Ab hetym paviedamiŭ śledčy Mienskaha RUUS major milicyi Siarhiej Bułko.
Pavodle jahonych słoŭ, pakolki źniščanyja pamiatnyja kryžy nie źjaŭlajucca historyka-kulturnymi kaštoŭnaściami, kryminalnaja sprava była pierakvalifikavanaja i 27 maja maładym ludziam było pradjaŭlena abvinavačańnie pa častcy 2 artykuła 339 Kryminalnaha kodeksa (złosnaje chulihanstva), jakaja praduhledžvaje aryšt na termin ad troch da šaści miesiacaŭ, abo abmiežavańnie voli na termin da piaci hadoŭ, abo pazbaŭleńnie voli na termin ad adnaho hoda da šaści hadoŭ. Upieršyniu za mnohija hady śledstva pradjaviła abvinavačańnie kankretnym asobam, jakija padazrajucca va ŭčynieńni aktaŭ vandalizmu ŭ Kurapatach.
Jak zaznačyŭ S.Bułko, 30 traŭnia prakuratura Minskaha rajona zaćvierdziła jaho pastanovu ab amnistyi abvinavačanych, jakija dali zhodu na taki zychod spravy. Pavodle ich słoŭ, hetaja miera była ŭžytaja ŭ adpaviednaści ź niadaŭnim zakonam ab amnistyi ŭ suviazi z 65-hodździem vyzvaleńnia Biełarusi ad niamiecka-fašysckich zachopnikaŭ, bo maładyja ludzi ŭ čas učynieńnia złačynstva byli niepaŭnaletnimi, a artykuł, pa jakim jany abvinavačvalisia, padpadaŭ pad pałažeńni zakona ab amnistyi.
Nahadajem, 11 listapada 2008 hoda Baraŭlanskim adździełam UUS Minskaha rajvykankama była raspačata kryminalnaja sprava pa častcy 2 artykuła 346 Kryminalnaha kodeksa (źnievažańnie historyka-kulturnych kaštoŭnaściej) u dačynieńni da dvuch niepaŭnaletnich žycharoŭ Minska, zatrymanych uviečary 1 listapada 2008 hoda na terytoryi historyka-kulturnaj kaštoŭnaści I katehoryi «Miesca źniščeńnia achviar palityčnych represij 1930—1940-ch hadoŭ va ŭročyščy Kurapaty», jakija padazravalisia ŭ źniščeńni pamiatnych kryžoŭ.
11 studzienia 2009 hoda śledčy Baraŭlanskaha adździeła Minskaha RUUS Alena Chilčuk spyniła kryminalny pieraśled padazronych, matyvujučy svajo rašeńnie tym, što dokazaŭ, atrymanych padčas rasśledavańnia, niedastatkova dla pieradačy spravy ŭ sud i pryciahnieńnia da kryminalnaj adkaznaści maładych ludziej — navučencaŭ škoły i praftechvučylišča.
U kancy studzienia namieśnik prakurora Minskaha rajona Ernest Kajro pryznaŭ «niezakonnym i nieabhruntavanym» rašeńnie Chilčuk ab spynieńni kryminalnaha pieraśledu maładych ludziej, a taksama ab prypynieńni papiaredniaha rasśledavańnia pa kryminalnaj spravie z-za taho, što nie ŭstanoŭlena asoba, jakaja padlahaje pryciahnieńniu da adkaznaści ŭ jakaści abvinavačanaj. 29 studzienia kryminalnaja sprava z ukazańniami była nakiravanaja ŭ Minski RUUS dla dadatkovaha papiaredniaha rasśledavańnia. Z 28 lutaha spravu vioŭ śledčy S.Bułko.
Ciapier pa faktach vandalizmu ŭ Kurapatach rasśledujucca jašče dźvie kryminalnych spravy.
