Vice-premjer Rasii Alaksiej Kudryn adkazaŭ na zajavy kiraŭnika Biełarusi.
Vicie-premjer, ministr finansaŭ Rasii Alaksiej Kudryn ličyć nieabhruntavanymi zajavy prezidenta Biełarusi Alaksandra Łukašenki, jaki pryraŭniaŭ rasijskija finansavyja ŭłady da biełaruskaj apazicyi.
«Ja źviarnuŭ uvahu na vystupy Łukašenki. Kali tyja, chto žadaje dapamahać Respublicy Biełaruś i žadaje zbałansavanaj i stabilnaj ekanomiki, pryraŭnoŭvajucca da apazicyi, to ja tady nie razumieju, što ž patrebna Respublicy Biełaruś», — zajaviŭ Kudryn na bryfinhu žurnalistam 1 červienia.
Jak paviedamlaje RIA Novosti,
vicie-premjer nahadaŭ, što za apošnija paŭtara hoda Rasija vydała Biełarusi kredyty na sumu kala $3 młrd. Pry hetym jon adznačyŭ, što kredyty pradstaŭlalisia na peŭnych umovach. U pryvatnaści, pry vyłučeńni čarhovaha tranša da takich umovaŭ adnosilisia biezdeficytny biudžet, zamarožvańnie zarobkaŭ, pavyšeńnie taryfaŭ, praviadzieńnie devalvacyi.
«Kali my kažam pra toje, što treba praciahvać peŭnyja miery, raptam heta vyklikaje takuju niečakanuju reakcyju. Nam heta niezrazumieła. Da ŭmovaŭ ekanamičnaha charaktaru i krytyki ŭrad Biełarusi apynuŭsia nie hatovym», — padkreśliŭ Kudryn.
Pa jaho mierkavańni, siońniašniaja situacyja «jašče bolš stavić pytańnie pra toje, što takaja padtrymka moža apynucca biezvynikovaj i nieefiektyŭnaj».
Jak raniej paviedamlaŭ BiełaPAN, 28 maja ŭ Minsku Alaksiej Kudryn zajaviŭ žurnalistam, što Rasija adkładaje vydzialeńnie Biełarusi čarhovaj tranšy kredytu ŭ $500 młn. Pa jaho słovach, vydzialeńnie tranša zaležyć ad ekanamičnaj palityki dziaržavy. «Heta źviazana z tym, što ŭ biełaruskaj ekanomicy ŭzmacniajucca dyspraporcyi i dysbałansy, — patłumačyŭ Kudryn. — Na naš pohlad, urad Biełarusi prymaje niedastatkovyja miery, kab zabiaśpiečyć płaciežazdolnaść svajoj ekanomiki». U Biełarusi, pa jaho słovach,
«idzie štučnaje adciahvańnie kryzisnych źjavaŭ» za košt «masiravanaj kredytnaj padtrymki».
U piatnicu, 29 maja, na naradzie ŭ Minsku pa biahučym pytańniam sacyjalna-ekanamičnaha raźvićcia krainy Łukašenka zapatrabavaŭ ad uradu «nie kłaniacca» pierad Rasijaj, a iści «šukać ščaścia ŭ inšym baku płaniety».
«My ŭčora nazirali cikavuju situacyju, kali prezident Biełarusi siadzić z Uładzimiram Pucinym i absalutna na siabroŭskaj nocie abmiarkoŭvaje pytańni, pačynajučy z pryvatnych i skančajučy dziaržaŭnymi. I narmalnaje idzie abmierkavańnie. A ŭ hety čas Kudryn daje pres-kanfierencyju pierad pasiedžańniem sajuznaha Saŭmina, sutnaść jakoj — pasiejać paniku ŭ Biełarusi. Jon całkam kansalidavaŭsia z našymi admarozkami, jakija tut na zachodnija hrošy viakajuć i pačynajuć nas vučyć pracavać. Kali ŭ ich takaja charošaja ekanomika, dyk 10% padzieńnia VUP adkul? U nas inšaja ekanomika, ale dajem 1,5% rostu VUP», — zajaviŭ Łukašenka.
