Nacyjanalny bank Biełarusi nie płanuje pierahladać kalidor vahańniaŭ koštu košyka zamiežnych valut.
Pra heta paviedamiŭ 30 krasavika na pres-kanfierencyi staršynia praŭleńnia Nacbanka Piotr Prakapovič.
Pavodle jaho infarmacyi, kurs biełaruskaha rubla da košyka zamiežnych valut utrymlivajecca ŭ miežach 5-pracentnaha kalidora vahańniaŭ, što dapuskajucca na 2009 hod. Z hetaha hoda Nacbank pačaŭ ažyćciaŭlać pryviazku biełaruskaha rubla da košyka z troch valut — dołara ZŠA, jeŭra, rasijskaha rubla. Kurs biełaruskaha rubla da košyka valut skłaŭ 960 rubloŭ na 1 krasavika, jak i na 2 studzienia.
"Plus-minus 5% — heta taja harantyja stabilnaści kursu nacyjanalnaj valuty, jakaja budzie na praciahu hoda. Nijakich adstupleńniaŭ abo pierahladu ŭ toj ci inšy bok nie budzie", — padkreśliŭ Prakapovič.
"My nie prymajem parady, jakija nam dajuć, što treba pavialičyć devalvacyju, pašyryć kalidor da 10—15%. Rašeńnie, pryniataje 2 studzienia, najbolš prymalnaje ŭ hetych umovach. Kalidor plus-minus 5% my pierahladać nie budziem", — zajaviŭ kiraŭnik Nacbanka.
Pavodle jaho słoŭ, u Nacbanku raźličvajuć utrymlivać kalidor vahańniaŭ u druhim kvartale ŭ miežach plus-minus 1%. "U trecim, čaćviortym kvartałach budziem hladzieć u zaležnaści ad situacyi", — zaznačyŭ hałoŭny bankir krainy.
Piotr Prakapovič taksama zajaviŭ, što Nacbank u trecim kvartale hetaha hoda moža pačać źnižeńnie staŭki refinansavańnia.Jon patłumačyŭ, što heta budzie mahčymym pry dasiahnieńni siaredniamiesiačnaha ŭzroŭniu inflacyi ŭ miežach adnaho pracenta suprać dvuch pracentaŭ u siarednim za miesiac u pieršym kvartale.
Ciapier staŭka refinansavańnia ŭ Biełarusi składaje 14% hadavych. Staŭka refinansavańnia — pracentnaja staŭka, pad jakuju centralny bank krainy vydaje kredyty kamiercyjnym bankam. Jana vyznačaje ŭsie astatnija staŭki pracentaŭ u ekanomicy, adbivajecca na staŭleńni nasielnictva da źbieražeńniaŭ i inviestycyj. Častata źmianieńnia staŭki refinansavańnia zaležyć ad tempaŭ inflacyi i metaŭ hrašova-kredytnaj palityki, što pravodzicca ŭradam i centralnym bankam.
