Kanstatujem sumny fakt: 1 studzienia kiraŭniki Rasiei raptoŭna pachavali ŭsie napracoŭki Danileŭskaha, Chamiakova, Aksakava, Skobieleva i inšych arakułaŭ idei nadnacyjanalnaj abščahi słavianaŭ, u jakoj adnosiny hruntujucca na kaštoŭnaściach braterstva. Pačynajučy z 1.01.06 my nie narody-braty, a rynkavyja subjekty, jakija kantaktujuć pavodle pryncypu "No money - no funny". Załamić z Maciery haradoŭ ruskich udvaja bolš babła za haz, čym ź niejkich turkaŭ - najlepšaje śviedčańnie klimaksu našaha cyvilizacyjnaha fraternite.
Adzin, kamu pašenciła - biełarusy, adnak u rezonach "Hazpromu" mulka nakont słavianskaha pchaj-pchaj taksama nie fihuruje. Biednyja prychilniki Danileŭskaha! Jany trapili ŭ paradaksalnuju sytuacyju. Ciapier, kab zachavać svoj mehaprajekt, abo treba Pucina abvieścić varožym ahientam u Kramli, abo vydać rašeńnie ad 1.01.06 za vypadkovuju pamyłku. Vidavočna, pansłavisty buduć namahacca adkałoć druhi varyjant. Jak?
Z chutkaściu Čypa i Dejła latu im na dapamohu. Adzinym apraŭdańniem rasiejskich mandarynaŭ moža być čas pryniaćcia histaryčnaha rašeńnia - 10.00 1 studzienia. Čas, kali rašeńni možna prymać vyklučna pa adnoj prablemie - jak ź minimalnym hałaŭnym bolem vyjści z navahodniaha kamatozu. Tolki spasyłka na pachmielle ŭratuje našu słavianskuju chatu.
Najlepšym vyjściem budzie publikacyja adpaviednaj redakcyi stenahramy pasiedžańnia Rady biaśpieki Rasiei ad 1.01.06. Kštałtu:
"Pucin (ikajučy): Takim čynam, ja chacieŭ by zasłuchać kiraŭnika ŭradu.
Fradkoŭ (pračynajučysia): Chacieŭ by ahučyć supolnuju dumku: pasłać Ivanova pa piva i vyrubić kamu-niebudź pa prykole haz. Naturalna, nie bratam-słavianam.
Miler (jaho strašna pluščyć): Darečy, prykaliciesia: u chachłoŭ premjer - burat.
Fradkoŭ (pračynajučysia): Vali čukčaŭ. Pišy pastanovu - vyrubić buratu haz i pasłać Ivanova pa piva.
Pucin (ikajučy): Takim čynam, ja chacieŭ by zasłuchać kiraŭnika ŭradu…"
Dla praŭdzivaści možna pryłažyć ček ab nabyćci Ivanovym dźviuch "sisiek" "Arsenalnaha". Adnak heta ŭžo detali. Hałoŭnaje nie marudzić z tłumačeńniami, kab spoŭniłasia mara Danileŭskaha: "I svody drievnije Sofii / V vozobnovlennoj Vizantii / Vnov osieniat Christov ałtaŕ! / Padi pried nim, o Caŕ Rośsii, / I vstań, kak Vsiesłavianskij Caŕ!"
