Cytujučy radok adnaho vieršy «Pracavityja i zdolnyja, biełarusy ŭsiudy jość…», možna adznačyć, što jość jany i ŭ Estonii. I ich niamała.
Etničnych biełarusaŭ u Estonii pa statystycy 17 tysiač čałaviek. U Estonii isnuje taksama i prykładna 20 arhanizacyj biełaruskaj dyjaspary. Niekatoryja ź ich bolšyja, niekatoryja mienšyja, a niekatoryja abjadnoŭvajuć usiaho niekalki čałaviek.
Naohuł ža ŭsiu biełaruskuju dyjasparu ŭ Estonii ciapier niefarmalna padzialajuć na dźvie hrupy — heta tak zvanaja «staraja» i «novaja» dyjaspara. Dla staroj dyjaspary Biełaruś źjaŭlajecca rajem na ziamli, kraina dla pierajmańnia va ŭsich adnosinach. Pradstaŭniki staroj dyjaspary ŭ Biełarusi byvajuć redka abo byli vielmi daŭno, infarmacyju čerpajuć z rasijskich ŚMI i spadarožnikavaha «Biełaruś TB». Infarmacyju ab tym, što ŭ Biełarusi nie ŭsio tak hładka, jak zdajecca, jany ŭsprymajuć vielmi varoža. Im pryjemna žyć mifami. U pryncypie, jak i šmatlikim biełarusam u Biełarusi. Siaredni viek hetych ludziej 55—60 hadoŭ.
Ich niefarmalnym lideram źjaŭlajecca Nina Savinava, lider talinskaj staroj dyjaspary, jakaja maje dobryja ŭzajemaadnosiny ź biełaruskim konsulstvam i prapahanduje isny ŭ Biełarusi režym u Estonii. Try razy ŭ miesiac na estonskim «Radyjo‑4» vychodzić hadzinnaja pieradača «Baćkovŝina» (arfahrafija nazovu zachavanaja), dzie jana razam sa svaim siabram, byłym homielskim palitykam Arturam Curbakovym, raspaviadaje dla staroj biełaruskaj dyjaspary, jak dobra ŭ Biełarusi, rekłamujučy biełaruskija sanatoryi i abychodziačy prablemy i vostryja kuty.
Novaja dyjaspara abjadnoŭvaje biełarusaŭ, jakija viedajuć Biełaruś nie tolki jak krainu vialikaha narodu i pryhožaj pryrody, ale i jak krainu, u jakoj jość i prablemy. Lideram hetaj dyjaspary ja by nazvaŭ Juryja Jurkieviča, etničnaha biełarusa, jaki naradziŭsia i vyras u Estonii, daskanała viedaje historyju Biełarusi i biełaruskuju movu, pracuje ŭ talinskaj meryi, siabra Rady BNR. Dla mianie heta dobry prykład taho, što sapraŭdny biełarus moža być biełarusam, da taho ž paśpiachovym, u luboj krainie.
Lideram novaj dyjaspary možna taksama nazvać i Paŭła Marozava, palityčnaha ŭciekača ź Biełarusi, vysiłkami jakoha arhanizoŭvajecca bolšaść biełaruskich mierapryjemstvaŭ u Estonii.
Treba addać naležnaje ŭ płanie zachavańnia kultury Biełarusi i tym, i inšym — usie biełarusy ŭ toj abo inšaj stupieni pačuvajucca biełarusami, zachoŭvajuć našu kulturu i heta hałoŭnaje.
