Hurt Naka vystupaje pieravažna ŭ Rasiei i Ŭkrainie.
U miežach prajektu «Tuzin. Pierazahruzka» internet‑partału «Tuzin Hitoŭ» i hramadzkaj kampanii «Budźma biełarusami» biare ŭdzieł hurt Naka. Pa‑biełarusku zahučyć ich pieśnia, jakaja tak pryjšłasia daspadoby zaŭsiodnikam rasiejskich rok‑festaŭ — «Doroha». Vakalistka hurtu Nasta Špakoŭskaja ličyć, što było by hłupstvam admaŭlacca ad udziełu ŭ hetym prajekcie: «Naša mova piavučaja, pryhožaja i maje ŭ svajoj hetaj piavučaści šmat niuansaŭ, jakich niama ŭ movie rasiejskaj».
Hurt Naka http://www.naka.by vyłučajecca z ajčynnych kamandaŭ ekspresiŭnaściu, ščyraściu i… nachabnaściu. Za piać hod svajho isnavańnia hurt paśpieŭ vystupić na adnoj scenie sa šmat jakimi zorkami – ad «Čiža» da Bloodhound Gang. Jany – stałyja ŭdzielniki rasiejskich piŭnych festaŭ («Krylja», «Okna otkroj») i składanak tamtejšaha roku («Ochota», «Dajoš rok»). Na druhi hod svajho isnavańnia hurt užo mieŭ kantrakt z rasiejskaj kampanijaj «Prołoh‑mjuzik (RDM)», ratacyi na radyjostancyjach i anšlahavyja solnyja kancerty.
Pry tym, što ŭ Rasiei (dy Ŭkrainie) muzyki pačuvajucca bolš upeŭniena, jany ličać siabie biełarusami. «Heta sapraŭdny biełaruski rok», — takim čynam pradstaŭlajucca pieśni na aficyjnaj staroncy hurta z ułasnymi MP3 http://www.naka.by/mp3_lyrics.htm. Pry tym, što vakalistka Naka (i pa sumiaščalnictvie aktorka Ruskaha dramatyčnaha teatru) Nasta Špakoŭskaja śpiavaje pa‑rasiejsku, biełaruskaja mova dla jaje – samaja‑samaja: «Naša mova piavučaja, pryhožaja i maje ŭ svajoj hetaj piavučaści šmat niuansaŭ, jakich niama ŭ movie rasiejskaj», — kaža śpiavačka.
Nasta zaŭždy maje svoj pohlad na toje, što adbyvajecca naŭkoł. Padčas padziejaŭ uviesnu 2006 hodu jana publična vykazałasia ad imia ŭsioj hrupy ŭ padtrymku zatrymanych na Kastryčnickaj płoščy, a potym vystupiła ŭ abaronu kaściołu śviatoha Jazepu ŭ Miensku, zamiest jakoha planavaŭsia hatel.
Pieršy dysk kamandy pad nazvaj «Tiebie» źjaviŭsia ŭ 2005 hodzie i całkam dasiažny dla spampavańnia na ich sajcie. Ciapier hurt aktyŭna pracuje nad svaim druhim albomam pad nazvaj «Pora», ale z zadavalnieńniem pryniaŭ prapanovu ŭziać udzieł u prajekcie «Tuzin. Pierazahruzka». «Było by hłupstvam jaje nie pryniać, bo siońnia rok‑muzyki majuć nia tak šmat mahčymaściaŭ vychadu da słuchačoŭ, — kaža Nasta Špakoŭskaja. — Da ŭsiaho, dla mianie samoj vialikaja intryha ŭ tym, jak zahučyć naša pieśnia pa‑biełarusku». Dla pieraasensavańnia hurt abraŭ adzin z svaich hałoŭnych hitoŭ – pieśniu «Doroha». Za jaje pierakład voźmiecca Hleb Łabadzienka http://labadzenka.by.
Nastupny ŭdzielnik «Pierazahruzki» budzie pradstaŭleny 5 červienia.
Daviedka: U prajekcie «Tuzin. Pierazahruzka» internet‑partału «Tuzin Hitoŭ» i hramadzkaj kampanii «Budźma biełarusami» biaruć udzieł 12 samych cikavych ajčynnych niebiełaruskamoŭnych vykanaŭcaŭ roznych stylaŭ, jakich łučyć aryhinalnaść materyjału, prafesyjnaść u muzyčnym padychodzie i žadańnie ekśpierymentavać. Kožny ź ich pierazapiša adzin z svaich hitoŭ u biełaruskamoŭnym varyjancie, vykananym prafesyjnym pierakładčykam. Usie pieśni buduć prezentavanyja na staronkach http://music.fromby.net i http://www.budzma.org/
Infarmacyjnyja partnery akcyi «TUZIN. PIERAZAHRUZKA»:
Internet‑partał TUT.BY
Pieršaja prafesyjnaja radyjostancyja bajnetu – Netradio.by
Pieršaja biełaruskaja hazeta – «Naša Niva» (www.nn.by)
Pieršaja biełaruskaja transpamiežnaja FM‑stancyja – Radyjo Racyja www.racyja.com (98,1 FM u Harodni i Biełastoku)
Prahrama «Prodvižienije» (štoniadzielu apoŭnačy, štosieradu apoŭdni na telekanale «Ład»)
Prahrama «Novaja ziamla» (štočaćvier a 23‑aj hadzinie na Radyjo Unistar www.unistar.by (99,5 FM u Miensku, 102,3 FM u Bieraście).
