z prośbaj pieradać adbudavanuju carkvu Śviatoha Ducha im.
Prajekt adbudovy.
Hreka‑katalickija vierniki stalicy źviarnulisia da prezidenta krainy Alaksandra Łukašenki z prośbaj dazvolić im pabudavać chram na miescy carkvy Śviatoha Ducha ŭ Vierchnim horadzie.
U zvarocie zaznačajecca, što ciapier u Minsku naličvajecca čatyry hreka‑katalickija parafii: «Dziakujučy vizitu ŭ Biełaruś dziaržaŭnaha sakratara Vatykana kardynała Tarčyzijo Bertonie adna z parafij atrymała mahčymaść pravodzić nabaženstvy ŭ kaplicy pa vuł. Ardžanikidzie. Try inšyja hreka‑katalickija parafii karystajucca haścinnaściu ryma‑katalickich parafij».
Unijaty narakajuć: «Takoje stanovišča nielha ličyć narmalnym. Užo daŭno naśpieła nieabchodnaść pabudavać u stalicy Biełarusi hreka‑katalicki chram. Na raniejšyja zvaroty hreka‑katoliki atrymlivali ad minskich uładaŭ admoŭnyja adkazy. Ciapier my źviartajemsia da Prezidenta Biełarusi».
Aŭtary zvarotu vitajuć adnaŭleńnie carkvy Śviatoha Ducha, źniščanaj u 1936 h. Na ich dumku, viartańnie chramu kanfiesii, jakaja jaho zbudavała, padkreśliła b unikalny polikanfiesijny charaktar Minska, u centry jakoha ŭ XVII—XVIII ctst. znachodzilisia chramy i manastyry Unijackaj, Pravasłaŭnaj i Ryma‑Katalickaj Cerkvaŭ.
Pad zvarotam padpisalisia doktar histaryčnych navuk Anatol Hryckievič, doktar bahałosłoŭja Iryna Dubianieckaja, doktar fizika‑matematyčnych navuk Jury Chadyka, piśmiennik Uładzimir Arłoŭ, paetka Halina Dubianieckaja, archieołah Edvard Zajkoŭski, historyk Anatol Sidarevič.
Carkva Śviatoha Ducha, zbudavanaja ŭ pieršaj pałovie XVII st., naležała da kompleksu ŭnijackaha, bazyljanskaha klaštaru.
U 1795 h. bazyljanskija manastyry byli začynieny, a carkvu addali pad kafiedralny pravasłaŭny Pietrapaŭłaŭski sabor. Pry caru jaje pierabudavali na maskoŭski ład, a za savietami ŭvohule zburyli. Zachavalisia tolki padmurki, na ich jana i paŭstanie znoŭ.
Pačatak adnaŭleńnia zapłanavany na pačatak leta. Adbudovaj budzie zajmacca KUP «Minskaja spadčyna». Maje być adnoŭleny histaryčny vobraz chramu. Adno što skulptury śviatych na fasadzie vyrašana zamianić na arnamient. Zapłanavana, što ŭ budynku raźmieścicca fiłarmaničnaja zała.
