Lider Kansiervatyŭna‑chryścijanskaj partyi BNF Zianon Paźniak nia viedaje, ci pajedzie na sustreču z kiraŭnikom MZS Čechii Karełam Švarcenbierham, ale ŭpeŭnieny, što zaprašać Łukašenku na samit EZ było niedarečna. Napiaredadni samitu «Ŭschodniaha partniorstva», jaki projdzie ŭ Prazie 7 maja, ministr zamiežnych spraŭ Čechii Kareł Švarcenbierh zapłanavaŭ sustreču z pradstaŭnikami biełaruskaj demakratyčnaj apazicyi – Alaksandram Milinkievičam, Alaksandram Kazulinym, Stanisłavam Šuškievičam, a taksama lideram KCHP‑BNF Zianonam Paźniakom i staršynioj Rady BNR Ivonkaj Surviłłaj. Sustreča pavinna adbycca 6 maja.
Pra svaje płany i staŭleńnie da samoj hetaj sustrečy, Euramost.org raspavioŭ Zianon Paźniak.
– Ci viedajecie ŭžo ź jakoj pramovaj vy pajedziecie ŭ Prahu, jakija słovy chacieli b skazać ministru zamiežnych spraŭ Čechii i lideram siońniašniaj biełaruskaj apazicyi, jakija buduć tam prysutničać?
– Ja jašče nie vyrašyŭ, ci pajedu ja tudy ŭvohule. Tamu ničoha na hety kont nie mahu skazać.
– U takim vypadku skažycie, kali łaska, ci pavinna być Biełaruś va «Ŭschodnim partniorstvie»?
– Biezumoŭna pavinna!
– Jak vy ŭspryniali navinu pra toje, što Łukašenku zaprasili na hety samit?
– Ja pra heta nieadnarazova kazaŭ i zaraz maje słovy tolki padćvierdzilisia – Jeŭraźviaz sychodzić tolki sa svaich prahmatyčnych intaresaŭ. I dziela hetych intaresaŭ tam hatovy zabycca na kaštoŭniaści i navat na pryncypy demakratyi. Tamu, što pra heta havoracca, spravy pakazvajuć, što karyść z hetaha i maralnuju, i palityčnuju biare tolki režym. I tamu vyhladaje heta vielmi brydka. Bo nielha ŭ hetaj situacyi plavać na narod. Režym hety narod źniščaje, jon jaho nie pavažaje, treciruje jaho movu, kulturu, zakryvaje škoły. Bjuć ludziej pałkami, KDB uryvajecca ŭ damy, ludziej aryštoŭvajuć za ništo, za biełaruskuju movu… Heta strašny ździek ciemry z naroda. I nie ŭličvać takija faktary, zaprašać hetaha ciemrašała, jak byccam ničoha niama – heta pakazvaje na prymityvizm u palitycy. Bo jany, vidać, nie kłapociacca, jak da ich buduć stavicca sami biełarusy. Vidać – tak, jak i da Łukašenki. Tamu, kaniešnie, z punktu hledžańnia narmalnaj palityki, jakaja pavinna być, heta pamyłka z boku Jeŭraźviaza. Heta vielmi prostaje i prymityŭnaje rašeńnie. Možna było heta rašeńnie pryniać, ale zrabić bolš akuratna i prystojna.
– Viartajučysia da zaprašeńnia vas u Prahu 6 maja: vy nie vyrašyli jašče ci pajedziecie na hetuju sustreču. A ŭ čym moža być pryčyna vašaj admovy?
– Pryčyny pakul unutranyja, palityčnyja – ja prosta pavinien bolš dakładna viedać: jaki heta budzie farmat, jakija pytańni, z kim, jak i što. Bo, pa‑pieršaje, heta daloka – ja pavinien budu jechać ź Ńju‑Jorka. A pa‑druhoje, takija pajezdki ŭpustuju nie robiacca i ja pavinien usio ŭzvažyć, abmierkavać infarmacyju. Pakul mnie jašče niedastatkova infarmacyi.
‑‑Jakija buduć vašyja dziejańni, vašy pavodziny, kali na niejkaj z sustrečaŭ u Prazie, kali vy ŭsio ž tudy pajedziecie, vy sustrenieciesia z Łukašenkam?
‑‑Heta ŭmoŭny ład i takija rečy ŭ palitycy biessensoŭna abmiarkoŭvać. Kab dy kaby – heta nie maje absalutna nijakaha značeńnia, tamu ja nie chaču pra heta i havaryć.
‑‑I ŭsio ž – ci padali b vy jamu ruku?
‑‑Ja nie chaču pra heta havaryć, bo heta pytańni vierahodnaściaŭ. Takija pytańni zadajuć tolki z humaram. Tamu ja na jaho nie budu adkazvać.
