Łukašenka źbiraje pijaraŭski plon ź vizitu ŭ Rym. Jon užo retranśluje papu, a ŭ asobie Bierłuskoni znajšoŭ rodnasnuju dušu.
Vizicior zajaviŭ žurnalistam, što ŭ paniadziełak abmierkavaŭ z pantyfikam mnohija prablemy. Chacia sustreča ŭ miežach standartnaha rytuału doŭžyłasia tolki 25 chvilin (uličycie čas na pierakład, abmien padarunkami i h.d.). I ŭvohule, jak padkreślivajuć krynicy ŭ Vatykanie, heta byŭ nie dziaržaŭny, a pracoŭny vizit.
Viadoma, adnak, što Łukašenka ŭmieje vyciskać pijar ź lubych akaličnaściej. Paśla sustrečy z ekstravahantnym Bierłuskoni hość miž inšym zaznačyŭ: «Jaki b jon ni byŭ dyktatar, jak jaho nazyvajuć, ale 75% italjancaŭ jamu daviarajuć».
Paralel bolej čym prazrystaja, i pasaž hety raźličany, kaniečnie ž, nie na zachodnikaŭ, što vydatna viedajuć pra davoli vuzki pravavy kalidor dla kuražu Bierłuskoni, a na ajčynny elektarat. Chaj abyvatal dumaje, što i ŭ Jeŭropie prykładna takija ž paradki, jak i ŭ nas, a Bierłuskoni — heta taki italjanski «baćka».
A voś inšaja prahučałaja ŭ Rymie zajava — pra toje, što naš MZS zaraz pracuje z Pałataj, kab siarod deputataŭ było bolej adzinstva ŭ pytańni Abchazii dy Paŭdniovaj Asiecii (!), naadvarot, skiravana na naiŭnych zamiežnikaŭ. Chaj dumajuć, što parłamientary ŭ nas strašenna samastojnyja, i kiraŭnictva dziaržavy starajecca im naravić jak lichoj skule :)
Karcinki rymskaha vizitu vyhladajuć niejkaj fantasmahoryjaj. Chto b moh takoje ŭjavić paru hadoŭ tamu? Kiraŭnik rymska-katalickaj carkvy atrymlivaje ruskamoŭny bukvar ad Koli Łukašenki, a jahony tata viačeraje ź Bierłuskoni. Pantyfik dy premjer Italii zaprošany ŭ Minsk. Z boku biełaruskaj ŭłady katalikam paabiacany kankardat. Z boku Śviatoha pasadu Kolu padaryli miač i navat dazvolili trochi pahaniać jaho ŭ Apostalskim pałacy.
Dadajcie jašče i sustreču ź vialikim mahistram Maltyjskaha ordena. Naš paspality lud tumanna ŭjaŭlaje, što heta takoje, ale hučyć nadta salidna!
Padać ža vyniki mini-turne ŭ naležnym duchu — sprava techniki. I voś užo ministr zamiežnych spraŭ Martynaŭ zajaŭlaje, naprykład, što ŭ Łukašenki i Bierłuskoni padobnyja pohlady na vyjście z ekanamičnaha kryzisu.
Nie ŭsio, kaniečnie, idzie hładka. Što da ŭdziełu ŭ pražskim samicie «Uschodniaha partniorstva», dyk tut i chočacca i kolecca. Łukašenka paviedamiŭ žurnalistam, što Bierłuskoni chacieŭ by tam jaho bačyć. Ale razam z tym była pradublavana teza, užo ahučanaja ŭ Avalnaj zale padčas prezientacyi štohadovaha pasłańnia. «Kali niekamu niajomka, što na samit pajedzie Łukašenka, to Łukašenki tam nie budzie», — zvykła ŭžyŭ aficyjny kiraŭnik formu treciaj asoby, nibyta havorka pra niekaha inšaha. Napeŭna, pieravažvaje «nie jechać».
Tym časam Maskva starajecca pacichu padpsavać dačynieńni Minska z Zachadam.
Rasijskija miedyi robiać ukidy, ź jakich vynikaje, što Łukašenka nibyta płanuje farsavana ŭzbrojvacca. Maŭlaŭ, nabiare na durnicu novych rakiet dy kompleksaŭ pad markaj adzinaj sistemy supraćpavietranaj abarony dy panastavić hetych cacak na zachodniaj miažy.
Takaja publikacyja źjaviłasia dniami ŭ «Kommiersantie». Pra stupień kampietentnaści aŭtaraŭ śviedčyć chacia b toje, što jany pryličyli da srodkaŭ SPA apieratyŭna-taktyčny rakietny kompleks «Iskander».
Prosta «Iskander» — raskručanaja strašyłka. A zvyšzadača — ulić łyžku dziohciu ŭ amal što miadovyja siońnia dačynieńni Minska ź Jeŭropaj.
Vy źviarnuli ŭvahu, jak chvaravita adreahavaŭ Łukašenka na infarmacyjnuju ataku maskoŭskich ŚMI padčas vystupu ŭ Avalnaj zale 23 krasavika? Maŭlaŭ, «nie treba nam hetych ukidaŭ dy “vutak”, asabliva kali namieciŭsia praces narmalizacyi dačynieńniaŭ ź Jeŭropaj».
Naŭrad ci spadabajecca biełaruskamu kiraŭniku i natacyja z vusnaŭ pradstaŭnika Maskoŭskaha patryjarchatu. Zajavu Łukašenki pra toje, što papa maryć nieŭzabavie sustrecca z kiraŭnikom RPC, pratajarej Antonij Iljin prakamientavaŭ ledzianym tonam: maŭlaŭ, takaja sustreča «nie musić vyznačacca imhniennaj palityčnaj kanjunkturaj» i stanavicca «niejkim šoŭ pierad telekamierami».
Ale ž tut — kamu što. Biełaruski aficyjny kiraŭnik jak čepki prahmatyk akurat vyciskaje maksimum ź niebyvałaj zamiežnapalityčnaj kanjunktury. Imkniecca sabrać najbolšy palityčny plon na chvali biesprecedentnaha šancavańnia na zachodnim kirunku. Pajšła jeŭrapiejskaja karta!
Jeŭropa starajecca niejak zachavać tvar. Rym sustreŭ Łukašenku adkrytym listom ministra zamiežnych spraŭ Fratyni ŭ «Karjere deła sera» z zaklikam pavažać pravy čałavieka.
Łukašenka punktualna vykanaŭ prahramu vizitu, a pierad adlotam zaznačyŭ, što nie maje patreby ŭ paradach zvonku. Aryviederčy, sińjory!
