Fota Julii Daraškievič.
Alaksandr Łukašenka pryniaŭ adstaŭku ministra ŭnutranych spravaŭ Uładzimira Navumava. Aficyjnaja traktoŭka – pa stanie zdaroŭja, paviedamlaje «Interfaks».
Svaju pasadu Navumaŭ zajmaŭ ad vieraśnia 2000 hodu, kali zamianiŭ na joj Juryja Sivakova. Padčas pracy ministram Navumava MUS nieadnarazova zaplamlivała siabie ŭ represijami suprać inšadumcaŭ.
Adstaŭka Navumava mahła stać vynikam baraćby hrupovak za ŭpłyŭ u atačeńni Alaksandra Łukašenki.Vyhladaje na toje, što pieramahaje taja hrupa, jakaja vystupaje za palapšeńnie adnosin ź Jeŭrasajuzam. Uładzimir Navumaŭ, jaki padazrajecca ŭ datyčnaści da źniknieńnia apazicyjnych palitykaŭ i žurnalistaŭ, i pa siońniašni dzień zastavajecca ŭ śpisie nievyjaznych u Jeŭrasajuz, nie vielmi pryvabna hladzieŭsia na čale adnaho ź viadučych siłavych viedamstvaŭ.
Taksama varta adznačyć, što na minułym tydni ŭ internecie źjaviŭsia adkryty list na imia ministra ŭnutranych spraŭ Uładzimira Navumava nibyta ad jahonych padnačalenych. U liście rezka krytykavałasia praca ministra. Hety nieviadoma kim napisany list i moh być apošniaj kroplaj u abhruntavańni adstaŭki.
Cikava, što aficyjnaja traktoŭka hučyć «pa stanie zdaroŭja». Chacia jašče ŭ pačatku sakavika na pres‑kanfierencyi da Dnia milicyi Navumaŭ usurjoz razvažaŭ pra mahčymaść uzychodžańnia na Džamałunhmu. Adzinaje, jak pryznaŭsia ministr, što jamu zaminała — heta rasśledavańnie spravy vybuchu 4 lipienia.
U piatnicu padčas uručeńnia kubku čempijona Biełarusi pa chakiei Ŭładzimir Navumaŭ vyhladaŭ vielmi zmročna. Napeŭna, jon užo viedaŭ pra budučuju adstaŭku.
