobraŭparadkavańnia Minhorvykankamu, choć niedapuščalnaść jaho źjaŭleńnia na hetym miescy — reč vidavočnaja. Usie kalehi‑architektary, ź jakimi mnie daviałosia sustrecca ŭ apošni čas, ličać mienavita tak.
Niama sumnievu, što i tyja z architektaraŭ, što ŭdzielničali va ŭzhadnieńniach prajektu, heta dobra razumiejuć. Biada ŭ tym, što jany čynoŭniki nie takoha vysokaha statusu, kab nie paddacca mocnamu cisku bahatych inviestaraŭ.
Ciapier, kali va ŭładalnikaŭ vialikich hrošaj źjaviłasia mahčymaść budavać u Minsku vysokija damy dla atrymańnia prybytkaŭ, jany imknucca raźmiascić svaje pabudovy jak najmaha bolšych pamieraŭ na vypadkovych miescach u samym centry horadu — na placoŭkach pakul nie zabudavanych ci z minimalnym znosam najaŭnych pabudovaŭ. Pieraškoda takim imknieńniam — kancepcyja ansamblevaj zabudovy, jakoj kiravalisia dahetul pry prajektavanni biełaruskija architektary. Ale ciapier na zamovy pryvatnych inviestaraŭ raspracoŭvajecca šerah prajektaŭ na prynadnych miescach u parušeńnie ansamblaŭ, što ŭžo skłalisia. Faktyčna heta admova ad samoha pryncypu ansamblevaj zabudovy, jaki byŭ adnoj z samych hałoŭnych kaštoŭnych admietnaściaŭ Minska.
Źjaŭleńnie hetaha kompleksu na Staražoŭcy, ci chmaračosika la Kastryčnickaj płoščy, ci vysačeznych damoŭ‑cylindraŭ na vulicy Maksima Tanka budzie precedentam, jaki zdymie ŭsiakija maralnyja abaviazki pavažać stvoranaje papiarednikami i ich zadumy. Minsk, hety «miły sercu horad moj», pačnie chutka mianiacca stychijna i stanie padobny na mnohija harady biez architekturnaha minułaha ŭ adstałych krainach. A moža, usio ž taki hramadstva pračniecca i adčuje kalektyŭnuju adkaznaść za los našaj stalicy?
U Minsku ŭžo mnoha razoŭ pačynali łamać isnujučaje i pierakrojvać niezavieršanaje. Para ŭžo spynić hetuju niedarečnuju tradycyju i pačać pa‑ieŭrapiejsku źbierahać i pavažliva dapracoŭvać toje kaštoŭnaje, što my ciapier majem.
Chto buduje
TAA «Trajpł», jakoje naležyć blizkamu da biełaruskich uładaŭ biznesoŭcu Juryju Čyžu (na fota), uładalniku minskaha futbolnaha kłubu «Dynama».
Što budujuć
Žyły kompleks z ubudavanymi administracyjnymi i handlovymi pamiaškańniami i haražom‑stajankaj.
Chto sprajektavaŭ
Toj samy architektar Aleh Ładkin, što, razam ź Juryjem Hryhorjevym, byŭ aŭtaram prajektu «Domu na nabiarežnaj» (vuł.Staražoŭskaja, 8).
Kali skončać
Terminy budaŭnictva akreślenyja ad studzienia 2009 da sakavika 2012 h.
Schiematyčnaja maštabnaja vyjava siłuetu kompleksu ŭmantavana ŭ fotazdymak.
Mienavita z hetaha rakursu bolšaść minčukoŭ buduć bačyć hmach.
Navat na rekłamnaj kampjuternaj vyjavie kompleksu bačna,
što hety abjekt niepamierna vialiki dla miesca, dzie jaho zbirajucca pabudavać.
