Adstaŭka Navumava — apošni akt u pracesie adchileńnia ad upłyvu kaliści mahutnaj hrupy na čale z Šejmanam. U składzie ŭłady źnikła važnaja prarasijskaja łabisckaja hrupa. Kamientuje Andrej Lachovič.
Adstaŭka Navumava źjaŭlajecca zakanamiernaj u śviatle źmienaŭ, jakija adbyvajucca ŭ Biełarusi. Z adnaho boku, ułada choča pakazać Zachadu na hetyja źmieny. Ź inšaha boku, adstaŭka śviedčyć hałoŭnym čynam pra tyja źmieny, pra jakija ŭłada nie havoryć. Ale mienavita hetyja źmieny vyznačajuć charaktar raźvićcia sytuacyi ŭ Biełarusi.
6 krasavika Łukašenka pryniaŭ adstaŭku ministra ŭnutranych spraŭ Uładzimiera Navumava.
Nie vyklikaje davieru farmalnaje tłumačeńnie pryčyny adstaŭki. U. Navumaŭ zusim niadaŭna demanstravaŭ vydatnuju fizyčnuju formu.
Naŭrad ci padstavaj dla adstaŭki stała niadaŭniaje raspaŭsiudžańnie ŭ Internecie zvarotu ananimnych supracoŭnikaŭ pravaachoŭčych orhanaŭ, u jakim vykazvalisia pretenzii da Navumava.
Taksama jość padstavy sumniavacca i ŭ inšych pryčynach adstaŭki, jakija nazyvajuć šerah ahladalnikaŭ. U pryvatnaści, śćviardžajecca, što pad kiraŭnictvam Navumava tak i nie było raskrytaje samaje hučnaje złačynstva apošniaha času - vybuch na aficyjnym kancercie na Dzień Niezaležnaści 3 lipienia 2008 h. Adnak raśśledavańnie hetaha złačynstva pavinna było znachodzicca ŭ viadzieńni nia MUS, a KDB, jak i kožnaja kryminalnaja sprava, jakaja adpaviadaje artykułam «teraryzm» i «zamach na žyćcio vyšejšych słužbovych asobaŭ». Toje, što na U.Navumava było ŭskładziena kiraŭnictva śledztvam, aznačała, što ŭžo ŭ lipieni 2008 h. jon byŭ «achviarnym baranam». Jahonaja adstaŭka ŭžo tady była pradvyznačanaja.
Versija, što adchileńniem Navumava Łukašenka choča zadobryć Zachad, kab pajechać u Prahu na samit Uschodniaha partnerstva, maje racyju tolki častkova. Ułada choča vieści dyjaloh z Zachadam. Ale dziela šerahu pryčyn Łukašenka nie źbirajecca jechać u Prahu. Represijami ŭ lutym jon zaśviedčyŭ, što choča vieści dyjaloh, demanstrujučy siłu svaich pazycyjaŭ. Asabista jechać u Prahu aznačała b dla jaho prademanstravać słabaść.
Adstaŭka Navumava źjaŭlajecca zakanamiernaj u śviatle źmienaŭ, jakija adbyvajucca ŭ Biełarusi. Z adnaho boku, ułada choča pakazać Zachadu na hetyja źmieny. Ź inšaha boku, adstaŭka śviedčyć hałoŭnym čynam pra tyja źmieny, pra jakija ŭłada nie havoryć. Ale mienavita hetyja źmieny vyznačajuć charaktar raźvićcia sytuacyi ŭ Biełarusi.
1. Hetym krokam ułada daje pazytyŭny syhnał dla Zachadu.Jana havoryć, što zacikaŭlenaja ŭ praciahu dyjalohu, i što jana sama budzie źmianiacca «ŭ lepšy bok», kali dyjaloh budzie praciahnuty, a Biełaruś budzie ŭklučanaja ŭ prahramu Ŭschodniaha partnerstva.
Ad pasadaŭ vyzvalajucca asoby, najaŭnaść jakich pry ŭładzie stvaraje peŭnyja prablemy ŭ raźvićci adnosinaŭ z Zachadam.
U.Navumaŭ - apošni fihurant spravy ab źnikłych u 1999 h. palitykach-praciŭnikach Łukašenki (u 1999 h. jon uznačalvaŭ Słužbu biaśpieki Prezydenta), jaki znachodziŭsia na vysokaj pasadzie.
2. Heta śviedčyć pra mocnyja pazycyi ŭ składzie kiroŭnaj elity hrupaŭ, jakija vystupajuć za aŭtarytarnuju madernizacyju,za padkantrolnuju, pavolnuju palityčnuju liberalizacyju.
Majecca na ŭvazie hrupa Viktara Łukašenki i hrupa technakrataŭ na čale z premjer-ministram Siarhiejem Sidorskim. Jany inicyjavali bujnyja ratacyi ŭ składzie siłavych i kantrolnych strukturaŭ, akramia inšaha i dziela taho, kab pravieści navierch svaich pryznačencaŭ.
Značeńnie siłavych (KDB, MUS) i kantrolnych (KDK, prakuratura) strukturaŭ u palityčnaj systemie Biełarusi pamianšajecca. Jany znachodziacca pad kantrolem hrupaŭ, jakija vystupajuć za aściarožnyja, praličanyja, ale ŭsio ž - źmieny ŭ Biełarusi.
U.Navumaŭ byŭ apošnim pradstaŭnikom kaliści mahutnaj hrupy siłavikoŭ i kantraloraŭ na čale ź dziaržaŭnym sakratarom Savietu Biaśpieki Viktaram Šejmanam. Adchileńnie Navumava - apošni krok, skiravany na poŭnaje padparadkavańnie katraloraŭ i siłavikoŭ.
3. Stvarajucca dadatkovyja ŭmovy dla ekanamičnaj liberalizacyi.
Čym bolš padkantrolnymi technakratam i hrupie V. Łukašenki rabilisia kantrolnyja i siłavyja struktury, tym bolš aktyŭnyja kroki rabilisia ŭ napramku ekanamičnaj liberalizacyi. Likvidavany presinh siłavikoŭ i kantraloraŭ u adnosinach da dyrektarskaha korpusu. Usio bolš małavierahodnaj robicca antykarupcyjnaja kampanija ŭ adnosinach da ekanamičnaj elity.
4. Praciah čystki ŭ składzie kantrolnych i siłavych strukturaŭ śviedčyć pra toje, što pryjarytetami dziaržaŭnaj palityki źjaŭlajucca ekanamičnaja madernizacyja, palapšeńnie struktury i jakaści (instytucyjanalnych i funkcyjanalnych charaktarystyk) dziaržaŭnaha aparatu.Ekanamičnyja menedžery-technakraty, jurysty i dyplamaty zapatrabavanyja i ŭpłyvovyja. U adroźnieńnie ad siłavikoŭ i kantraloraŭ, jakija apynulisia na druhasnych, padparadkavanych rolach.
Charakterna, što letam 2007 h. chadzili čutki, što U. Navumaŭ budzie pryznačany premjer-ministram. Adnak było zrazumieła, što Navumaŭ nia źmienić Sidorskaha.
U tym liku padvyšajecca vierahodnaść krokaŭ z boku ŭłady ŭ napramku palityčnaj liberalizacyi, bo zaŭvažajecca mocny ŭpłyŭ tych, chto ŭ stanie praličyć hetyja kroki i ich nastupstvy.5. U cełym ułada ŭ Biełarusi robicca bolš prahmatyčnaj, bolš hatovaj da inavacyjaŭ, źmienaŭ.
6. U składzie ŭłady ŭzmacniajecca pradstaŭnictva tych, chto havoryć pa-biełarusku, ličyć siabie biełarusam i eŭrapiejcam(dastatkova pryhadać adpaviednyja zajavy kiraŭnika Administracyi Prezydenta U.Makieja), chto viedaje historyju Biełarusi ŭ jaje niesavieckim razumieńni.
Ułada budzie praciahvać «adbirać» u apazycyi temu biełaruskaj historyi, kultury, movy. Padobna, jak jana raniej užo zabrała temu niezaležnaści Biełarusi.
U.Navumaŭ - naradženiec h.Smalensk (Rasieja). Jon nie vymaviŭ anivodnaha słova pa-biełarusku, u adroźnieńnie ad Makieja, jaki vystupaje na biełaruskaj movie, i navat ad Łukašenki, jaki vymaŭlaje biełaruskija sorvy (naprykład, «fanaberystyja rośsijanie»). Pryjšoŭ čas, kali być pry ŭładzie čysta rasiejskamoŭnym, nia viedać biełaruskaj movy, nie razmaŭlać navat «na trasiancy» aznačaje vyłučacca ŭ horšy bok.
7. Adstaŭka Navumava paćviardžaje, što ŭ składzie ŭłady niama hrupaŭ, jakija mahli b vystupać u roli łabistaŭ rasiejskich intaresaŭ,vystupać za «sapraŭdnuju» intehracyju, jak hetaha choča Rasieja. Ułada dastatkova kansalidavanaja ŭ adnosinach da niezaležnaści Biełarusi. Tamu, pa-pieršaje, Biełaruś nia zrobić krokaŭ u napramku «sapraŭdnaj» intehracyi z Rasiejaj.
Nia budzie zaklučany pad dyktoŭku Maskvy «Kanstytucyjny Akt sajuznaj dziaržavy». Nie adbudziecca abjadnańnia hrašovych systemaŭ. Biełaruś nie pieradaść pad kantrol Rasiei biudžetaŭtvaralnyja pradpryjemstvy.
Biełaruś budzie demanstratyŭna «kročyć na miescy» ŭ pytańniach vajennaj intehracyi. Budzie pravodzić sumiesnyja vučeńni, kab demanstravać rolu «ščyta» suprać NATO, adzinaha sajuźnika. Ale pry hetym nie addaść pad kantrol Rasiei svaju systemu SPA. Nie pojdzie na pavieličeńnie vajskovaj prysutnaści Rasiei. Nie pašle sałdat lić kroŭ za intaresy ADKB , h.zn. Rasiei.
I režym Łukašenki nie pryznaje niezaležnaść Paŭdniovaj Asietyi i Abchazii, bo nia choča być pryviazanym da Rasiei. I nia choča, kab jaho ličyli maryjanetkaj Rasiei.
Pa-druhoje, budzie zachoŭvacca vierahodnaść čarhovaha hazavaha kanfliktu z Rasiejaj. U vypadku cisku z boku Rasiei, vystaŭleńnia nieprymalnych patrabavańniaŭ, jak heta było ŭ studzieni 2004 h., Biełaruś adkaža hetak sama, jak adkazała tady.
Pa-treciaje, Rasieja nia budzie vyłučać na prezydenckich vybarach 2011 h. u Biełarusi svajho kandydata. Budzie pasiŭna ci niepasiŭna (tak ci inakš) padtrymlivać kandydaturu A.Łukašenki.
