Sprava - naleva: Siarhiej Alifiarovič, Taciana Juchnievič, Ihar Makarevič, Alaksandr Pietručenia, fota Radyjo Svaboda.
14 krasavika Homielski abłasny sud vynies prysud čatyrom žycharam vioski Puchavičy Žytkavickaha rajona pa spravie ab zabojstvie imi adnaviaskoŭca Mikałaja Makareviča, jakoha jany padazravali ŭ padpałach ŭ vioscy.
Siarhiej Alifiarovič asudžany na piać hadoŭ pazbaŭleńnia voli z adbyćciom pakarańnia ŭ kałonii ŭzmocnienaha režymu, Ihar Makarevič — da troch hadoŭ pazbaŭleńnia voli ŭ kałonii ŭzmocnienaha režymu.
Sud pryznaŭ ich vinavatymi ŭ zabojstvie (artykuł 139, č. 2).
Pakarańnie pavodle hetaha artykułu praduhledžvaje pazbaŭleńnie voli terminam ad vaśmi da 25 hadoŭ, abo pažyćciovaje źniavoleńnie, abo śmiarotnaje pakarańnie. Pry vyniasieńni prysudu byŭ prymienieny artykuł 70 KK
(przynačeńnie bolš miakkaha pakarańnia, čym praduhledžana za hetaje złačynstva.
Alaksandr Pietručenia i Taciana Juchnievič — da dvuch hadoŭ abmiežavańnia voli biez nakiravańnia ŭ vypraŭlenčyja ŭstanovy.
Kančatkovy termin pakarańnia Taciany Juchnievič z ulikam nieadbytaha pakarańnia pavodle papiaredniaj sudzimaści składzie piać hadoŭ.
Da ŭstupleńnia prysudu ŭ siłu asudžanym u pieršaj instancyi miera strymańnia zastałasia bieź źmienaŭ - chatni aryšt.
Taksama ŭsia čaćviorka razam pavinna vypłacić svajačcy zahinułaha kampiensacyju maralnaha ŭronu ŭ pamiery Br8 młn.
Dziejańni Taciany Juchnievič i Alaksandra Pietručeni pierakvalifikavanyja z "pasobnictva ŭ ździajśnieńnia złačynstva" ŭ "niedaniasieńnie pra ździajśnieńnie złačynstva".
Pradstaŭniki abarony Alifieroviča i Makareviča majuć namier abskardzić prysud.
Prakuror Andrej Bondar učora zapatrabavaŭ pakarać niepasrednych vykanaŭcaŭ zabojstva — Siarhieja Alifiaroviča i Ihara Makareviča — 14 hadami kałonii ŭzmocnienaha režymu; pamahatych: Taćcianu Juchnievič — 8,5, Alaksandra Pietručeniu — 8 hadami źniavoleńnia.
Pavodle A. Bondara, u abvinavačanych byli padstavy niehatyŭna stavicca da zabitaha Mikałaja Makareviča.
Ale im «nichto nie davaŭ prava rasparadžacca čužym žyćciom».
Siońnia abvinavačanyja vystupili z apošnim słovam.
Siarhiej Alifiarovič, kačahar i baćka dvaich małaletnich dziaciej, zajaviŭ: «Mianie padšturchnuŭ na hetaje złačynstva sam Mikałaj Makarevič — tym, što ździekavaŭsia z žycharoŭ vioski, i pahrozami ŭ moj bok.
Ja nie jakiści zabojca ci mańjak. Ja abaraniaŭ svaju siamju. Ja nie chacieŭ zabojstva, ale tak vyjšła. Ja nie chacieŭ zabivać jaho, bo ja kryvi nie chacieŭ i zadavalnieńnia ad hetaha nie atrymlivaŭ.
U tym, što adbyłosia, vinavaty sam paciarpieły, i niachaj jaho radnia złości na nas nie trymaje. Ja vinavaty i pavinien być pakarany. Ja ŭžo i tak pakarany ad Boha. Kali vy chočacie i dazvalaje zakon, nie pazbaŭlajcie mianie voli».
Jašče adzin niepasredny vykanaŭca zabojstva Ihar Makarevič, kazaŭ u apošnim słovie: «Kašmar taho, što adbyłosia, pieraśleduje mianie kožnuju noč». Abvinavačany vykazaŭ žal z pryčyny zdareńnia. Jon ličyć, što «tolki sumlennaj pracaj možna zahładzić svaju vinu».
Taćciana Juchnievič, jakaja ŭ dzień zabojstva razam z Alaksandram Pietručeniem sačyła za Mikałajem Makarevičam i vyniesła kanistru ź bienzinam, kab spalić niabožčyka, viny svajoj nie pryznała. Patłumačyła, što «kali b milicyja niejak abierahała nas, takoha b nie adbyłosia». Jana prasiła dać joj mahčymaść «praciahnuć vychavańnie dziciaci, jakoje zastałosia biez uvahi baćki». Darečy, spadarynia Juchnievič na dzień zabojstva jašče nie adbyła pakarańnie za raniejšaje złačynstva — ranieńnie nažom svajho sužyciela.
***
Žorstkaje zabojstva Mikałaja Makareviča, 1957 hoda naradžeńnia, adbyłosia 31 śniežnia 2008 hoda. Jaho cieła sprabavali spalić, a zatym advieźli i schavali kala vioski Bieleŭ Žytkavickaha rajona.
10 studzienia pa padazreńni ŭ zabojstvie byli zatrymanyja try miascovyja žychary — 1972, 1974 i 1985 hadoŭ naradžeńnia. Ich źmiaścili ŭ śledčy izalatar, adnak 6 lutaha, paśla ŭmiašańnia prezidenta krainy, miera strymańnia była źmienienaja na chatni aryšt.
24 lutaha abvinavačańnie ŭ zabojstvie było pradjaŭlena 21‑hadovaj žycharcy Puchavičaŭ, jakaja raniej była asudžana za naniasieńnie ciažkich cialesnych paškodžańniaŭ svajmu sužycielu i adbyvała pakarańnie ŭ vyhladzie abmiežavańnia voli.
