Treba jašče razabracca, kolki Rasija «vyciahnuła», a kolki «ŭniesła» ŭ ekanomiku Biełarusi. Takoje mierkavańnie ŭ intervju BiełaPAN vykazaŭ rasijski pasoł u Biełarusi Alaksandr Surykaŭ.
Jon zaznačyŭ, što «u suviazi z rostam cen na naftu ŭ 2006—2008 hadach Rasija płaŭna pavyšała ceny na haz: va ŭzhodnienym režymie, u adpaviednaści z zaklučanymi kantraktami na haz i naftu». «Kali ŭ 2006 hodzie suśvietnaja cana (na haz — BiełaPAN.) była 293 dołary, Biełaruś płaciła amal 47 dalaraŭ, heta značyć mienš na 247 dalaraŭ. U 2008 hodzie suśvietnaja cana na haz skłała 409 dalaraŭ, Biełaruś płaciła 128, heta značyć na 281 dalar mienš»,— nahadaŭ dypłamat.
Pavodle słoŭ Surykava, za pieryjad z 2006 pa 2008 hod Biełaruś zapłaciła Rasii za enierhanośbity «prykładna na 10 młrd dalaraŭ bolš, čym raniej». «Ale ŭ toj ža čas, — padkreśliŭ Surykaŭ, —
skrytyja prefierencyi na roźnicy ŭ cenach na enierhanośbity ŭ 2006 hodzie prynieśli ekanomicy Biełarusi 9,4 młrd dołaraŭ, a ŭ 2008 hodzie — 11,5 młrd».
«Niaŭžo heta drenna dla Biełarusi? Vyrasła kankurencyja biełaruskich tavaraŭ na rynkach usich krain. Praŭda, aprača Rasii, dzie ceny raśli nie tak chutka», — zaŭvažyŭ pasoł.
Kiraŭnik rasijskaj dypmisii zajaviŭ, što Biełaruś «nie budzie płacić tyja rynačnyja ceny na enierhanośbity z Rasii, jakija buduć ustanoŭleny dla astatnich imparcioraŭ, bo adsutničajuć vyvaznyja pošliny». A heta «vielmi surjoznaja kankurentnaja pieravaha dla biełaruskaj ekanomiki». «Tamu, kali kažuć, što Rasija niešta adabrała abo vypampavała, treba ŭvažliva razabracca. U mianie ŭražańnie, što navat naadvarot: my «ŭnieśli» ŭ Biełaruś dadatkova 2,5 młrd dalaraŭ», — ličyć Alaksandr Surykaŭ.
Pavodle mierkavańnia pasła, u ekanamičnych adnosinach dźvie krainy pavinny «ŭ tym liku nie naškodzić adna druhoj, kab ekanomiki nie stracili kankurentazdolnaść». «Jašče i dla hetaha sustrakajucca kiraŭniki našych krain», — padkreśliŭ dypłamat.
