Ale dadaŭ, što prahramie nie staje vyrazna prapisanych miechanizmaŭ realizacyi i prahnozaŭ vynikaŭ jaje ažyćciaŭleńnia.
«Prapanovy razumnyja i realnyja, niekatoryja ź ich jość i ŭ nas, ale zastajecca pytańnie miechanizmaŭ realizacyi», — tak acharaktaryzavaŭ antykryzisnuju płatformu Abjadnanych demakratyčnych siłaŭ pieršy namieśnik ministra ekanomiki Andrej Tur na pres‑kanfierencyi 13 traŭnia ŭ Minsku.
Jaho paprasili raspavieści pra apošniaje pasiedžańnie Hramadska‑kansultacyjnaj rady pry Administracyi prezidenta z udziełam eks‑staršyni Nacbanku Stanisłava Bahdankieviča i ekanamista Leanida Zaiki, na jakoje presa nie patrapiła. A. Tur prakamientavaŭ niekatoryja punkty antykryzisnaj prahramy apazicyi.
«Voś prapanujecca pavialičyć zvolnienym supracoŭnikam vypłaty pa biespracoŭi da pamieru pražyćciovaha minimumu.
I dzie ŭziać takija hrošy?
U prahramie heta płanujecca zrabić za košt skaračeńnia štatu čynoŭnikaŭ, ale, skažu ja vam, na ŭtrymańnie čynoŭnikaŭ u biudžecie zakładziena tolki 0,8% srodkaŭ».
Kažučy pra reformy ŭ śfiery pradprymalnickaj dziejnaści, namieśnik ministra zaŭvažyŭ: «Prapanujecca vyzvalić ad padatkaŭ zarehistravany IP na try hady. My ŭžo prachodzili heta — rehistrujecca čałaviek, pracuje, pakul dziejničaje lhotny padatkovy režym i potym likviduje pradpryjemstva. A praz peŭny čas rehistruje novaje».
Čynoŭnik nazvaŭ vydatnaj ideju ekanamistaŭ ADS skaracić padatak u piensijny fond z 35 da 20%, ale tut ža padkreśliŭ, što pry hetym nie zrazumieła, jakim čynam taki krok kampiensavać.
Pieršy namieśnik ministra niekalki razoŭ padkreśliŭ, što pasył u prahramy ADS charošy, ale joj brakuje vyrazna prapisanych miechanizmaŭ realizacyi, a taksama prahnozaŭ vynikaŭ jaje ažyćciaŭleńnia.
