Pakul vulica poŭnicca čutkami pra devalvacyju, u ścienach Nacbanku praciahvajuć raspracoŭvać hrošy, jakich, chutčej za ŭsio, mierkavanaje abiasceńvańnie nie začepić.Bolš za toje: pakolki hutarka viadziecca pra pamiatnyja maniety z abmiežavanym nakładam, dyk z kožnym hodam ich cana (prynamsi siarod kalekcyjanieraŭ‑numizmataŭ) budzie niaŭchilna raści.
U minułyja hady vyjšli sieryi manietaŭ «Kazki narodaŭ śvietu», «Śviaty i abrady biełarusaŭ». Chit ža hetaha siezonu – «Znaki zadyjaka»: užo vyjšli maniety sa vyjavami Rybaŭ, Aviena, Cialca, Bliźniataŭ, a da kanca hoda sieryja musić dapoŭnicca da 12 asobnikaŭ.
«My starajemsia vypuskać maniety sa znakami Zadyjaka svoječasova: voś pry kancy sakavika vypuścili asobnik z vyjavaj Bliźniataŭ, z takim raźlikam, kab pry kancy maja ludzi hetaha znaku ŭžo zmahli nabyć jaho, ci atrymać u jakaści padarunka. Siońnia padpisany ŭkaz pra vypusku maniety ź Dzievaj, čyjo panavańnie prypadaje na vierasień», — adkazvaje paviesialeły (peŭna tamu, što jaho nie pytajuć "devalvacyjnyja" pytańni) načalnik infarmacyjnaj słužby Nacbanku Anatol Drazdoŭ.
Vyjavy na manietach raspracavanyja viadučaj mastačkaj banku Śviatłanaj Zaskievič. «Pakolki tema Zadyjaku — niebiełaruskaja, ja zrabiła manietu ŭ takim admietnym, nietradycyjnym styli. U vočki Rybam i Bliźniatam paŭstaŭlała sintetyčnyja kryštali, kab ažyvić vyjavu, kab sieryja vyjšła sapraŭdy niezvyčajnaj», – kaža Zaskievič.
Maniety zroblenyja ŭ Polščy — u nas niama ŭłasnaha manietnaha dvara. Nacbank ładzić tender siarod manietnych dvaroŭ susiednich dziaržavaŭ, i palaki vyjavilisia vydatnymi partniorami.
Košt pamiatnaj srebranaj maniety – 99 tysiačaŭ, ale pavodle zajavy Nacyjanalnaha banku, manieta źjaŭlajecca zakonnym płaciežnym srodkam, abaviazkovym da pryjomu pa naminalnym košcie – 20 rubloŭ. To bok
u kožnym hastranomie zamiest žoŭtaj dvaccacirubloŭki možna dać kasircy hety kruhlak, dyjamietram amal 4 santymietry, jaki z vyhladu bolš nahadvaje siarednieviečnyja talery, čym sučasnyja hrošy.
«Vy daremna śmiejaciesia, — reahuje Anatol Drazdoŭ, — kab manietu nichto nie pryjmaŭ pavodle naminału, dyk jana była by zvyčajnym pamiatnym medalom. Heta suśvietnaje patrabavańnie da pamiatnych maniet — jaje pavinny prymać u jakaści raźlikovaha srodka. Sabiekošt bolšy za naminał — sam ža kalekcyjanier nie zachoča addać takija darahija 20 rubloŭ».
