Stomlenyja analizami
Rolik u YouTube'i, dzie bandziukavatyja žychary Harlema nazirajuć pa televizary za pacałunkam doktara Chaŭza z hałoŭuračom Kadzi, sabraŭ vializarnuju kolkaść prahladańniaŭ, nie kažučy pra samu novuju častku papularnaha sieryjała. Choć «Doktar Chaŭz» pa‑raniejšamu na kani, ale adčulisia pryznaki raspadu: siužetnyja linii štosieryi paŭtarajucca i nabivajuć askomy, ci naadvarot — jak u vypadku z pacałunkam, latuć ŭ dzikija vyšyni. Amatary jakasnych sieryjałaŭ pakrysie stali hutaryć pra novuju krynicu svajho natchnieńnia. I chaj paralelna dosyć paśpiachova iduć dziaduli‑vieterany, sieryjały «Simpsany» i «Paŭdniovy Park», hledačam chočacca čahości naviutkaha. Takim paradkam, chto zastupić «Doktara Chaŭza»?
1. Sieryjał «Schłuś mnie» (rus. «Tieorija łži», anh. - Lie to me). Vyjšaŭ na ekrany ŭ studzieni 2009, ciapier idzie 1-y siezon.
 |
Čym nie zamiena charyzmatyčnamu doktaru i jahonaj chieŭry: analityčnaja hrupa na čale z Kołam Łajtmenam ź sieryi ŭ sieryju biarecca za rasśledvańnie kryminalnych spravaŭ. Łajtmenaŭcy — śpiecyjalisty pa tłumačeńni mimiki i movie cieła śviedkaŭ i mierkavanych złačyncaŭ.
Usie vymyślenyja historyi ŭ sieryjale «Schłuś mnie» dublucca realnymi kadrami z suśvietnaj palityki: Bił Klintan, kali jon chłusiŭ amierykanskamu narodu, što ŭ jaho nie było nijakaj suviazi z Monikaj Levinski, dakranajecca da vusnaŭ, abo Buš, sa svajoj niapraŭdaj pra atamnyja raspracoŭki irakcaŭ, što padčas publičnaj pramovy maje žesty, jakija vydajuć jaho z vantrobami.
Hieroj Tyma Rota, vykanaŭcy hałoŭnych rolaŭ u «Šalonych psiukach» i «Čatyroch pakojach», — nie raŭnujučy jak Chaŭz talenavity ŭ svajoj spravie admysłoviec, taki ž demaničny i despatyčny, taki ž luty da padnačalenych i ŭsich astatnich, i taki ž ahidny až da pryciahalnaści. Čaho brakuje? U natury śpieca Łajtmena niama čarvatočynki, ułasnaj prablemy, jakaja tak vabić u hrechavodnym doktary. U Łajtmena siamja, dačka, nie narkaman, nie chulihan, ale sieryjał dynamičny, i majem asałodu pačakać, panazirać za raźvićciom charaktara hałoŭnaha hieroja: Chaŭzami nie naradžajucca.
2.Sieryjał «Teoryja vialikaha vybucha» (anh. - The Big Bang Theory). Pieršy siezon vyjšaŭ na ekrany ŭ 2007 hod. Ciapier skončyŭsia 2-i siezon.
 |
Kamiernaja, ale daścipnaja kamiedyja situacyjaŭ. Sieryjał pra žyćcio 4 maładych fizikaŭ, dzie rupliva ekspłuatujucca ŭsie stereatypy nakont batanika-akularykaŭ: Voś Šełdan, jaki z adnaho boku atrymaŭ hodnaść doktara fizika ŭ 15 hadoŭ, ale ź inšaha - absalutna niamohły ŭ štodzionnym žyćci: niečullivy snob z poŭnaj adsutnaściu pačućcia humaru. Chovard Vołavic - damarosły Žyhała, jaki dahetul žyvie z despatyčnaj matkaj (viadoma, sam Vołavic śćviardžaje, što mama žyvie ź im). A voś fizik indyjskaha pachodžańnia Radžeš, jakomu naturalnym kažučy zabiraje movu, kali da jaho nabližajecca žančyna. I kab padściabnuć siužet stvaralniki sieryjału vyrašyli pasialić pobač ź fizikami efiektnuju 100-adsotkavuju blandynku Peni, jakaja pracuje aficyjantkaj. Vielmi, vielmi niepasrednaje dziaŭčo, poŭnaja procilehłaść čaćviercy fizikaŭ-nadchmarščykaŭ, jakaja, niahledziačy na zavumnyja vybryki cichoniaŭ, pakrysie, uciamiŭšy ich žarty i ład žyćcia, robicca ich najlepšaj siabroŭkaj. Vysnova: hienii taksama ludzi… tyja jašče ludzi.
Kab pahladzieć hetyja sieryjały nie abaviazkova čakać pakul BT abo rasiejskija kanały zakupiać čarhovy siezon. Ciapier ich možna nabyć na knižnych kiramašach: sieryjały tam pradajuć razam z poŭnamietražnymi stužkami.
3.I nastatak - napaŭzabyty animacyjny sieryjał «Sabakakot», abo «Kotasabaka» (anh. – CatDog). Sieryjał išoŭ z 1998 h. da 2004.
Hety nieabłaščany u svoj čas uvahaj ajčynnaha hledača sieryjał, ciapier, dziakujučy biełaruskamu filijału MTV, pieražyvaje svoj tryumfalny kambek.
 |
Multyplikatary, peŭna, paddalisia pačućciu cikaŭnaści: što budzie, kali złučyć dvuch najlepšych siabroŭ čałavieka ŭ adzin kvitniejučy viasioły arhanizm. Złyja jazyki kažuć, što stvaralniki vobrazu kuryli mnoha lohkich narkotykaŭ, bo atrymałasia nadzvyčaj strakata i miescami psichadelična: karystajučysia pieravahami svajho dvuadzinaj pryrody, sabakakot tušyć pažary, rasśleduje zabojstvy i ratuje śviet. Naprykład: dyktatar krainy žyviołaŭ, zialony trus, ŭvodzić abaviazkovaje licenzavańnie dla ŭsich źviaroŭ: kštałtu «Dakažy, što ty nie viarblud». Kot licenzavańnie prachodzić (jon chitrejšy), a jaho sabačaja častka — nie. Pałovu cieła sabakakata sadziać u turmu. Ale dziakujučy tamu, što druhuju pałoŭku ŭsio ž nie pasadzili, dyk sabaka praz ahulny straŭnik pasyłaje zapisačku katu na volu, a toj pierasyłaje praź siabie da nazad piłu, vyzvalaje nie tolki častku svajho cieła, ale adnym zachadam i inšych žyviołaŭ‑viaźniaŭ . Jak treš — to adno čuć‑čuć, a tak zbolšaha daścipnaje hladźvo dla adpačynku.
P.S. Žyvy kuryłka! U «Paŭdniovym Parku» darečy, niadaŭna była absalutna kamiednaja sieryja pra zmročny bok dziciačych hierojaŭ: Miki Maŭs na pasadzie dyrektara kinakampanii biaźlitasna łupcuje za najmienšaje nieparadkavańnie svaich padnačalenych‑ludziej.
